Si Iñaki Makauli Pa Ba Sa Panimalay?

Human lamang sa 23 ka semana nga pagsabak, ang among ikatulo nga anak nga lalaki, si Iñaki, natawo pinaagi sa emergency cesarean section. Siya may gibug-aton nga 1 ka libra, 4 ka ounce (560 g) ug may gidak-on nga 12.2 ka pulgadas (31 cm).

Tungod kay ang among anak nga lalaki kulang pa kaayo sa bulan, walay igong kahigayunan nga siya mabuhi. Ang mga doktor nangutana kanamo kon gusto ba gayud namo og mga doktor aron sa pagtabang kaniya, nga makapalangan sa dili mapugngan nga kamatayon. Gitubag nako siya nga kutob siya buhi, kinahanglan nato siyang hatagan og higayon. Dayon mihangyo ko sa Dios og usa ka milagro.

Si Iñaki nakadawat og panalangin sa maayong panglawas sa unang gabii. Atol sa sunod upat ka taas nga mga bulan, siya miantus og buslot sa iyang mga tinai, pagdugo sa utok, ug problema sa baga. Tungod sa iyang mga sirkumstansya, kami midawat og pagtugot sa paghatag kaniya og pangalan ug panalangin didto sa ospital.

Sa tibuok niini nga proseso, kami nakigkita sa ubang mga ginikanan kinsa nag-antus sama kanamo, ug kami mitanyag sa usag usa og suporta ug paghupay. Kami mipakigbahin usab sa among mga pagpamatuod sa ebanghelyo sa tanan kutob sa among mahimo.

Usa ka adlaw kami nakadawat og tawag sa pag-adto sa ospital aron sa pagpanamilit sa among anak nga lalaki, kinsa wala na laumi nga mabuhi pa niana nga tibuok hapon. Sa dihang kami miabut, amo siyang gikugos ug miistorya kaniya. Ang pagtan-aw kaniya sa iyang luya nga kondisyon sakit gayud kaayo. Sa unang higayon, ang akong bana ug ako nakaamgo nga kami temporaryo lamang nga mga tigbantay alang niining anak sa Dios. Ang mahimo lamang namo sa pagtabang kaniya mao ang pag-ampo ug paghangyo sa Langitnong Amahan nga ang Iyang kabubut-on mao ang matuman. Si Iñaki mipadayon sa kinabuhi nianang hapona, ug kami mapasalamaton nga siya nagpadayon sa pagbuhat sa ingon sa mga adlaw nga misunod.

Atol sa upat ka bulan si Iñaki migahin sa neonatal intensive-care unit, kami balik-balik nga nakakita sa gahum sa priesthood nga naglihok samtang ang Langitnong Amahan mipanalangin sa among anak nga lalaki pinaagi sa mga kamot sa mga doktor ug mga tighupot sa priesthood—sa kaulahian nag-ayo kaniya, nga nakapatingala sa mga doktor.

Niadtong Oktubre 2008, si Iñaki miabut na sa panimalay.

Kami nakakat-on og daghang mga butang isip usa ka pamilya pinaagi niini nga kasinatian. Kami nasayud nga ang Langitnong Amahan nahigugma kanamo ug nga Siya nagbuhat og mga milagro ug nagpreserba sa Iyang mga Santos bisan sa mga pagsulay nga kita kinahanglang molahutay. Ug kami mas nakasabut sa katuyoan sa mahangturong mga pamilya, ang importante nga bahin [role] nga ilang gihimo niana nga plano sa kalipay, ug unsa kamanggihatagon ang atong Langitnong Amahan uban sa Iyang mga anak.

Karon kami lahi na nga pamilya, mas nagkahiusa ug mas nakahibalo sa mga pag-antus ug panginahanglan niadtong nagpalibut kanamo—kining tanan tungod sa among anak nga lalaki ug sa milagro nga iyang gidala sa among kinabuhi.