Ngadto sa mga Returned Missionary

Usa sa labing lig-on nga mga panumduman nga ako aduna sa pagkamisyonaryo mao ang unsa ako ka duol nga nakabig ngadto sa Ginoo pinaagi sa pagbansay og kanunay nga pag-ampo. Sa akong panahon ang mission home nahimutang sa State Street sa Siyudad sa Salt Lake. Usa kini ka dako nga balay nga gihimo og usa ka missionary training center. Kini adunay dako nga mga kwartong katulganan nga tingali ingon ka daghan sa 10 ka mga katre sa usa ka kwarto. Misulod kami og Dominggo sa gabii.

Sa semana nga wala pa ako mosulod sa natad sa misyon usa ka mahinamon nga panahon. Dihay daghan nga mga party ug mga panamilit. Ako nahadlok nga makulangan ako sa pahulay ug pangandam alang sa pagbansay nga akong pagadawaton didto sa mission home. Sa diha nga ang gabii sa among unang adlaw sa mission home nagkaduol, gikapoy ako. Samtang naghulat alang sa uban nga mga misyonaryo sa pag-andam sa ilang mga kaugalingon sa pagkatulog, mihigda ako sa akong katre ug dali nga nakatulog. Ang akong pagkatulog, hinoon, nabalda sa usa ka pagbati nga naglibut kanako. Sa diha nga ang gabon sa pagkatulog mibiya, nadungog ko ang mga pulong sa usa ka pag-ampo nga gipamulong. Gibuka ko ang akong mga mata, ug sa kadako sa akong katingala, akong nakita ang tanan nga mga elder sa akong kwartong katulganan nga nagluhod libut sa akong katre, nagtapos sa adlaw uban sa usa ka pag-ampo. Dali nakong gipiyong ang akong mga mata ug nagpakaaron ingnon nga natulog. Naulaw kaayo ako sa pagbangon ug sa pag-apil kanila. Bisan tuod og ang akong unang kasinatian sa pag-ampo isip usa ka misyonaryo makauulaw, kini mao ang sinugdanan sa duha ka talagsaon nga mga tuig sa kanunay nga pagtawag sa Ginoo alang sa paggiya.

Sa akong tibuok misyon, nag-ampo ako uban sa akong kompanyon matag buntag samtang among sugdan ang usa ka bag-ong adlaw. Ang proseso gibalik-balik matag gabii sa dili pa kami matulog. Naghalad kami og pag-ampo sa dili pa kami magtuon, usa ka pag-ampo samtang mobiya kami sa among apartment aron sa pagpangita og katudloan, ug dayag lamang linain nga mga pag-ampo kon ang linain nga paggiya gikinahanglan sa pag-agak sa among misyonaryo nga buhat. Ang pagkakanunay sa among mga pangamuyo ngadto sa atong Amahan sa Langit nakahatag kanamo og kalig-on ug kaisug sa paglahutay diha sa buhat ngadto diin kami gitawag. Ang mga tubag moabut, usahay sa makahibulong nga direkta ug positibo nga mga paagi. Ang giya sa Espiritu Santo ingon og nagkadako kon sa makadaghan nga mga higayon kami mihangyo ngadto sa Langitnong Amahan og direksyon sa usa ka piho nga adlaw.

Samtang ako naghinumdom sa akong kinabuhi human sa akong misyon, nakaamgo ako nga dihay mga panahon nga ako nakapadayon sa sama nga kasuod ngadto sa Ginoo nga akong nasinati didto sa natad sa misyon. Usab dihay mga panahon nga ang kalibutan ingon og mihinay-hinay pag-impluwensya ug ako dili na kaayo makanunayon ug matinud-anon sa akong mga pag-ampo.

