Kanunay akong naghangyo sa akong dili miyembro nga mga higala sa pagkuyog kanako ngadto sa simbahan. OK ra ba ang pagkuyog kanila ngadto sa simbahan kon sila mohangyo kanako?

Samtang ikaw kinahanglan nga dili gayud mopalta sa imong kaugalingong mga miting sa Simbahan aron lamang sa pag-adto ngadto sa lain nga simbahan kuyog sa usa ka higala, OK ra ang usahay nga pagkuyog sa imong mga higala sa pagtan-aw sa ilang relihiyusong mga serbisyo. Makakuha ka og higayon sa pagkat-on mahitungod sa uban nga mga relihiyon ug unsa ang naghimo sa ato nga lahi. Hinumdumi ang pagmatinahuron sa ilang mga serbisyo sa pag-ampo, sama lamang nga ikaw nanghinaut kanila nga magmatinahuron sa ato.

Ang pagkat-on mahitungod sa relihiyon sa imong higala tingali motugot kanimo sa pagsulti sa mas dayag ngadto kanila mahitungod sa espirituhanong mga hilisgutan. Ang pagsabut unsa ang importante ngadto kanila mahimong makatabang sa pagpasabut unsa ang importante nganha kanimo. Modayeg sila sa imong mga paningkamot sa pagkat-on pa mahitungod kanila ug sa ilang mga tinuohan.

Samtang imong buhaton kini, pagmatngon. Likayi ang pagbuhat og bisan unsa nga butang nga makahimo kanimo nga mobati og kagil-as o makahimo kanimo sa pagduda sa imong mga tinuohan ug mga sumbanan. Sa dili ka pa moadto, pag-ampo nga makabaton sa Espiritu uban kanimo. Dayon pahimusli ang oportunidad sa pagpatubo sa imong kahibalo kalabut sa lain-laing mga relihiyon ug, sa samang panahon, sabta pa ang mahitungod sa imong kaugalingon.