Paglaum diha sa mga Ordinansa sa Ebanghelyo

Natawo ug nagdako ako sa Pilipinas, diin akong nakaila ug naminyoan ang akong asawa, si Monina. Didto ang among anak nga lalaki natawo. Mga tunga-tunga sa 1990, ang among pamilya mibalhin sa Saipan, usa ka gamay nga isla sa Pasipiko. Didto, kami aktibo nga mga miyembro sa lain nga simbahan. Usahay, makakita ako og mga paris sa batan-ong mga lalaki nga maglakaw diha sa isla, nagsul-ob og limpyong puti nga mga sinina ug mga kurbata. Nasayud ako nga sila mga misyonaryo sa Santos sa Ulahing mga Adlaw, apan wala akoy plano sa pagpamiyembro sa lain nga simbahan. Kon sila akong makita padulong sa akoa, sa tinuod moliko ug modagan ako sa lain nga direksyon.

Ang akong kinaiya ngadto sa mga misyonaryo nausab sa dihang duha ka higala, sila si Mel ug Soledad Espinosa, nabunyagan sa Simbahan. Sila miawhag sa among pamilya sa pagpakigkita sa mga misyonaryo, ug sa kasagaran tungod lamang sa kakuryuso, kami misugot sa paghimo. Niadtong Agosto 2007 mao ang una namong panagkita, ug samtang ang mga misyonaryo mipakigbahin sa ilang mensahe, mibati ako og butang nga puno sa gahum. Ang akong kasingkasing paspas nga mipitik, ug ang akong tibuok lawas mibati og nindot nga pagbati. Sa wala madugay akong nahibaloan nga ang akong tibuok pamilya mibati og kadasig ug nabayaw. Ang among mga pagbati mas mikusog sa nagsunod nga mga bulan samtang kami nakakat-on og mas daghan kabahin sa ebanghelyo ni Jesukristo.

Sa higayon nga misugod kami sa pagpakigkita sa mga misyonaryo, ang kusog ni Monina misugod sa paghinay, ug wala hiilhi nga mga hubag ang misugod sa paggawas sa tibuok niyang lawas. Migrabe ang iyang arthritis nga wala pa gayud mahitabo sukad. Kami nagpakitabang sa medikal, apan wala sa mga pag-eksamin ang mihatag kanamo og bisan unsa nga mga tubag. Samtang ang mga bulan milabay, ang iyang kahimtang sa panglawas mas migrabe hangtud nga miabut sa punto nga siya nagkinahanglan og dugang medikal nga pagtagad. Pagka Disyembre, si Monina misakay sa eroplano padulong sa Pilipinas aron makigkita sa mga doktor didto. Mipabilin ako sa Saipan aron magpadayon sa pagtrabaho ug pag-atiman sa among batan-ong anak nga lalaki.

Sa wala pa siya molarga, si Monina miingon kanako nga gusto niyang magpabunyag inig balik niya sa Saipan. Siya usab mihangyo kanako sa pagpadayon sa pagpakigkita sa mga misyonaryo bisan dili siya makatambong sa pipila ka mga leksyon. Misaad ako kaniya nga si Mark ug ako mobuhat niini.

Atol sa iyang panahon sa Pilipinas, kanunay kaming mag-istorya aron makadungog ako kabahin sa iyang mga pagbisita sa doktor ug siya makadungog unsa ang among nakat-unan kabahin sa ebanghelyo. Ang akong asawa mireport nga siya mibati nga ang sakit nagkawala kada adlaw, ug mapasalamaton ako nga ang medikal nga atensyon miepekto. Niadtong sayo sa Enero 2008, mipalit ako og tiket sa eroplano aron makabisita kaniya, apan nakasiguro siya nga siya makabalik sa Saipan sa labing madali nga panahon ug dili na kinahanglan nga mag-usik-usik og kwarta alang sa biyahe. Siya miingon kanako nga siya nahigugma ug gimingaw sa among anak nga lalaki ug kanako ug misiguro kanako nga ang tanan mamaayo ra.

Tulo ka adlaw ang milabay siya kalit lamang namatay. Ang hinungdan: wala makit-i nga leukemia. Si Mark ug ako natingala—ug nawad-an sa paglaum. Kami dali-daling mibyahe sa Pilipinas alang sa paglubong ug dayon mibalik sa Saipan. Kini ang labing lisud nga panahon sa among kinabuhi.

Ang kasubo nga akong gibati hilabihan ka grabe, nga naglisud ako sa pagbangon matag buntag. Usa ka piho nga lisud nga adlaw, si Mark mipahinumdom kanako og usa ka butang nga gitudlo sa mga misyonaryo sa among pamilya. Siya miingon, “Pa, ayaw og hilak pag-ayo. Si Mama anaa sa dapit sa Dios. Siya anaa sa kalibutan sa espiritu.” Hilabihan ang akong gibati nga pasalamat nga ang Dios miandam og paagi alang kang Monina sa pagpadayon sa pagkat-on kabahin sa ebanghelyo, nga ang tanan kinsa natawo adunay kahigayunan sa pagdawat o pagsalikway sa ebanghelyo ni Jesukristo—niini man nga kinabuhi o sa sunod.