Dili ba kini usa ka maayong panahon alang sa gamay nga pagtimbang-timbang sa kaugalingon aron sa pagtino kon kita aduna pa bay sama nga relasyon ngadto sa atong Amahan sa Langit nga atong gipahimuslan sa natad sa misyon? Kon ang kalibutan mipatipas kanato gikan sa nabatasan nga pag-ampo, niana kita nawad-an og usa ka dako kaayo nga espirituhanong gahum. Tingali kini panahon na nga atong pasigaon pag-usab ang atong diwa sa misyonaryo pinaagi sa kanunay, walay kausaban, ug gamhanan nga pag-ampo.

Ang sunod nga makawili nga panumduman nga ako aduna nga anaa kanako sa pagkamisyonaryo mao kadtong kada adlaw nga pagtuon sa kasulatan. Ang disiplina sa pagsunod og usa ka plano sa pagtuon sa kasulatan mahitungod sa pagkat-on sa ebanghelyo usa ka talagsaon, makalipay nga kasinatian. Ang kahibalo sa mga pagtulun-an sa mga kasulatan mopatin-aw sa mahimayaon nga paagi pinaagi sa indibidwal nga pagtuon. Isip usa ka misyonaryo ako naghinumdom nga natingala kon unsa ka hingpit ang Ginoo miandam og usa ka plano alang sa Iyang mga anak dinhi sa yuta, kon giunsa Niya sa pagdasig ang mga hunahuna sa Iyang mga propeta sa tanan nga mga dispensasyon sa panahon sa pagrekord sa Iyang mga pakig-uban ngadto kanila. Ang Iyang mga pulong kanunay nga positibo ug direkta, nagpadayag sa mga panalangin nga moabut pinaagi sa pagsunod sa Iyang balaod ug sa Iyang dalan.

Kami usab mogahin og oras o labaw pa sa matag adlaw sa pagtuon of dungan isip mga kompanyon. Nagbaton og duha ka paris nga mga mata nga nagsuta sa doktrina sa gingharian ingon og nagpilo sa among panabut. Basahon namo og dungan, dayon magbinayloay og mga panabut.

Ang among mga salabutan nabaiid samtang kami misunod sa inadlaw-adlaw nga pagbansay sa indibidwal ug kompanyon nga pagtuon. Ang pagbansay nakapahimo kanamo nga mas suod isip mga kompanyon ug nakapadugang sa among panabut sa mga doktrina sa gingharian.

Sa diha nga kami mibiya sa natad sa misyon, kami wala nay mga kompanyon nga motabang kanamo sa pagdisiplina sa among mga naandan nga pagtuon, apan kana wala magpasabut nga ang pagbansay kinahanglan nga hunungon. Sa among pagpauli sa panimalay, unsa ka nindot kaayo ang paghimo og inadlaw-adlaw nga pamilyang pagtuon sa kasulatan. Kon kita mobiya sa panimalay, dili ba kita makadapit og mga kauban sa kwarto ug mga higala sa pagtuon uban kanato? Ang buhat sa paghimo og regular nga mga klase sa pagtuon ug pagtambong sa institute makatabang sa paghupot sa mga doktrina sa gingharian nga klaro sa atong mga salabutan ug motugbang sa walay puas nga pagsamok sa kalibutanon nga mga kabalaka. Dayag lamang, kon kita magminyo, kita adunay mahangturon nga mga kauban kang kinsa kita makatuon ug makabinayloay og mga pagtulun-an sa ebanghelyo.

Ang mga kasulatan anaa kanunay sa pagpalawom sa atong panabut sa katuyoan sa kinabuhi ug unsa ang atong kinahanglan nga buhaton sa paghimo sa kinabuhi nga mas malipayon ug magantihon. Palihug himoa nga aktibo ang pagbansay kanunay sa indibidwal ug kompanyon nga pagtuon sa kasulatan.

Nahinumdom ka ba sa hingpit nga kalipay nga moabut gikan sa pagtudlo sa ebanghelyo ngadto sa usa ka tawo kinsa gihikawan niini nga mga pagtulun-an sa tibuok niya nga kinabuhi, sa kahinam nga moabut kon ikaw nagtudlo sa balaod sa Ginoo, ug sa mga panalangin nga madawat gikan sa pagsunod Kaniya? Makahimo ka ba sa pagkalimot sa hingpit nga kalipay sa imong unang gibunyagan didto sa natad sa misyon?

