ល្បែងផ្គុំរូប ពេលសិក្សាព្រះគម្ពីរ
អ្នកនិពន្ធរស់នៅក្នុងរដ្ឋ យូថាហ៍ ស.រ.អា ។
ដូចជាការដាក់ផ្គុំល្បែងផ្គុំរូបដែរ គ្រប់ពេលដែលអ្នកសិក្សាព្រះគម្ពីរ អ្នកទទួលបានគំហើញកាន់តែធំឡើងៗអំពីសេចក្ដីពិតនៃព្រះ ។
នៅក្នុងខែ កញ្ញា ឆ្នាំ ២០១១ ពួកនិសិត្សនៅសកលវិទ្យាល័យមួយនៅប្រទេសវៀតណាមបានទទួលកំណត់ត្រាពិភពលោកដោយបានដាក់ផ្គុំរូបដែលធំបំផុតលើពិភពលោក ។ មាននិសិត្ស ១,៦០០ នាក់ ចំណាយពេល ១៧ ម៉ោង ដើម្បីផ្គុំបំណែករូបភាព ៥៥១,២៣២ បញ្ចូលគ្នាជារូបមួយ ។
ពួកគេបានបង្កើតរូបផ្គុំមួយដែលមានទំហំ ១៥ ម ២៣ ម ដែលមានរូបភាពផ្កាឈូកដែលមានស្លឹកប្រាំមួយសន្លឹកជាតំណាងឲ្យប្រជាជន ភូមិសាស្ត្រ ប្រវត្តិសាស្ត្រ វប្បធម៌ ការអប់រំ និង សេដ្ឋកិច្ច ។ សូមគិតអំពីវា—បំណែករូបភាពច្រើនជាងកន្លះលានបំណែកចាក់ស្រេះដើម្បីបង្កើតជារូបភាពដ៏ធំមួយ ។ បំណែកនីមួយៗនៃរូបផ្គុំហាក់បីដូចជាមិនសំខាន់ និង មិនគួរឲ្យចាប់អារម្មណ៍ ប៉ុន្តែរូបផ្គុំនោះនឹងមិនបញ្ចប់ឡើយបើបាត់តែបំណែកណាមួយនោះ ។
ព្រះគម្ពីរគឺដូចជារូបផ្គុំដែរ ៖ អ្នកកាន់តែដាក់បំណែករូបភាពចូលគ្នាច្រើនប៉ុណ្ណា នោះអ្នកឃើញសេចក្ដីពិតនៃផែនការនៃព្រះកាន់តែច្បាស់ដែរ ។ ពេលដែលគំហើញរបស់អ្នកអំពីផែនការនោះលូតលាស់ឡើង អ្នកនឹងឃើញថា ព្រះគម្ពីរគឺគួរឲ្យចាប់អារម្មណ៍ និង ទាក់ទងទៅនឹងជីវិតអ្នក ។
នេះគឺជាយោបល់សម្រាប់ការសិក្សាព្រះគម្ពីរមួយចំនួន ដើម្បីជួយអ្នកឲ្យឃើញរូបភាពធំ—និង ឃើញផ្នែកពិស្ដារតូចៗ ។ ពេលដែលអ្នកដាក់បំណែកទាំងនេះបញ្ចូលគ្នា អ្នកនឹងឃើញសេចក្ដីពិតដ៏អស្ចារ្យដែលរង់ចាំអ្នកនៅក្នុងព្រះគម្ពីរ ។
គោលលទ្ធិ ៖ បំណែកធំៗដែលបង្រៀនសេចក្ដីពិតដ៏អស់កល្បជានិច្ច
ព្រះគម្ពីរបង្រៀនពីគោលលទ្ធិ និង គោលការណ៍ទាំងឡាយនៃដំណឹងល្អ ។ « គ្រប់ទាំងបទគម្ពីរគឺជាព្រះទ្រង់បានបញ្ចេញព្រះវិញ្ញាណបណ្តាលឲ្យតែងទេ ក៏មានប្រយោជន៍សម្រាប់ការបង្រៀន ការរំឭកឲ្យដឹងខ្លួន ការប្រដៅដំរង់ និង ការបង្ហាត់ខាងឯសេចក្តីសុចរិត » ( ធីម៉ូថេ ទី២ ៣:១៦ ) ។ ដោយសារយើងអាចត្រូវបានសង្គ្រោះតែតាមរយៈព្រះយេស៊ូវគ្រីស្ទ ( សូមមើល យ៉ូហាន ១៤:៦ ) នោះយើងត្រូវការរៀនអំពីទ្រង់ និង គោលលទ្ធិរបស់ទ្រង់ ។ នោះហើយជាមូលហេតុដែលព្រះអម្ចាស់បានឲ្យយើង « ស្ទង់មើលគម្ពីរ … គឺជាគម្ពីរនោះឯង ដែលធ្វើបន្ទាល់ពីខ្ញុំ » ( យ៉ូហាន ៥:៣៩ ) ។
មនុស្ស ៖ បំណែកដែលមានពណ៌ចំរុះដែលបង្រៀនមេរៀនទាំងឡាយ
មានមនុស្សរាប់រយនាក់នៅក្នុងព្រះគម្ពីរដែលយើងអាចអានអំពីពួកលោក ។ តើនរណាម្នាក់ក្នុងចំណោមពួកលោកដែលអ្នកមានការកោតសរសើរបំផុត ? ប្រហែលអ្នកសំឡឹងទៅអាំម៉ូនសម្រាប់ការគោរពប្រតិបត្តិដ៏អង់អាចក្លាហានរបស់លោកនៅក្នុងគ្រាដ៏គ្រោះថ្នាក់ ។ ឬ ប្រហែលអ្នកគិតអំពីយ៉ូប និង សេចក្ដីជំនឿ និង សេចក្ដីសុចរិតដ៏ឥតងាករេរបស់លោក ។
តើអ្នកធ្លាប់អានអំពីសត្វលាដែលនិយាយទៅកាន់ម្ចាស់វាទេ ( សូមមើល ជនគណនា ២២ ) ? ឬស្ដេចទុច្ចរិតដែលសុខចិត្តលះបង់នគររបស់ទ្រង់ដើម្បីបានការអត់ទោសដែរឬទេ ( សូមមើល អាលម៉ា ២២ ) ? ឬ ស្ត្រីដែលត្រូវបានគេស្គាល់ពេញទាំងទីក្រុងរបស់នាងថាជាស្ត្រីដ៏មានគុណធម៌នោះ ( សូមមើល នាងរស់ ១–៤ ) ?
ក៏មានមនុស្សនៅក្នុងព្រះគម្ពីរដែលមិនគួរឲ្យសរសើរផងដែរ ។ តើអ្នកអាចរៀនអ្វីពីពួកគេ និង ជម្រើសមិនល្អដែលពួកគេបានធ្វើការជ្រើសរើស ?
សូមយកចិត្តទុកដាក់ទៅលើមនុស្សដែលអ្នកអាននៅក្នុងព្រះគម្ពីរ ហើយសួរខ្លួនឯងពីរបៀបដែលអ្នកអាចធ្វើតាមគំរូល្អៗរបស់ពួកគេ និង ចៀសវាងពីកំហុសរបស់ពួកគេ ។ បំណែករូបផ្គុំនៃជីវិតរបស់ពួកគេគឺជាបំណែកមួយចំនួនដែលគួរឲ្យចាប់អារម្មណ៍ និង ចំរុះពណ៌បំផុតក្នុងចំណោមបំណែកទាំងអស់ ។ បទពិសោធន៍របស់ពួកគេគឺជារបៀបដ៏គួរឲ្យចងចាំមួយ ដើម្បីរៀន និង ចងចាំគោលការណ៍ទាំងឡាយនៃដំណឹងល្អ ។
និមិត្តរូប ៖ បំណែកបិទបាំងដែលលាតត្រដាង
ជួនកាលព្រះគម្ពីរប្រើប្រាស់និមិត្តរូបដើម្បីបង្រៀនគោលការណ៍ដំណឹងល្អទាំងឡាយ ។ អ្នកនឹងបាត់បង់បំណែកនៃរូបផ្គុំខ្លះៗហើយ បើអ្នកមើលមិនឃើញមេរៀននិមិត្តរូបនោះ ។ បន្ថែមលើថ្នាក់ទាំងឡាយនៅព្រះវិហារ និង ថ្នាក់សិក្ខាសាលា ជំនួយការសិក្សាទាំងឡាយដូចជា សេចក្ដីណែនាំដល់បទគម្ពីរទាំងឡាយ ឬ សៀវភៅណែនាំការសិក្សាថ្នាក់សិក្ខាសាលា និង ថ្នាក់វិទ្យាស្ថាន អាចជួយអ្នកឲ្យរកឃើញបំណែកដែលបាត់បង់ទាំងនោះ ។
