Ang Atong Responsibilidad sa Pag-amuma sa Bag-o nga Kaliwatan

Tun-i kini nga materyal ug, kon angay, hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi.

Imahe

Relief Society seal

Hugot nga Pagtuo • Pamilya • Kahupayan

Gikan sa mga Kasulatan

Mga Proverbio 22:6; Mga Taga-Efeso 6:4; Enos 1:1; Alma 53:20–21; 56:47; 57:27

Kon walay pag-amuma, ang atong bag-o nga kaliwatan mahimong mamiligro sama sa gihulagway diha sa Mosiah 26. Daghang kabatan-onan ang wala motuo sa mga tradisyon sa ilang mga amahan ug sila nahimong usa ka nahimulag nga mga katawhan ingon sa ilang hugot nga pagtuo, nagpabilin sukad niadto. Ang atong bag-o nga kaliwatan mahimo usab nga masalaag kon sila wala makasabut sa ilang bahin diha sa plano sa Langitnong Amahan.

Unsa man diay ang makapabilin sa bag-o nga kaliwatan nga luwas? Sa Simbahan, kita nagtudlo og mga baruganan nga makaluwas, ug kana nga mga baruganan mao ang mga baruganan sa pamilya, ang mga baruganan nga makatabang sa bag-o nga kaliwatan sa pagmugna og usa ka pamilya, pagtudlo niana nga pamilya, ug sa pag-andam niana nga pamilya alang sa mga ordinansa ug mga pakigsaad—ug dayon ang sunod nga kaliwatan ang motudlo sa sunod ug magpadayon.

Isip mga ginikanan, mga lider, ug mga miyembro sa Simbahan, kita nag-andam niini nga kaliwatan alang sa mga panalangin kang Abraham, alang sa templo. Kita adunay responsibilidad sa klaro nga pagtudlo sa labing mahinungdanon nga mga punto sa doktrina nga anaa sa pamahayag kabahin sa pamilya. Ang pagkainahan ug pagkaamahan mga mahangturong bahin [role] ug mga responsibilidad. Ang matag usa kanato nagdala sa responsibilidad alang sa lalaki o sa babaye nga bahin niana nga plano.

Kita makatudlo niini nga doktrina bisan asa. Kita kinahanglan gayud nga maghisgut sa kaminyoon ug pamilya sa matinahuron nga paagi. Ug gikan sa atong ehemplo, ang bag-o nga kaliwatan makaangkon og dakong paglaum ug panabut—dili lamang gikan sa mga pulong nga atong gipanulti apan sa paagi nga gikan sa atong pagbati ug pagpakita sa diwa sa pamilya.

Julie B. Beck, kinatibuk-ang Presidente sa Relief Society.

Gikan sa Atong Kasaysayan

Namulong sa mga sister diha sa kinatibuk-ang miting sa Relief Society niadtong Septyembre 23, 1995, si Presidente Gordon B. Hinckley miingon: “Ang kalibutan diin kita ania usa ka kalibutan sa kagubot, sa nag-usab-usab nga mga mithi. Hait nga mga tingog nanawag alang sa usa ka butang o sa lain aron ipaubos ang nasulayan na sa panahon nga mga sumbanan sa pamatasan.”¹ Si Presidente Hinckley mipadayon sa pagpaila ngadto sa mga sister, sa Simbahan, ug sa katapusan sa tanang katawhan bisan asa sa “Ang Pamilya: Usa ka Pamahayag ngadto sa Kalibutan.”

Sa mosunod nga mga tuig kining propetikanhong dokumento gihubad ngadto sa daghang pinulongan ug gipang-apud-apod ngadto sa mga lider sa kalibutan. Kini naghangyo sa mga lumulupyo ug sa mga lider sa gobyerno “sa pag-awhag sa mga tawo sa paghimo niadtong mga butang nga gihimo sa pagpadayon ug sa paglig-on sa pamilya isip sukaranan nga yunit sa katilingban.”²

Ang pamahayag nahimong pundasyon sa mga pagtuo alang sa mga Santos sa Ulahing mga Adlaw kabahin sa pamilya, usa ka pahayag diin kita mahimong mogunit og hugot ug masayud nga pinaagi sa pagsunod sa mga lagda niini, kita naglig-on sa atong mga pamilya ug mga panimalay.

Sa tuo: paghulagway sa litrato pinaagi ni Christina Smith