Sa akong panahon ang mga chapel wala pa mabutangi og mga bunyaganan. Ang una nakong gibunyagan gihimo didto sa Suba sa Scioto sa estado sa Ohio, USA. Usa kadto ka bugnaw nga adlaw sa tinglarag, ug ang tubig ingon og gani mas bugnaw kay sa hangin. Nahinumdom ko sa kakurat sa pag-ubog ngadto sa bugnaw nga suba samtang nag-awhag sa akong investigator sa pagsunod kanako. Ang kabugnaw sa hangin ug sa tubig, bisan pa niana, sa kadugayan nawala samtang ako mipahigayon sa ordinansa sa bunyag. Nagtan-aw sa malipayong nawong sa indibidwal kinsa mitunga gikan sa katubigan sa bunyag maoy usa ka imahe nga dili gayud nako makalimtan.

Ang mga oportunidad sa pagtudlo sa ebanghelyo ug sa pagbunyag dili lamang ila niadtong kinsa nagsul-ob sa name tag isip usa ka full-time missionary. Nahibulong ako kon ngano nga atong tugutan nga mokunhod ang kainit sa misyonaryo nga pagserbisyo kon kita mobalik na sa mga kalihokan sa atong kinabuhi dinhi sa kalibutan.

Wala pay panahon sukad sa kasaysayan sa katawhan nga kita maayo nga pagkasangkap sa pagtudlo sa ebanghelyo sa mga anak sa atong Amahan sa Langit dinhi sa yuta. Ug sila ingon og mas nagkinahanglan niini karon kay sa kaniadto. Atong makita ang pagkunhod sa hugot nga pagtuo. Atong makita ang nagtubo nga gugma alang sa pagkakalibutanon ug pag-us-os sa moral nga mga hiyas, kining duha makahimo og dugang nga kaguol ug kawalay paglaum. Unsa ang atong kinahanglan mao ang usa ka halangdon nga kasundalohan sa mga returned missionary nga gilista pag-usab ngadto sa serbisyo. Bisan og dili nila isul-ob ang name tag sa usa ka full-time missionary, sila makabaton sa sama nga tinguha ug determinasyon sa pagdala sa kahayag sa ebanghelyo ngadto sa usa ka kalibutan nga nakigbisog sa pagpangita sa dalan niini.

Nagtawag ako kaninyo mga returned missionary sa paghalad pag-usab sa inyong mga kaugalingon, sa paghimo nga mabisbisan pag-usab uban sa tinguha ug sa espiritu sa misyonaryo nga pagserbisyo. Nagtawag ako kaninyo sa pagtan-aw sa bahin, sa paghimo nga kabahin, ug sa paglihok sa bahin sa usa ka sulugoon sa atong Amahan sa Langit. Nag-ampo ako alang sa inyong gibag-o nga determinasyon sa pagsangyaw sa ebanghelyo nga kamo unta mahimo nga labaw ka aktibong naapil niining dako kaayong buhat nga gisugo kanato sa Ginoo nga buhaton. Buot ako nga mosaad kaninyo nga adunay dagko kaayo nga mga panalangin nga giandam alang kaninyo kon kamo mopadayon sa paglahutay uban sa kakugi nga kaniadto inyong naangkon isip usa ka full-time missionary.

Padayon uban ang bag-o nga determinasyon, ug pinaagi sa inyong ehemplo, pasanaga ang kahayag sa ebanghelyo dinhi niining gubot nga kalibutan. Kini mao ang buhat sa Ginoo diin kita naapil. Ang Dios buhi. Si Jesus mao ang Kristo. Kita sakop sa Iyang Simbahan. Kini mao ang akong saksi nganha kaninyo.