Ang Akong Kaugalingong Basahon ni Mormon

Niadtong Agosto 2005, sa dihang si Presidente Gordon B. Hinckley (1910–2008) mihatag og hagit sa mga miyembro sa Simbahan sa pagbasa sa Basahon ni Mormon sa dili pa matapos ang tuig, ako misaad sa akong kaugalingon nga basahon nako ang tibuok basahon. Pamilyar ako sa mga istorya sa Basahon ni Mormon apan wala pa gayud kini nako maganid og basa. Karon ako nang tinud-on ang akong saad.

Kanunay akong gitudloan sa paggamit sa mga kasulatan sa akong kinabuhi ug himoon kini nga hilabihan kamahuluganon. Busa samtang ako magbasa, magsulat ako diha sa mga kilid sa pahina kon unsa sa akong hunahuna ang labing mahinungdanon nga ideya sa kasulatan. Gilinyahan usab nako ang mga pulong ug mga hugpong sa mga pulong nga nagbalik-balik aron sa pagpakita og gibug-aton.

Gisulat nako ang akong ngalan sunod sa mga ngalan diha sa mga kasulatan aron sa pagpahinumdom kanako nga ang pulong sa Dios nga gipamulong ngadto sa uban mahimong mao usab ang pulong nga gipamulong ngari kanako. Sama pananglit, sa 2 Nephi 2:28 gisulat nako ang akong ngalan: “Ug karon, [Hillary], ako unta manghinaut nga kamo mosalig sa halangdon nga Tigpataliwala, ug mopatalinghug ngadto sa iyang mahinungdanon nga mga sugo.” Sa akong paghimo nga hilabihan kamahuluganon ang Basahon ni Mormon ngari kanako, mas nadasig ako sa pagbasa niini matag adlaw.

Samtang nagbasa ako kada adlaw, ang akong mga pag-ampo nahimong mas kinasingkasing ug personal. Nakapokus na usab ako sa akong mga klase ug nakasunod sa mga aghat sa Espiritu sa pagpakighigala sa uban. Sa katapusang gabii sa tuig, nahuman nako ang Basahon ni Mormon.

Nasabtan dayon nako ang kaimportante sa pagbasa sa tibuok Basahon ni Mormon, lakip sa uban nga mga kasulatan, ug gustong mobuhat niini sa makadaghan sa akong kinabuhi.