សំណួរ និង ចម្លើយ
« មិត្តម្នាក់របស់ខ្ញុំចង់សាកល្បងអ្វីដែលមិនល្អ គ្រាន់តែម្ដងប៉ុណ្ណោះ ដើម្បីនាងអាចយល់ពីរឿងនោះ ពេលមនុស្សនិយាយពីវា ។ តើខ្ញុំអាចជួយនាងយ៉ាងដូចម្ដេច ដើម្បីឲ្យនាងយល់ថា វាមិនមែនជាគំនិតល្អទេ ? »
រឿងដ៏សំខាន់បំផុតមួយដែលអ្នកអាចធ្វើ គឺជួយមិត្តអ្នកឲ្យចងចាំពីមូលហេតុដែលយើងមានព្រះបញ្ញត្តិទាំងឡាយ ។ ព្រះវរបិតាសួគ៌ប្រទានដល់យើងនូវព្រះបញ្ញត្តិទាំងឡាយ ពីព្រោះទ្រង់ស្រឡាញ់យើង ហើយត្រាស់ដឹងថា ព្រះបញ្ញត្តិទាំងនោះនឹងជួយយើងឲ្យរីករាយ និងជួយយើងឲ្យក្លាយដូចជាទ្រង់ ។
នៅក្នុងគម្ពីរសញ្ញាថ្មី ព្រះអង្គសង្គ្រោះបានមានព្រះបន្ទូលថា « បើអ្នករាល់គ្នាស្រឡាញ់ខ្ញុំ ចូរកាន់តាមបញ្ញត្តិរបស់ខ្ញុំចុះ » ( យ៉ូហាន ១៤:១៥ ) ។ សូមជួយមិត្តរបស់អ្នកឲ្យដឹងថា ការជ្រើសរើសអ្វីដែលត្រូវបង្ហាញពីសេចក្ដីស្រឡាញ់របស់យើងចំពោះព្រះវរបិតាសួគ៌ និង ព្រះយេស៊ូវគ្រីស្ទ និង ការដឹងគុណដល់ដង្វាយធួន និង ដំណឹងល្អរបស់ទ្រង់ ។
អ្នកអាចរំឭកនាងផងដែរថា ការធ្វើអ្វីដែលអាក្រក់ដឹកនាំទៅរកផលអាក្រក់ សូម្បីវាតែម្ដងក៏ដោយ ។ យើងមិនអាចធ្វើអំពើបាប ហើយគេចផុតពីផលរបស់វានោះទេ ។ ការមិនគោរពដោយចេតនានូវព្រះបញ្ញត្តិទាំងឡាយ គឺដូចជាការឈានជើងចេញពីព្រះវរបិតាសួគ៌ ហើយទូលទ្រង់ថា ទ្រង់មិនសំខាន់ខ្លាំងដូចជាមិត្តភក្ដិរបស់យើង ឬ មនុស្សដទៃទៀតឡើយ ។
ព្រះវរបិតាសួគ៌ស្រឡាញ់យើង ហើយទ្រង់នឹងប្រទានពរដល់យើងឲ្យមានការដឹកនាំពីព្រះវិញ្ញាណ ពេលយើងរក្សាព្រះបញ្ញត្តិរបស់ទ្រង់ ។ បើយើងគោរពប្រតិបត្តិ នោះព្រះវិញ្ញាណនឹងបង្រៀនយើងច្រើនជាងដែលយើងអាចរៀនដោយការដកពិសោធន៍ជាមួយនឹងអំពើបាប ។
យើងពុំត្រូវការការដកពិសោធន៍ទេ
