Usa ka adlaw sa diha nga ako mitabang sa paglimpyo sa tibuok balay, akong nakit-an ang kopya sa Isangyaw ang Akong Ebanghelyo sa akong igsoong lalaki nga gikan sa iyang misyon. Nasayud ako nga ang mga misyonaryo migamit niini, apan wala gayud ako motan-aw niini kaniadto. Gisugdan ko kini sa pagbasa ug hapit dili kini maundangan. (Gikinahanglan ko nga mohunong tungod kay aduna pay daghan nga paglimpyo nga buhaton, apan dili ko gusto!)

Sa kanunay ako naghunahuna kon giunsa sa mga misyonaryo sa pagbuhat sa mga butang nga ilang gibuhat. Akong naamguhan nga ang Isangyaw ang Akong Ebanghelyo makatabang kanako nga mas makasabut og maayo sa misyonaryo nga buhat. Kini nakatabang kanako nga mahimong mas maayo mahitungod sa pagduol og mga tawo ug sa pagpakigsulti ngadto kanila ug sa pagpakigbahin sa ebanghelyo sa mas maayong paagi.

2 Nephi 2:13

Kini nga kasulatan nagsaysay nga sa tinuod adunay Dios. Kini nagsaysay nga kon walay sala, niana walay pagkamatarung. Kinahanglan gayud nga adunay oposisyon. Kini usa ka kasulatan nga nagpamatuod sa Dios.

Sa pag-adto nako og youth conference usa ka tuig niana, ako walay ideya kon unsay epekto niini kanako. Kami adunay tulo ka adlaw nga puno sa makalingaw nga mga kalihokan, ug ako naghinam-hinam nga makita ang karaan nga mga higala, ug makahimamat og mga bag-o, ug maapil. Apan ang akong paborito nga bahin mao ang miting sa pagpamatuod. Ang Espiritu gamhanan kaayo samtang kami mihatag sa among mga pagpamatuod sa ebanghelyo, ug daghan kanamo nakahilak. Alang kanako kining nindot nga pagbati milungtad og pipila ka mga adlaw human sa komperensya, ug buot ako nga kini magpabilin. Ako wala gani motan-aw og TV o maminaw og musika nga dili sa Simbahan. Kini nga kasinatian sa tinuod mipalig-on sa akong pagpamatuod sa Simbahan.

Ang Espiritu mao lamang ang paagi alang kanato nga makahibalo nga ang Simbahan tinuod. Kita kinahanglan gayud nga mobuhat og mga butang nga motugot sa Espiritu Santo nga mag-uban kanato, sama sa pagtuon sa mga kasulatan, sa pag-ampo sa kinasingkasing matag adlaw, ug sa paghunahuna sa mga panahon sa diha nga nasinati nato ang Espiritu. Kon kita nagpuyo uban ang Espiritu, kita makasinati sa Iyang kainit ug masayud nga ang Simbahan tinuod. Gihigugma ko ang ebanghelyo; kini adunay mga tubag ug direksyon. Nanghinaut ako nga ang tanan sa kalibutan makahibalo unsay atong nahibaloan.