Ang Basahon ni Mormon isip usa ka Personal nga Giya

Kitang tanan mobati, sa atong labing maayo nga mga higayon, sa usa ka tinguha sa pagbalik aron sa pagpuyo uban sa Dios. Siya mihatag kanato sa gasa sa Iyang Hinigugmang Anak isip atong Manluluwas sa paghatag kanato sa dalan ug sa pagtudlo kanato unsaon sa pagsunod niini. Siya mihatag kanato og mga propeta sa pagtudlo sa dalan. Si Propetang Joseph Smith nadasig sa paghubad sa rekord sa mga propeta nga mao ang Basahon ni Mormon. Kini mao ang atong sigurado nga giya sa pagbalik ngadto sa Dios.

Si Joseph Smith miingon kabahin nianang talagsaon nga basahon, “Ako misulti sa mga kaigsoonan nga ang Basahon ni Mormon mao ang labing tukma sa bisan hain nga basahon dinhi sa yuta, ug ang sukaranan sa atong tinuohan, ug ang tawo labi nga maduol sa Dios pinaagi sa pagsunod sa iyang mga lagda, kay sa bisan hain nga basahon.”¹

Ang mga lagda sa Basahon ni Mormon mao ang mga sugo sa Dios nga atong makita niini. Ang uban mao ang direktang mga sugo gikan sa Manluluwas pinaagi sa Iyang mga propeta kabahin sa unsa gayud ang atong buhaton ug unsa kita mamahimo. Ang Basahon ni Mormon naghatag kanato sa ehemplo sa Manluluwas sa pagpalambo sa atong pagtuo ug determinasyon sa pagsunod sa Iyang sugo sa pagsunod Kaniya. Ang basahon napuno sa doktrina ni Kristo aron sa paggiya kanato. Ania ang usa ka ehemplo gikan sa 2 Nephi:

“Si [Jesus] miingon ngadto sa mga katawhan: Sunod kamo kanako. Busa, akong hinigugma nga mga kaigsoonan, makasunod ba kita kang Jesus gawas kon kita andam sa paghupot sa mga sugo sa Amahan?

“Ug ang Amahan miingon: Paghinulsol kamo, paghinulsol kamo, ug pagpabunyag sa ngalan sa akong Hinigugmang Anak” (2 Nephi 31:10–11).

Ang basahon yano nga nagpasabut nga kita kinahanglan modawat sa Espiritu Santo isip bunyag sa kalayo sa pagtabang kanato nga magpabilin sa tul-id ug pig-ot nga dalan. Kita gitudloan nga kita kinahanglan gayud nga mag-ampo kanunay sa ngalan ni Kristo, dili maluya, ug kon ato kining buhaton, kita makaangkon niini nga saad: “Busa, kamo kinahanglan gayud mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaum, ug usa ka gugma sa Dios ug sa tanan nga mga tawo. Busa, kon kamo mopadayon sa unahan, magbusog sa pulong ni Kristo, ug molahutay hangtud sa katapusan, tan-awa sa ingon miingon ang Amahan: Kamo makabaton og kinabuhi nga dayon” (2 Nephi 31:20).

Ang Basahon ni Mormon yano nga nagpasabut sa kahibulongang wali ni Haring Benjamin kon unsa ang gipasabut sa pagbaton sa gugma sa Dios ug sa tanang mga tawo. Kon ang atong mga kinaiya nausab pinaagi sa gahum sa Pag-ula ug pinaagi sa atong matinud-anong pagkamasulundon sa mga sugo, kita mapuno sa gugma sa Dios (tan-awa sa Mosiah 4:1–12).

Ang Basahon ni Mormon naghatag usab kanato og pagsalig nga kita mahimong malimpyo kaayo niining kinabuhi nga kita wala nay tinguha sa pagbuhat og dautan (tan-awa sa Mosiah 5:2). Kini nga paglaum naghatag kanato og kaisug ug kahupayan samtang si Satanas mosulay sa pagtintal ug pagpawala sa atong kadasig diha sa atong dalan.

Sa matag higayon nga ako mobasa og bisan gani sa pipila lamang ka linya sa Basahon ni Mormon, akong mabati nga ang akong pagpamatuod nalig-on nga ang basahon tinuod, nga si Jesus mao ang Kristo, ug kita makasunod Kaniya sa pagbalik ngadto sa Dios, ug atong madala kadtong atong gihigugma pagbalik ngadto sa Dios. Kini ang labing maayo nga basahon sa tanang mga basahon alang kanako. Kini ang pulong sa Dios.

Nag-ampo ako nga kita ug kadtong tanan nga atong gihigugma mamalandong ug mobasa gayud matag adlaw gikan niini. Mopamatuod ako sa ngalan ni Jesukristo nga kini mao ang tinuod nga giya.