ខ្ញុំនឹងបង្រៀនមិត្តរបស់អ្នកថា « អ្វីក៏ដោយដែលល្អចេញមកពីព្រះ ហើយអ្វីក៏ដោយដែលអាក្រក់ចេញមកពីអារក្ស » ( អាលម៉ា ៥:៤០ ) ។ ខ្ញុំក៏នឹងពន្យល់ផងដែរថា ទង្វើគ្រប់យ៉ាងមានផលរបស់វា ហើយថាយើងមិនគប្បីធ្វើអ្វីៗដែលអាចធ្វើឲ្យអន្តរាយដល់យើងនោះទេ ។ យើងពុំចាំបាច់ដកពិសោធន៍ការណ៍អាក្រក់នោះទេ ។ មាននូវការណ៍អាក្រក់ច្រើនហួសហើយនៅជុំវិញខ្លួនយើង ហើយវាងាយស្រួលនឹងឃើញណាស់ថា មនុស្សជាច្រើនបានរស់នៅក្នុងទុក្ខវេទនា ពីព្រោះពួកគេពុំរក្សាព្រះបញ្ញត្តិទាំងឡាយទេ ។
វីនីសូស អេស អាយុ ១៧ ឆ្នាំ ទីក្រុង សៅ ប៉ូឡូ ប្រទេស ប្រស៊ីល
ប្រាប់ពីរបៀបដើម្បីយកឈ្នះការល្បួង
សូមប្រាប់មិត្តរបស់អ្នកថា អ្វីដែលសំខាន់បំផុតនោះគឺការឈររបស់នាងចំពោះព្រះភ័ក្ត្រព្រះ ។ យើងមិនត្រូវលះបង់សេចក្ដីសង្គ្រោះដ៏អស់កល្បជានិច្ចរបស់យើង ជាថ្នូរនឹងបទពិសោធន៍ខាងលោកិយនៅទេ ។ ហើយអ្នកនឹងកាន់តែជួយដល់មិត្តអ្នក ប្រសិនបើអ្នកអាចប្រាប់នាងអំពីរបៀបដែលអ្នកបានយកឈ្នះលើការល្បួង ។
អេមិលី ជី អាយុ ១៩ ឆ្នាំ ផឺតូ រីកូ
យើងមានសក្ដានុពលភាពដ៏ទេវភាព
អ្នកអាចពន្យល់ដោយរាបសាទៅកាន់មិត្តរបស់អ្នកថា ខណៈដែលជម្រើសអាក្រក់មួយអាចហាក់ដូចជាពុំមានអន្តរាយ នោះវាអាចនាំទៅកាន់អំពើបាបដែលកាន់តែធ្ងន់ធ្ងរ ។ អ្នកក៏អាចចែកចាយខគម្ពីរនេះ ៖ « ព្រះអម្ចាស់ពុំអាចទតមើលអំពើបាប សូម្បីតែបន្តិចបន្តួច » ( គ. និង ស. ១:៣១ ) ។ សូមរំឭកមិត្តអ្នកថា សូម្បីតែបទពិសោធន៍នៃអំពីបាបតែមួយ អាចធ្វើឲ្យយើងពុំមានភាពបរិសុទ្ធដើម្បីស្ដាប់សំឡេងនៃព្រះវិញ្ញាណ ។ លើសអ្វីៗទាំងអស់ សូមឲ្យនាងដឹងថា អ្នកស្រឡាញ់នាង ហើយថាការជ្រើសរើសត្រូវ គឺជាផ្នែកនៃសក្ដានុពលភាពដ៏ទេវភាពរបស់នាង ក្នុងនាមជាបុត្រីនៃព្រះ ។
អាឌ្រីអាណា អេហ្វ អាយុ ១៧ ឆ្នាំ រដ្ឋ អារីហ្សូណា ស.រ.អា
គ្រាន់តែម្ដងនឹងឈឺចាប់
គ្រប់ការណ៍អាក្រក់ទាំងអស់ សូម្បីបើអ្នកធ្វើវាតែម្ដង វានឹងធ្វើឲ្យអ្នកចេញឆ្ងាយពីព្រះវិញ្ញាណ ។ ប្រសិនបើព្រះវិញ្ញាណយាងចេញ វានឹងកាន់តែងាយស្រួលសម្រាប់សាតាំងដើម្បីល្បួងអ្នកឲ្យធ្វើការណ៍អាក្រក់កាន់តែច្រើនឡើងៗ ។ អ្នកនឹងត្រូវតែប្រែចិត្តពីអំពើបាបទាំងអស់របស់អ្នក មិនថាអ្នកធ្វើវាច្រើនដងប៉ុណ្ណាទេ ហើយការប្រែចិត្តពីអំពើបាបធ្ងន់ធ្ងរទាំងឡាយ អាចជាដំណើរការដ៏យូរអង្វែង និង ឈឺចាប់ ។
