Panihapon—usa ka Panahon sa Pagkat-on

Himoa ang panihapon ngadto sa usa ka panahon sa pagkat-on. Ang inyo lamang buhaton mao ang kanunay nga magbutang og pipila ka daling magamit nga mga aytem sa kurikulum sa Simbahan diha sa lamesa nga kan-anan. Sa among balay kami kanunay naggamit og mga materyal nga makatudlo sa among mga anak. Sama pananglit, kami mi-refer sa giya nga basahon nga Hugot nga Pagtuo diha sa Dios alang sa mga Batang Babaye, ang booklet nga Personal nga Kauswagan sa Young Women, ug ang pamphlet nga Alang sa Kalig-on sa mga Kabatan-onan. Siyempre, kami kanunay usab nga nagbutang og mga kasulatan sa duol.

Usahay kami mobasa og pipila ka mga paragrap ug maghisgut niini. Usahay kami motan-aw sa mga pakisayran sa kasulatan. Among namemorya gani ang ikalima nga artikulo sa hugot nga pagtuo ug nakahisgut sa kahulugan niini samtang kami nangaon.

Usahay kon kamo mobutang niining biswal nga mga pahinumdom diha sa lamesa, mas sayon sa paghinumdom kon unsa ka importante ang pagpakaon sa atong kaugalingon sa espirituhanon nga paagi ug ingon man usab sa pisikal nga paagi.