Natawo ako ngadto sa Ang Simbahan ni Jesukristo sa mga Santos sa Ulahing mga Adlaw, diin ako mapasalamaton kaayo. Pinaagi sa Simbahan nakakat-on ako og daghan kaayo mahitungod sa Langitnong Amahan, ni Jesukristo, ug sa Espiritu Santo. Si Jesukristo mao ang akong gamhanan nga ehemplo. Nasayud ako nga Siya nahigugma kanatong tanan.

Ang akong pagpamatuod nalig-on diha sa akong bunyag. Nasinati ko gayud ang Espiritu Santo. Ang Espiritu Santo nagtabang kanako sa pagpili sa matarung.

Si Joseph Smith usa ka propeta, ingon man ang tanan nga mga propeta kinsa nag-una ug nagsunod kaniya. Ang Basahon ni Mormon ug ang Biblia mga tinuod.

Lukas D., edad 11, Germany

Kausa nagdula ako og basketball uban sa mga kauban sa klase sa eskwelahan, ug usa sa mga batang lalaki migamit sa basketball sa pag-igo sa lain nga kauban sa klase. Misulay ako sa pagpahunong kaniya ug sa pagtabang kaniya sa pagsabut nga ang iyang kinaiya sayop, apan wala siya maminaw kanako.

Wala madugay ang akong bishop mihangyo kanako sa paghatag og pakigpulong diha sa simbahan mahitungod sa hiyas. Wala ako makahibalo kon unsa ang hiyas ug kon ako aduna ba niini o wala. Dayon ang akong inahan mipahinumdom kanako nga tungod kay ako misulay sa pagkamaghuhusay sa akong mga higala sa eskwelahan ug misulay sa pagtabang sa huyang, ako may kinaiyang hiyas.

David S., edad 10, Taiwan

Sa diha nga si Presidente Monson mihangyo kanato sa paghatag og serbisyo ngadto sa uban, mihatag ako og usa ka parisan sa akong paborito nga mga sandal ngadto sa usa ka timawa kaayo nga gamayng bata nga babaye. Nanghinaut ako sa pagtabang kaniya sa ubang daghan nga mga butang.

Thayane S., edad 10, Brazil