អេមីលី អិល អាយុ ១៤ ឆ្នាំ រដ្ឋ យូថាហ៍ ស.រ.អា
ចូររឹងមាំឡើង
សូមអះអាងសារជាថ្មីដល់នាងថា អ្នកស្រឡាញ់នាង ហើយចង់ជួយនាងឲ្យជ្រើសរើសត្រូវ ។ ខ្ញុំបានដឹងតាមរយៈបទពិសោធន៍ផ្ទាល់ខ្លួនថា យើងមិនចាំបាច់ជ្រើសជម្រើសដូចគ្នាទៅនឹងនរណាម្នាក់ ដើម្បីស្គាល់ពីគេនោះទេ ។ ពេលដែលយើងរស់នៅតាមដំណឹងល្អ នោះព្រះវិញ្ញាណនឹងជួយយើងឲ្យដឹងពីរបៀបដើម្បីស្គាល់មនុស្ស ។ សូមរំឭកមិត្តអ្នកថា នាងត្រូវបន្តរឹងមាំ ដើម្បីនាងអាចជួយអ្នកផ្សេងទៀតឲ្យគោរពព្រះបញ្ញត្តិទាំងឡាយផងដែរ ។ សូមអធិស្ឋានថា អ្នកនឹងអាចជួយ និង បម្រើដល់នាង ។
វេនីណា ភី អាយុ ១៩ ឆ្នាំ ប៊ូណូស អ៊ែរ៉េស ប្រទេស អាហ្សង់ទីន
អ្នកប្រហែលជានឹងមិនអាចបញ្ឈប់បាន
ខ្ញុំនឹងប្រាប់មិត្តខ្ញុំថា កុំសូម្បីតែគិតអំពីវា ។ វាមិនមែនជាគំនិតល្អទេ ក្នុងការធ្វើអ្វីដែលអាក្រក់សូម្បីតែម្ដង ពីព្រោះអ្នកប្រហែលជានឹងមិនអាចបញ្ឈប់វាបាន ពេលអ្នកបានចាប់ផ្ដើមវាហើយ ។ ព្រះវរបិតាសួគ៌បានប្រទានព្រះបញ្ញត្តិដល់យើងដើម្បី ជួយយើងឲ្យមានសុវត្ថិភាព និង សេចក្ដីរីករាយ ។
ដាក់ឡាស ប៊ី អាយុ ១៣ ឆ្នាំ រដ្ឋ កាលីហ្វ័រញ៉ា ស.រ.អា
វាចាប់ផ្ដើមពីតូចមុន
អែលឌើរ ជែហ្វ្រី អ័រ ហូឡិន បានមានប្រសាសន៍ម្ដងថា « ការធ្វើដំណើររាប់ពាន់គីឡូគឺចាប់ផ្ដើមពីមួយជំហាន ដូច្នេះសូមប្រុងប្រយ័ត្នចំពោះការឈានជំហានរបស់អ្នក » ( “Place No More for the Enemy of My Soul,” លីអាហូណា, ខែ ឧសភា ឆ្នាំ ២០១០ ទំព័រ ៤៥ ) ។ ខ្ញុំនឹងជួយមិត្តខ្ញុំឲ្យយល់ថា សាតាំងប្រើប្រាស់ការល្បួងតូចៗដើម្បីនាំយើងឲ្យចាប់ផ្ដើមចុះទៅតាមផ្លូវអាក្រក់ ។ ពេលអ្នកសាកល្បងអ្វីដែលអាក្រក់ សូម្បីតែម្ដង នោះអ្នកអនុញ្ញាតឲ្យសាតាំង និង អ្នកដើរតាមវា ចាប់ផ្ដើមល្បួងអ្នកឲ្យធ្វើវាម្ដងហើយម្ដងទៀត ។
ស៊ីមីឡូនី អេហ្វ អាយុ ១៨ រដ្ឋ យូថាហ៍ ស.រ.អា