ឧទាហរណ៍ រឿងមួយអំពីអ័ប្រាហាំ និង អ៊ីសាក ( សូមមើល លោកុប្បត្តិ ២២ ) គឺជារឿងដ៏បំផុតគំនិត ប៉ុន្តែវាមានអត្ថន័យកាន់តែជ្រាលជ្រៅទៅទៀត ពេលអ្នករកឃើញថា វាគឺជានិមិត្តរូបអំពីការបូជារបស់ព្រះវរបិតាសួគ៌ និង អំពីការលះបង់ដ៏ធួនរបស់ព្រះអង្គសង្គ្រោះសម្រាប់យើង ( សូមមើល យ៉ាកុប ៤:៥ ) ។
ព្រះវិញ្ញាណបរិសុទ្ធ ៖ ការស្វែងរកបំណែកទាំងឡាយដែលភ្ជាប់គ្នា
បំណែករូបផ្គុំមួយចំនួនមើលទៅដូចជាអាចដាក់ផ្គុំជាមួយគ្នាបាន ប៉ុន្តែវាផ្គុំគ្នាមិនបានទេ ។ ព្រះវិញ្ញាណអាចជួយអ្នកឲ្យឃើញថា បំណែកណាមួយដែលពិតជាអាចដាក់ផ្គុំគ្នាបាន ។ ពេលអ្នកសុំជំនួយពីទ្រង់តាមរយៈការអធិស្ឋាន និង ការសញ្ជឹងគិត នោះព្រះវិញ្ញាណនឹងជួយអ្នកឲ្យឃើញពីរបៀបដែលខទាំងឡាយដែលអ្នកបានសិក្សាពីមុន ភ្ជាប់ទៅនឹងអ្វីដែលអ្នកកំពុងសិក្សាឥឡូវនេះ ក៏ដូចជាពីរបៀបដែលការបង្រៀនទាំងនោះភ្ជាប់ទៅនឹងជីវិតអ្នក ។ ជាក់ស្ដែង អ្នកនឹងទទួលការបំផុសគំនិតពីព្រះបន្ទូលទាំងឡាយនៅក្នុងព្រះគម្ពីរ ប៉ុន្តែអ្នកក៏នឹងទទួលការបំផុសគំនិតពីព្រះវិញ្ញាណផងដែរ ពេលដែលអ្នកសញ្ជឹងគិតលើអ្វីដែលអ្នកអាន ។
ការអនុវត្ត ៖ ការដាក់បំណែកទាំងឡាយបញ្ចូលគ្នា
អ្នកនឹងមើលមិនឃើញថាវាជារូបភាពអ្វីនោះទេ បើអ្នកមិនផ្គុំបំណែកទាំងនោះចូលគ្នា ។ ស្រដៀងគ្នានេះដែរ គោលលទ្ធិ គោលការណ៍ និង ព្រះបញ្ញត្តិទាំងឡាយដែលអ្នករៀនចេញពីព្រះគម្ពីរនឹងមិនជួយអ្វីច្រើនដល់អ្នកនោះទេ លើកលែងតែអ្នករស់នៅតាមអ្វីដែលអ្នករៀន ( សូមមើល យ៉ូហាន ៧:១៧ ) ។ ពេលដែលអ្នកព្យាយាមរាល់ថ្ងៃ ដើម្បីរស់នៅតាមគោលការណ៍ទាំងឡាយនៃដំណឹងល្អ ដែលមានបង្រៀននៅក្នុងព្រះគម្ពីរ នោះសេចក្ដីជំនឿ និង ទីបន្ទាល់របស់អ្នកនឹងកាន់តែរឹងមាំឡើងៗ ហើយការសិក្សាព្រះគម្ពីរនឹងក្លាយទៅជាផ្នែកដ៏សំខាន់នៅក្នុងជីវិតអ្នក ។