Tabernacle Choir Nagsaulog sa Anibersaryo sa Unang mga Rekording

Usa ka siglo ang milabay niini nga bulan, ang Mormon Tabernacle Choir ug organ unang mirekord sa Tabernacle diha sa Temple Square. Sa pagtimaan sa anibersaryo, ang choir nagpagawas og usa ka set nga may tulo ka cd, 100: Celebrating a Century of Recording Excellence, [100: Nagsaulog sa usa ka Siglo sa Hialabihan ka Talagsaon sa Pagrekord] naglakip sa mga pinili gikan sa 100 ka tuig nga kasaysayan sa pagrekord og musika.

Karon, daghan ang mouyon sa inilang direktor nga si Eugene Ormandy, miingon, “Ang Mormon Tabernacle Choir mao ang labing nindot nga choir sa kalibutan.”¹ Apan sa unang pipila ka mga dekada human nga kini naporma sa tunga-tunga sa ika-19 nga siglo, ang Tabernacle Choir nagpabilin nga wala kaayo maila tungod kay pipila lamang ka tawo sa kalibutan ang nakadungog niini nga nagpasundayag. Dayon niadtong 1909—32 nga mga tuig human sa pag-imbento sa phonograph—ang Columbia Phonograph Company misugod sa pagsulay sa pagrekord sa sa manindot kaayo nga mga musika sa choir ug sa organ. Lisud kini nga buluhaton tungod sa limitadong teknolohiya nianang higayona, nga maayo alang sa soloist apan sa kinatibuk-an napakyas sa paghimo og dekalidad nga mga rekording sa dakong mga grupo.²

Sulod sa tulo ka adlaw sa ulahing bahin sa Agosto ug sa sayong bahin sa Septyembre 1910, si Alexander Hausmann, ang recording engineer kinsa ang nagdumala sa operasyon, mibitay og duha ka taas nga recording horn “gikan sa usa ka pisi nga gibitay gikan sa usa ka balkonahe ngadto sa lain nga balkonahe, ang nagbitay nga mga bells sa duha ka mga horn nagtabon—ang usa anaa sa mga soprano ug mga alto, ug ang usa anaa sa mga tenor ug mga bass.”³

Ang Salt Lake Herald mireport nga si Mr. Hausmann nakahimo og 25 ka mga rekording: 12 ka pinili nga mga kanta sa choir, 10 pinaagi sa organist sa Tabernacle nga si John J. McClellan, 2 pinaagi ni Brother McClellan ug sa violinist nga si Willard E. Weihe, ug ang usa sa kanhi nga organist sa Tabernacle nga si Joseph J. Daynes Sr.⁴

Samtang wala mahibaloi kon pila ka buok ang nahuman nga mga disc nga nahalin gayud o unsa ka layo kini naapud-apod, ang tubag sa publiko positibo. J. A. Vernon, usa ka misyonaryo nga nagserbisyo sa Larned, Kansas, USA, mireport sa usa ka sulat nga giimprinta niadtong Pebrero 1911 Improvement Era: “Kami bag-o lang nakadawat og pipila ka phonograph nga mga rekord nga adunay mga kanta ug mga solo sa Tabernacle Choir ug sa organ. Sa pagkadungog nga kini gipatugtog, ang mga tawo nagpangutana, nga naghatag kanato og daghang oportunidad sa pagpasabut sa mga baruganan sa ebanghelyo.”⁵

Sukad niadtong unang yano nga rekording sa mga sesyon niadtong 1910, ang Tabernacle Choir mipagawas og labaw sa 175 ka mga album, apil ang duha nga nahalin og labaw sa usa ka milyon ang kada usa. Usa sa mga rekording sa choir nakadawat og U.S. Grammy Award niadtong 1959, ug lain pa nga album nakadawat og ka nominasyon sa Grammy niadtong 2007. Mas importante kaysa mga ganti ug mga pasidungog, hinoon, mao ang epekto sa musika sa choir ngadto sa mga tigpaminaw. Bisan tuod ang teknolohiya nausab pag-ayo sa nangaging siglo, ang narekord nga musika sa choir nagpadayon sa pagtandog ug pagdasig, sama sa nabuhat niini niadtong 1910.