Samtang nagpadayon ako sa pagkat-on sa mga pagtulun-an ni Jesukristo, nakaamgo ako nga ang Langitnong Amahan nag-andam og mas labaw pa niana: Siya usab mihimong posible alang kaniya sa pagdawat sa importanting mga ordinansa sama sa bunyag. Sa wala pa mobiya ang akong asawa sa Pilipinas, siya ug ako nagsugod sa paghisgut mahitungod sa pagpamiyembro sa Ang Simbahan ni Jesukristo sa mga Santos sa Ulahing mga Adlaw. Bisan tuod siya wala mabunyagi niini nga kinabuhi, ang Langitnong Amahan wala mobiya kanamo nga walay paglaum.

Si Mark ug ako miatubang og pipila ka mga pagsulay sa misunod nga mga bulan. Human makapauli gikan sa Pilipinas alang sa lubong sa akong asawa, nawad-an ko og trabaho. Gibaligya nako ang among sakyanan aron sa pagbayad sa mga bayrunon sa ospital ni Monina. Dugang pa, si Mark ug ako kinahanglan nga mo-adjust sa kinabuhi nga wala si Monina. Bisan sa kalisud, si Mark ug ako nakabaton og paglaum sa among bag-ong nakaplagan nga tinuohan, ug kami nabunyagan niadtong Abril 2008. Sa mga bulan nga misunod, nakakita ako og laing trabaho ug nakabayad sa mga bayrunon sa ospital. Si Mark ug ako mihimo og tumong sa pag-apil sa biyahe sa among branch ngadto sa Manila Philippines Temple aron kaming tanan ma-sealed isip usa ka pamilya.

Human sa pagtigum sa tanan namong sobra nga kinitaan ug nangandam sa among kaugalingon sa espirituhanon nga paagi, si Mark ug ako mibiyahe uban sa sa among branch ngadto sa templo niadtong Mayo 2009. Samtang kami nangandam alang sa pagbiyahe, among nakita mismo sa among kaugalingon ang makaguba nga buhat sa kaaway ingon man ang makapalig-on ug makapabayaw nga gugma sa atong Langitnong Amahan. Grabe ang akong sakit sa adlaw nga wala pa ang eskedyul sa among pagbiyahe alang sa templo. Ang pipila sa mga miyembro nakasinati og wala damha nga mga problema sa imigrasyon, samtang ang uban adunay problema sa pagkuha og mga passport. Ang among mga higala kinsa mipaila-ila sa akong pamilya sa ebanghelyo, ang mga Espinosa, nawagtangan sa ilang mga trabaho sa semana nga kami naka-eskedyul sa pagtambong sa templo. Mas pait pa, usa ka miyembro sa among kapangulohan sa branch kinsa nakaeskedyul sa pagtambong sa templo sa unang higayon namatayan sa iyang amahan tungod sa kalit lang nga sakit tulo ka adlaw sa wala pa ang among biyahe. Apan sa katapusan ang Ginoo milig-on sa matag usa kanamo ug mihimong posible alang sa 42 ka mga miyembro sa branch sa pagtambong sa templo. Dise sais kanamo ang mitambong sa unang higayon.

Mayo 13, 2009, mao ang adlaw nga dili gayud nako makalimtan. Sa dihang ako miabut sa templo, ang kabug-at ug kasakit sa kamatayon sa akong asawa nawala diha-diha dayon. Bisan tuod sa sinugdanan ako nakuyawan kabahin sa templo tungod kay ako wala masayud gayud unsa ang akong buhaton ug asa paingon, mibati ko og kakalma, anaa ang kalinaw nga akong gibati diha dayon sa akong pagsulod. Kini lahi kaayo gikan sa nagkapuliki nga mga dalan nga anaa lamang sa gawas sa mga pultahan sa templo.

Samtang nagpadayon ang adlaw, ang akong kasinatian sa templo nahimong mas makahuluganon ug mas gamhanan. Sa pagkabuntag ang among branch mihimo sa mga bunyag alang sa patay. Samtang ako nagtan-aw, nakita nako ang akong kaugalingon nga naghunahuna sa akong asawa, kinsa usa na ka tuig ug tunga ang milabay mipahayag sa iyang tinguha nga magpabunyag. Dayon ako misaksi sa pagkatuman niana nga tinguha samtang ang usa ka higala gibunyagan alang kang Monina.

Ang labing nindot nga bahin sa akong pagbiyahe, hinoon, miabut sa kaulahiang bahin nianang hapona sa dihang ako milakaw padulong sa sealing room. Ang akong asawa ug ako naminyo mga pipila ka tuig ang milabay, apan kami wala maminyo sa templo pinaagi sa may awtoridad sa priesthood sa Langitnong Amahan. Sa dihang ang akong asawa namatay, naghunahuna ako nga nawala na siya kanako hangtud sa hangtud. Apan sa dihang akong nahimamat ang mga misyonaryo, nakakat-on ko nga diha sa templo, ang mga pamilya ma-sealed hangtud sa kahangturan.

Samtang naglakaw ako padulong sa sealing room sa Templo sa Manila, nasanapan ako sa emosyon. Sukad sa akong bunyag, nasayud ako nga ang mga panalangin sa ebanghelyo tinuod, apan nianang higayona tinuoray akong nakasaksi sa bili niini. Samtang si Mark ug ako miluhod sa altar aron ma-sealed isip usa ka pamilya, akong gibati ang presensya sa akong asawa. Madungog nako ang iyang tingog, ug daw nagkupot ako sa iyang kamot. Gibati nako ang presensya ni Monina sa matag pagbati sa akong kasingkasing. Diha dayon ako nasayud nga kami mahangturong pamilya.