Paghatag sa mga Bata og Kahigayunan sa Pagserbisyo

Bisan kinsa nga nagserbisyo diha sa Primary makasulti kaninyo nga lisud kanunay sa mga bata ang pagsulod sa Primary nga andam sa paglingkod og hilom ug magkat-on. Bisan unsa man kahanas ang usa ka magtutudlo o unsa ka dako sa gugma sa mga magtutudlo sa ilang klase, ang mga bata usahay magkiat.

Ang mga Santos sa Ulahing mga Adlaw kanunayng giingnan nga ang tanang bag-o nga mga miyembro sa Simbahan nagkinahanglan og usa ka responsibilidad.¹ Ang paghatag og responsibilidad makatabang kanila nga mobati nga sila kabahin sa Simbahan ug makahatag kanila og kahigayunan sa pagkat-on ug pagtubo. Ang mga bata makatagamtam niining sama nga mga panalangin kon sila hatagan og kahigayunan sa pagserbisyo.

Ang mga calling dili ipanghatag ngadto sa mga bata, apan ang mga lider sa Primary sa mainampuong paagi makapangita og mga oportunidad sa pagserbisyo bisan alang sa labing gamay nga bata. Ania ang pipila ka mga ideya:

• Pagpatabang sa mas magulang nga mga bata ngadto sa mas manghod nga mga bata atol sa panahon sa pagpakigbahin.

• Pagdapit sa mga bata kinsa sayo nga miabut sa pagbarug sa may pultahan ug sa pagpakig-abi-abi sa uban inig sulod nila sa Primary.

• Pag-assign sa mas magulang nga bata sa pagbantay sa pagsigurado nga ang mikropono naka-on.

• Paghangyo og pipila ka mas magulang nga mga bata sa pagkuha og chalk, eraser, mga krayola, o bisan unsa pa nga mga aytem gikan sa librarya.

• Paghangyo og usa ka bata kinsa makahibalo nga motugtog sa piyano sa pagtugtog og himno sa dili pa magsugod o sa pagkahuman.

• Pag-assign og duha ka mga higala sa paglingkod tapad sa usa ka bisita o sa bag-ong miyembro ug sa pagtabang sa tawo nga mobati nga welcome.

• Pagdapit og usa ka bata sa pagdumala sa musika.

• Pag-assign og pipila ka mga bata sa pagtabang og butang o paghipos sa mga lingkuranan.

• Paghangyo og usa ka bata ug ang pamilya sa bata sa pagbisita sa bag-o nga bata diha sa inyong ward o branch.

• Paghangyo og usa ka bata sa paggunit og usa ka litrato.

• Paghangyo og usa ka bata sa paghimo og yano nga drowing ginamit ang chalk nga haum sa inyong leksyon.

• Paghangyo og pinili nga mga sakop sa klase sa paghimo og mga aksyon sa usa ka bag-o nga kanta nga ilang gitun-an.

• Pagtabang og 11 anyos sa pagplano og adlaw nga kalihokan sa Primary. Kini makatabang sa bata nga makompleto ang kinahanglanon sa Hugot nga Pagtuo diha sa Dios.

Bisan unsa ka dako o gamay ang ilang responsibilidad, hinumdumi sa pagpasalamat sa mga bata sa ilang pagserbisyo.

Nalingaw ako nga nakigtrabaho uban sa mga bata samtang sila nakakat-on sa pagserbisyo. Magantihon ang pagtan-aw kanila nga molambo ug mogamit og mga kahanas diha sa mga programa sa Young Men ug Young Women nga ilang nasugdan sa pagpalambo diha sa Primary.