Mga Leksyon gikan sa Aquarium

Usa ka sakop sa bishopric nasayud nga ang akong nwebe anyos nga anak nga babaye nagbaton og aquarium ug usa ka adlaw niana mihangyo kon mahimo ba nga dugangan pa ang iyang mga isda. Ang iyang pamilya padulong mobakasyon ug gikinahanglan nga habwaan ang ilang aquarium. Ang tanyag diha-diha dayon gidawat, ug sa kalipay sa akong anak nga babaye, usa ka mabdos nga bayeng guppy nga isda nauban diha sa pundok.

Sa pagpauli sa panimalay gikan sa simbahan usa ka hapon, ang akong anak nga babaye mihimo sa iyang naandan nga pagsuta sa aquarium sa pagtan-aw kon ang matag isda malipayon ug himsog ba. Sa iyang katingala, iyang nakita ang upat ka gagmay kaayo, bag-ong natawo nga isda. Ang inahan nga isda nga guppy misugod sa pagpanganak. Naglihok og dali, iyang gibalhin ang bag-ong natawo ngadto sa dili kuyaw nga kahon nga mopanalipod kanila gikan sa mas dagko ug mas isog nga isda. Sa tanan nga kahinam, bisan pa niana, ang usa ka gamayng guppy nga isda nawala. Naghilak sa kasubo, nakit-an sa akong anak nga babaye kini nga napiit taliwala sa gagmayng mga bato sulod sa aquarium. Gisulayan niya sa pagkandos kini ngadto sa iyang sibot aron ibutang sa dili peligro nga kabalhinan, apan dili siya makatandog sa gamay kaayo nga isda nga guppy nga dili kini masakitan.

Ang tanan nga mga gagmayng isda nga guppy nadakpan, ug bisan ang dili peligro nga kabalhinan nga kahon napuno sa mga dinosinang bag-o nga mga natawo, ang pagtagad sa akong anak nga babaye sa gihapon tininuod nga gipunting ngadto sa usa nga nahulog taliwala sa mga bato. Milingkod siya nga andam sa pagtabang niini ngadto sa kahon diha dayon kon kini molihok na. Mibalibad gani siya og panihapon samtang siya milingkod nga mabinantayon diha sa iyang aquarium sulod sa upat ka oras.

Nagtan-aw kaniya mipasantop kanako ang pamilyar ug malumong mga butang. Akong gihunahuna ang Maayong Magbalantay, kinsa mibiya sa iyang kasiyaman ug siyam aron sa pagpangita alang sa usa kinsa nawala (tan-awa sa Lucas 15:3–8; Juan 10:11–14). Tanan kanato nasayud kon unsa ang bation nga mawala o mag-antus o masakit sa espirituhanon nga paagi. Apan ang atong Manluluwas dili gayud mobiya kanato. Anaa siya sa kanunay uban ang gibukhad nga mga bukton, andam sa pagluwas kanato, sa paglig-on kanato, ug sa pagpanalangin kanato.

Bisan kita dili sa kanunay makaamgo niini, ang atong Langitnong Amahan ug ang atong Manluluwas, si Jesukristo, sa kaaghup ug sa hingpit nagbantay kanato gabii ug adlaw, sa dakong kabalaka mahitungod sa atong kaayohan ug sa mga dalan nga atong pilion nga laktan. Uban sa gugma nga walay kinutuban, Sila mipadala sa Ilang mga anghel sa pagbantay kanato, naghulat kanato sa pagtigum og igo nga kalig-on ug hugot nga pagtuo sa pagpangita og kasiguroan ug kalinaw diha sa Ilang mga bukton.

Wala madugay nianang adlawa ang kabalaka sa akong anak nga babaye alang niana nga isda nga guppy nabayaran. Human sa iyang dugay, kapoy nga mga oras sa paghulat ug sa paglaum, ang gamay kaayo nga isda sa katapusan mikisikisi ug dayon sa hinay milangoy pagawas sa mga bato. Mabinantayon niyang gibutang kini diha sa kahamugaway ug sa seguridad sa dili kuyaw nga kahon. Kana igo nga saksi alang kanako sa maantusong gahum sa gugma.