Ang Pulpito sa Conference Center

Ang pulpito sa Conference Center adunay talagsaon nga istorya. Ang mosunod mao ang panghitabo ni Presidente Gordon B. Hinckley:

“Ganahan kaayo ko og mga kahoy. Sa dihang bata pa ko panahon sa ting-init kami mipuyo sa usa ka umahan, usa ka prutasan. Matag tuig niini nga panahon kami mananom og mga kahoy. Sa akong hunahuna wala pa gayud ako mapakyas sa tingpamulak sukad nga ako naminyo, gawas lamang sa duha o tulo ka mga tuig sa dihang ako wala sa siyudad, nga wala ako makatanom og mga kahoy. …

“Mga 36 ka tuig ang milabay mitanom ako og itom nga walnut [kahoy]. Diha kini sa daghang kahoy nga dapit diin kini mitubo nga tul-id ug taas aron makakuha og hayag sa adlaw. Sa miaging tuig, sa pipila ka rason kini namatay. Apan ang walnut usa ka talagsaon nga kahoy alang sa kasangkapan [furniture]. Gitawagan nako si Brother Ben Banks sa Seventy, kinsa, kaniadto sa wala pa mihatag sa iyang tibuok oras sa Simbahan, anaa sa negosyo sa panglaras og kahoy. Iyang gidala ang iyang duha ka anak nga lalaki aron sa pagtan-aw sa kahoy, ang usa bishop ug ang lain bag-ohay lang na-release sa pagka bishop ug mao karon ang nagpadagan sa negosyo. Gikan sa tanan sila makasulti nga kini lig-on, maayo, ug nindot nga kahoy. Usa kanila misugyot nga kini makahimo og pulpito alang niini nga hawanan. Ang ideya nakapahinam kanako. Ang kahoy giputol ug gigabas ngadto sa duha ka bug-at nga mga troso. Dayon misunod ang taas nga proseso sa pagpauga, una sa natural nga paagi ug dayon gipauga sa hudnohan [kiln drying]. Ang mga troso giputol aron himoong mga tabla sa usa ka gabsanan sa Salem, Utah. Ang mga tabla gidala ngadto sa planta ni Fetzer nga himoanan og kagamitan gikan sa kahoy, diin ang hanas nga mga trabahante midesinyo ug mitukod niining talagsaong pulpito gamit kadto nga kahoy.

“Nindot kini sa dihang nahuman. Gusto unta nako nga kamong tanan makatan-aw niini pag-ayo. Kini nagrepresentar sa labing maayo nga pagkabuhat, ug anaa ako dinhi karon namulong kaninyo gikan sa kahoy nga akong gipatubo sa luyo sa akong balay, diin ang akong mga anak midula ug mitubo usab.

“Kini usa ka emosyonal nga butang alang kanako. Nagtanom ako og laing duha pa ka itom nga walnut. Mawala na ako inigka dagko niini. Inig-abut niana nga adlaw ug kining nindot nga pulpito makaraan na, tingali ang usa niini mahimong ipuli. Ngadto kang Elder Banks ug sa iyang anak nga mga lalaki, sila si Ben ug Bradley, ug niadtong hanas nga mga trabahante kinsa midesinyo ug mitukod niini, akong ihalad ang akong mahinuklugon nga pasalamat sa paghimo niini nga posible sa pag-angkon og gamay nakong bahin niining dakong hawanan diin ang mga tingog sa mga propeta molanog sa tibuok kalibutan sa pagpamatuod sa Manluluwas sa katawhan.”