Ako nanghinaut nga ako makasulti sa tibuok kalibutan mahitungod sa ebanghelyo. Apan kon ako mosulay, mobati ako og ka dili sarang. Sa unsa nga paagi ako makakat-on sa pagpakigbahin kon unsa ang akong gituohan?

Ang mga katawhan nakigbahin sa ilang mga pagpamatuod sa daghang lain-lain nga mga paagi. Ang uban nga mga katawhan dali nga makapamatuod ngadto sa naglibut kanila. Ang uban makasulat sa ilang mga pagpamatuod sa usa ka nindot nga estilo. Ang uban nakigbahin sa ilang hugot nga pagtuo pinaagi sa musika o art. Ang mga pagpamatuod mapakigbahin usab pinaagi sa ehemplo, pinaagi sa paagi sa atong pagpuyo.

Pinaagi sa pagpakigbahin sa imong pagpamatuod, kini motubo, ug ikaw makaangkon og pagsalig dili lamang diha sa imong kaugalingon apan usab diha sa imong pagpamatuod. Pag-ampo alang sa panabang ug kalig-on sa mas maayo nga pagpalambo sa imong abilidad sa pagpakigbahin ngadto sa uban kon unsa ang imong gituohan. Ang Ginoo nagsaad nga kon ablihan ninyo ang inyong ba-ba, kini makasulti (tan-awa sa D&P 33:8).

Kon ikaw mahadlok nga mosulti diha sa atubangan sa uban, sulayi ang pagsulat sa imong pagpamatuod ug sa pagbasa niini og kusog nganha sa imong kaugalingon. Kini mahimo nga makatabang kanimo nga mobati og mas labaw ka komportable sa pagpakigbahin sa imong pagpamatuod. Sugdi pinaagi sa pagpakigbahin niini uban sa imong pamilya ug suod nga mga higala. Paghimo og gagmay, yano nga mga lakang, mosalig diha sa Ginoo, ug sa dili madugay ikaw mobati og mas labaw ka komportable sa pagpakigbahin sa imong pagpamatuod diha sa mga miting o ngadto ni bisan kinsa nga imong ikahimamat.

Ayaw og kaguol kon unsay mahimong hunahunaon sa uban kanimo. Kon sila andam, ang imong pagpamatuod modapit sa Espiritu Santo sa pagtandog kanila. Hinumdumi nga ang imong pagpamatuod imo ug nga kini espesyal alang sa Ginoo ug nganha kanimo.

Si Presidente Thomas S. Monson miingon: “Kamo nagbaton og pagpamatuod; ipakigbahin kini. Ayaw gayud isipa og ubos ang malukpanon nga impluwensya sa imong pagpamatuod” (“Pagpuyo Ingon nga Panig-ingnan,” Liahona, Mayo 2005, 115; “A Code to Live By,” New Era, Sept. 2005, 8).