Paggamit sa mga Miting sa Relief Society sa Pagtudlo ug Pagdasig
Ang dinasig nga mga kapangulohan sa Relief Society ug mga priesthood lider mogamit sa mga miting sa Relief Society sa pagtuman sa mga katuyoan ug buluhaton sa Relief Society.
Ang mga sister gikan sa tibuok kalibutan nakakita nga ang mga miting sa Relief Society makatabang sa pagtudlo sa mga kababayen-an nga Santos sa Ulahing mga Adlaw ug mopaapil kanila sa buluhaton sa kaluwasan sa Ginoo.
Sa Pilipinas, ang mga lider sa Relief Society gusto nga mosuporta sa Kapangulohan sa Area sa ilang tinguha nga ang mga miyembro maandam sa pagtambong sa Templo sa Cebu Philippines human kini ipahinungod. Sila mihisgut og mga ideya uban sa ilang bishop. Isip resulta, sila mihimo og dugang mga miting sa Relief Society sa pagpangandam sa templo, pagsinina og tarung, ug sa mga panalangin sa pagbayad og ikapulo.
Sa Siyudad sa Mexico, diin ang pagbaha kanunay nga mahitabo panahon sa kusog kaayo nga mga unos, ang mga lider sa Relief Society miorganisar og mga proyekto sa pagtabang sa mga sister ug sa ilang mga pamilya sa pag-andam sa ilang mga balay diha-diha dayon. Sa laing ward nga adunay 20 ka biyuda, ang mga lider sa Relief Society miorganisar og miting sa pagtabang og suporta ug paglig-on niadto nga mga sister.
Sa California, USA, usa ka presidente sa Relief Society migamit sa nagpadayong mga klase sa pagkaginikanan sa paglig-on ug pagtudlo sa batan-ong mga inahan. Sila karon misugod niining mga klase sa Spanish.
Sa Moscow, Russia, ang mga sister sa usa ka Relief Society gusto nga mopokus sa pagpalig-on sa ilang mga pamilya ug mga panimalay pinaagi sa pagkat-on sa sukaranang mga kahanas sa homemaking. Sila misugod og mga klase sa pagpangluto, pagpanahi, ug paghimo sa ilang mga panimalay nga mas nindot.
Ang mga kasinatian sama niini miabut isip resulta sa mga lider sa Relief Society nga nag-implementar sa bag-ong palisiya alang sa mga miting sa Relief Society, nga gianunsyo panahon sa kinatibuk-ang miting sa Relief Society niadtong Septyembre 26, 2009.1
Pagtambayayong
Ang Relief Society mao ang labing dako nga organisasyon sa kababayen-an sa kalibutan. Ang katinuod nga kini nagtrabaho ubos sa direksyon sa priesthood nakahimo niini nga wala gayuy kaparehas. Kini nagtugot sa atong tibuok kalibutan nga Relief Society sa pagtrabaho sa tanang mga kultura.
Ang matag bishop o presidente sa branch adunay responisbilidad alang sa iyang piho nga unit. Ang presidente sa Relief Society gitawag sa pagtabang og usa ka bishop o presidente sa branch. Ang matag lider sa priesthood ug miyembro sa kapangulohan sa Relief Society gi-set apart ug gipanalanginan sa pagdawat og inspirasyon alang sa iyang piho nga mga responsibilidad—ug dili para sa bisan asa nga ward o branch o grupo sa mga sister sa Relief Society. Isip resulta, ang tanang mga Relief Society—maanaa man sa Chile, Hong Kong, Ghana, o bisan asa—matag usa makaplano unsa ang piho nga gikinahanglan sa mga sister.
Ang mosunod mao ang mga ehemplo giunsa sa mga presidente sa Relief Society sa pagpakig-alayon uban sa ilang mga bishop:
Ang kapangulohan sa Relief Society sa Pleasant Grove, Utah, nakigkita sa ilang bishop sa paghisgot sa mga tumong sa ward sa wala pa magplano sa ilang mga klase sa Relief Society. Basi niadto nga mga tumong, ang mga lider sa Relief Society miplano og miting diin ang usa ka sister mipakigbahin giunsa niya sa paggamit ang Isangyaw ang Akong Ebanghelyo sa family home evening. Sila usab mihan-ay og pipila ka mga workshop sa paghardin, lakip kon unsaon sa pagtipig og pagkaon nga gikan sa hardin. Sa mga miting sa kapangulohan uban sa bishop, ang presidente sa Relief Society miingon, “Among gibati ang gugma sa among bishop, nasayud nga siya nag-ampo sa Ginoo alang sa amoa.
Usa ka presidente sa Relief Society sa Lehi, Utah, naggamit sa impormasyon gikan sa reliefsociety.lds.org, mitanyag og unom ka bulan nga mga miting ngadto sa bishop. Siya miingon, “Giawhag nako ang akong magtatambag sa pagbansay sa among Relief Society meeting coordinator sa pagpokus sa mga katuyoan sa Relief Society samtang sila magplano sa among mga klase matag bulan. Dihang sila nakighimamat sa mga miyembro sa komite sa Relief Society, sila mihangyo kanila sa pag-ampo kon unsaon namo sa paggamit ang mga katuyoan sa Relief Society sa pagtabang og kab-ot sa mga kinahanglanon sa among ward. Ang komite mibalik uban sa daghang mga ideya. Dayon uban sa panghunahuna ug pagtugot sa bishop, among gihuman ang among mga plano.”
Pag-ampo alang sa Pagdasig
Ang mga presidente sa Relief Society kinsa mangluhod ug mangayo sa Langitnong Amahan sa pagsulti kanila unsa ang ilang angay nga makat-unan makaangkon og pagpadayag nga ibu-bu gikan sa langit ngadto kanila uban sa kanindot ug detalye. Usa ka presidente sa Relief Society miingon, “Ang Ginoo nasayud sa mga kasingkasing ug mga hunahuna sa matag usa sa atong mga sister. Siya nasayud sa ilang mga panlimbasug ug mga kasakit, sa ilang mga hingpit nga kalipay ug sa ilang mga kasubo. Ug Siya lamang ang tinuod nga nasayud unsa ang labing maayo nga ikatabang kanila. Busa, ang atong solusyon mao ang pagpangayo uban sa hugot nga pagtuo alang sa paggiya.”
Ang katuyoan sa Relief Society modala og bag-ong kalig-on alang sa mga lider sa Relief Society, sa mga sister, ug sa ilang mga pamilya. Ang mga miting sa Relief Society mao ang dapit diin ang mga sister matudloan ug madasig sa mga pamaagi nga makab-ot nila ang ilang mga panginahanglan ug, sa katapusan, sa mga panginahanglan sa ward o branch.
Litrato ni Julie B. Beck © Busath.com; mga paghuglagway sa litrato pinaagi ni CHRISTINA SMITH
Photo illustrations by Israel antunes