Sa akong klase sa Sunday School pipila sa mga tawo walay balaan nga pagtahud. Nakigsulti ako sa magtutudlo ug sa akong bishop. Unsa pa man ang akong mabuhat?

Una, pagpakita og ehemplo alang sa uban diha sa imong klase. Pagpakita og interes sa unsay giandam sa magtutudlo. Kon ilang makita nga ikaw gusto nga makakat-on, mahimo nga sila makaamgo nga unsay gitudlo adunay bili.

Ang mga sakop sa klase mas maminaw kon sila gipaapil, busa apila ang imong kaugalingon ug daniha sila pinaagi sa pagpangutana ug sa pagtubag ngadto sa mga pangutana nga modasig og panaghisgot ug lawom nga paghunahuna mahitungod sa hilisgutan.

Pag-ampo nga makabaton sa Espiritu Santo nga magdala og usa ka makahupay ug makadasig nga impluwensya nganha sa imong klase aron ang tanan kaninyo makakat-on gikan sa leksyon.

Sa katapusan, higugmaa ug pasayloa kadtong mga nakabalda. Bisan tuod og ikaw wala makagusto sa ilang mga kinaiya, sila dili sa kalagmitan mausab kon sila mobati nga ikaw sa kanunay nasuko o gipakaubos nimo sila. Hinoon, pag-ampo alang kanila ug serbisyuhi sila. Kon ilang makita nga ikaw nagtagad kanila ug madasigon mahitungod sa leksyon, ang imong kadasig makakaylap.