Usa ka Matinud-anong Bata nga Ginganlan og Emma
Unsa kadaghan ang imong nahibaloan mahitungod sa matinud-anon nga gamayng bata nga babaye kinsa nagdako nga nahimong asawa ni Propeta Joseph Smith?
Si Emma Hale natawo niadtong Hulyo 10, 1804. Mipuyo siya sa usa ka umahan uban sa iyang amahan ug inahan ug sa iyang walo ka igsoon nga mga lalaki ug mga babaye. Ang pipila sa iyang mga iyaan, mga uyoan, ug mga ig-agaw nagpuyo sa duol.
Ang umahan sa mga Hale diha sa Harmony, Pennsylvania, sa usa ka maanindot nga walog daplin sa Suba sa Susquehanna. Makapamu-po si Emma og mga mansanas gikan sa prutasan. Makatan-aw siya og gagmay nga mga karnero nga nagdula, ug siya makatabang sa pagpanguha og mga utanon gikan sa dako nga tanaman. Kon magsugod na sa pagtunaw ang snow, makatan-aw siya sa iyang amahan nga manguha og duga sa maple og isulod sa dagko nga mga balde. Makatabang siya sa iyang inahan sa pagpabukal sa duga hangtud kini sa katapusan mahimong asukar nga maple.
Sa diha nga masuso pa siya, si Emma gibunyagan diha sa usa ka Kristiyano nga simbahan, ug siya mitambong og Sunday School sa diha nga gamay pa siya nga batang babaye. Ang Simbahan ni Jesukristo wala pa mapahiuli.
Usa ka adlaw sa diha nga si Emma mga otso anyos ang panuigon, miadto siya sa kakahoyan sa pag-ampo. Naguol siya mahitungod sa iyang amahan tungod kay siya walay lig-on nga pagtuo diha ni Jesukristo. Samtang si Emma nag-ampo, ang iyang amahan miadto sa kakahoyan aron sa pagpangayam. Sa diha nga iyang nadunggan ang iyang batan-ong anak nga babaye nga nag-ampo alang kaniya, natandog siya pag-ayo. Ang iyang pagtuo diha sa Ginoo nalig-on.
Nagtubo si Emma nga taas, intelihente nga batang babaye. Maayo kaayo siya nga tigbasa ug tigsulat. Sa diha nga siya 21, usa ka kugihan ug intelihente nga batan-ong lalaki nga ginganlan og Joseph mipuyo sa panimalay sa mga Hale. Si Emma Hale maayo og kinaiya ug abtik og pangutok. Usa siya ka mahiyason nga babaye. Dili ikatingala nga siya ug si Joseph mipili sa usag usa isip bana ug asawa!