Ang Labing Bililhon nga Gasa

Mitabang si Sophie ni Mama sa paglimpyo sa ilang panimalay. Ang mga misyonaryo mobisita karon. Sila hinangop nga mga bisita sa panimalay ni Sophie sa Cambodia. Miandam si Mama og espesyal nga pagkaon: tamales, kan-on, ug mais nga may mga sili.

Ang mga misyonaryo nakatudlo sa pamilya ni Sophie mahitungod ni Jesukristo ug sa Iyang Simbahan. Duha ka semana lamang ang milabay si Elder Kraig ug ang iyang kompanyon, si Elder Jessen, mibunyag ni Sophie, iyang mga ginikanan, ug sa iyang duha ka magulang nga mga lalaki. Pagkahuman, gibati ni Sophie ang kalainan sa iyang pamilya. Dihay mas daghan nga kinataw-anay, kinantahay, ug pag-ampo.

Sa panahon sa pagpangaon si Sophie namati ngadto sa iyang mga ginikanan ug sa igsoong mga lalaki nga naghisgot sa mga kasulatan uban sa mga misyonaryo. Human nahipos ang mga plato, si Elder Kraig miingon, “Mopauli na ako sa sunod semana.”

Wala magdahum si Sophie nga hapit na siya mopauli. Mga luha mipundok sa mga kilid sa iyang mga mata. Mipasiplat si Sophie sa iyang igsoong mga lalaki. Hapit na usab sila mohilak.

Mihingos si Elder Kraig og kadaghan nga higayon. “Ako adunay ihatag alang kaninyo,” miingon siya ngadto ni Papa. Mikuha siya og putos gikan sa iyang backpack. “Kini para nimo ug sa imong anak nga mga lalaki.”

Giablihan ni Papa ang kahon ug gikuha ang unom ka puti nga pang-Dominggo nga mga polo. Dugay-dugay siya nga nahilom. “Dili kami makadawat sa ingon ka nindot nga regalo,” sa katapusan nisulti siya.

Nadungog ni Sophie ang kasubo sa tingog ni Papa. Ang iyang pamilya walay puti nga mga polo alang ni Papa ug sa batang mga lalaki, ug nasayud si Sophie nga gusto ni Papa nga magpakita og respeto pinaagi sa pagsul-ob og puti nga mga polo kon mosimba sila.

“Dili ako magkinahanglan og daghan kaayo nga mga polo kon ako mopauli,” miingon si Elder Kraig. “Matabangan mo ako og dako pinaagi sa pagdawat niini.”

“Apan ako walay ikahatag kanimo,” miingon si Papa. Mitudlo siya ngadto sa Basahon ni Mormon. “Nakahatag ka na kanamo sa labing bililhon nga gasa. Gidala nimo kanamo ang ebanghelyo ni Jesukristo.”

Sa sunod adlaw mihukom si Sophie sa paghimo og usa ka butang alang ni Elder Kraig. Human makigsulti ni Mama, mihukom siya sa paghimo og usa ka gilalik nga gamayng habol nga gitawag og serape. Gihulaman niya ang hablonan sa iyang inahan, mipili og mga kolor sa hilo, ug gitrabaho kini kada adlaw human sa klase ug sa mga buluhaton. Kon ang iyang mga tudlo magkasayop-sayop, mainampingon niyang gitangtang ang mga hilo ug misugod og balik.

Sa katapusan ang serape nahuman. Nanghinaot siya nga magustuhan ni Elder Kraig ang esponghaon nga brown ug cream nga mga kolor nga iyang gilalik og tingub. Giputos niya ang serape sa brown nga papel.

Sa adlaw sa katapusang pagbisita ni Elder Kraig sa ilang panimalay, gihatag ni Sophie ang iyang regalo.

“Salamat Sophie,” miingon si Elder Kraig. Mga luha milugmaw sa iyang mga mata. “Dili gayud ako makalimot kanimo ug sa imong pamilya.”

“Ug dili gayud kami makalimot kanimo.” miingon si Sophie.