Ang Ebanghelyo Isangyaw ngadto sa Tibuok Kalibutan

Sa dihang si Jesukristo mipuyo dinhi sa yuta, Siya mitudlo sa uban og pamaagi sa pagpuyo nga modala kanila sa kalipay niining kinabuhia ug sa sunod. Ang iyang mensahe mao ang kalinaw, gugma, ug pagkamasulundon ngadto sa mga sugo sa Dios. “Siya miadto sa mga kalungsuran ug kabalangayan, nga nagwali ug nagsangyaw sa maayong balita mahitungod sa gingharian sa Dios” (Lucas 8:1). Siya nagtudlo usab niadtong mga ordinansa, sama sa bunyag, mga kinahanglanon kanato aron kita makabalik ngadto sa atong Langitnong Amahan (tan-awa sa Juan 3:5).

Siya miingon sa Iyang mga disipulo nga ang “maayong balita mahitungod sa gingharian igawali ngadto sa tibuok nga kalibutan” (Mateo 24:14). Busa, Iya silang gipadala “aron sa pagwali” (Marcos 3:14). Kini sama gihapon nga buluhaton nga Iyang gihatag kanato karon—sa pagpakigbahin sa Iyang ebanghelyo sa uban. Niadtong 1831 Siya mipadayag pinaagi ni Propetang Joseph Smith, “Kini nga ebanghelyo isangyaw ngadto sa matag kanasuran, ug kaliwatan, ug pinulongan, ug katawhan” (D&P 133:37).

Kita makatan-aw sa atong Manluluwas isip ehemplo unsaon sa pagpakigbahin sa ebanghelyo. Klaro ang Iyang pagtudlo sa ebanghelyo (tan-awa sa Mateo 5–7). Siya mipahimulos sa yano nga wala planoha nga mga higayon sa pagpakigbahin sa ebanghelyo (tan-awa sa Juan 4:4–42). Ug Siya mipakita og matinuorong gugma ug pagpakabana alang sa uban (tan-awa sa 3 Nephi 17). Kita makabuhat sa ingon.

Si Jesukristo nagdapit sa tanang katawhan sa pagduol ngadto Kaniya. Kita makatabang sa mga tawo sa pagduol ngadto Kaniya pinaagi sa pagpakigbahin sa Iyang ebanghelyo uban kanila. Ania ang pipila ka mga pamaagi sa pagbuhat sa ingon:

Magpakita sa atong hingpit nga kalipay samtang kita nagsunod sa ebanghelyo ni Jesukristo.
Magmahigalaon sa tanang tawo.
Magdapit og mga higala ngadto sa mga miting sa Simbahan, mga kalihokan, ug mga proyekto sa pagserbisyo.
Mopakigbahin og mga kopya sa Basahon ni Mormon o sa Liahona ngadto sa dili sama nato og tinuohan.
Mogamit sa Internet sa pagpakigbahin sa ebanghelyo. Sama pananglit, kita mahimong mopakigbahin sa atong mga pagpamatuod sa usa ka blog o mo-refer sa mga tawo ngadto sa mga Web site sa Simbahan sama sa Mormon.org.
Mangandam isip batan-ong mga lalaki, batan-ong mga babaye, ug mga senior sa pagserbisyo og misyon.
Magdapit og mga higala ug mga silingan aron matudloan sa mga misyonaryo.