ការចែកចាយ ដំណឹងល្អ ដូចជា យ៉ូហាន បាទីស្ទ
អ្នកអាចជួយរៀបចំមនុស្សសម្រាប់ការយាងមកជាលើកទីពីររបស់ព្រះអង្គសង្គ្រោះ ដូចជាយ៉ូហាន បាទីស្ទ បានធ្វើសម្រាប់ការយាងមកជាលើកទីមួយរបស់ព្រះអង្គសង្គ្រោះដែរ ។
អ្វីដែលមិនដូចយ៉ូហាន បាទីស្ទ គឺអ្នកនឹងមិនបម្រើបេសកកម្មនៅក្នុង « ទីរហោស្ថានស្រុកយូដា » នោះទេ ( ម៉ាថាយ ៣:១ ) ។ សំលៀកបំពាក់របស់អ្នកមិនត្រូវបានធ្វើឡើងពី « រោមអូដ្ឋ » នោះទេ ( ម៉ាថាយ ៣:៤ ) ។ អ្នកនឹងមិនបរិភោគ « កណ្ដូប និង ទឹកឃ្មុំព្រៃ » នោះទេ ( ម៉ាថាយ ៣:៤ ) ។ ប៉ុន្តែគោលបំណងរបស់អ្នកក្នុងការចែកចាយដំណឹងល្អ គឺដូចគ្នានឹងយ៉ូហាន បាទីស្ទ ដែរ ៖ អ្នករៀបចំមនុស្សសម្រាប់ការយាងមករបស់ព្រះយេស៊ូវ ដោយការប្រកាសថា « ចូរឲ្យប្រែចិត្តចុះ ដ្បិតនគរស្ថានសួគ៌ជិតដល់ហើយ » ( ម៉ាថាយ ៣:២ ) ។
បេសកកម្មរបស់យ៉ូហាន បាទីស្ទ គឺច្បាស់លាស់ ៖ « មកមុនព្រះមេស៊ី ដើម្បីរៀបចំផ្លូវថ្វាយព្រះអម្ចាស់ » ( នីហ្វៃទី១ ១០:៧ ) ។ ប៉ុន្តែបេសកកម្មរបស់លោកគឺមិនងាយស្រួលទេ ។ ព្យាការីពីមុនលោកគឺ ម៉ាឡាគី គឺជាង ៤០០ ឆ្នាំ ពីមុននោះ ។ « ដោយពុំមានព្យាការី នោះប្រជាជននៅក្នុងដែនដីបានចាប់ផ្ដើមបែងចែកទៅជាក្រុមទាំងឡាយ ដោយក្រុមនីមួយៗប្រកាសថាមានសិទ្ធិបកស្រាយព្រះគម្ពីរ និង ដឹកនាំប្រជាជន ។ ការយល់ដឹងដ៏ពិតអំពីព្រះយេហូវ៉ា ត្រូវថមថយក្នុងចំណោមក្រុមទាំងនេះ » ។១
ថ្វីបើមានឧបសគ្គនៅក្នុងជំនាន់របស់យ៉ូហានក្ដី ដ៏ពួកបណ្ដាជនបានចូលទៅក្នុងទីរហោស្ថានដើម្បីស្ដាប់លោកផ្សាយ ហើយលោកបានជ្រមុជទឹកឲ្យមនុស្សជាច្រើន ។ អនាគតសាវកពីនាក់ គឺយ៉ូហានជាទីស្រឡាញ់ និង អនទ្រេ បានស្គាល់ព្រះយេស៊ូវតាមរយៈយ៉ូហាន ( សូមមើល យ៉ូហាន ១:៤០ ) ។
ការចែកចាយដំណឹងល្អនៅសព្វថ្ងៃនេះក៏មានឧបសគ្គដែរ ។ ជីវិតនៅសម័យទំនើបនេះមាននូវការរំខានជាច្រើន ។ ទស្សនវិជ្ជាខាងលោកិយដឹកនាំមនុស្សឲ្យវង្វេង ។ មនុស្សកាន់តែច្រើនឡើងៗ មិនបានរស់នៅតាមបទដ្ឋានខាងសីលធម៌ឲ្យបានខ្ពស់នោះទេ ។ មនុស្សខ្លះពុំបានឃើញពីសេចក្ដីត្រូវការខាងសាសនានោះទេ ។
ក្នុងកាលៈទេសៈទាំងនេះ តើអ្នកអាចមានភាពជោគជ័យក្នុងការចែកចាយដំណឹងល្អដូចជាយ៉ូហាន បាទីស្ទ បានដោយរបៀបណាទៅ ? នេះជាមេរៀនមួយចំនួនចេញពីជីវិតរបស់លោកដែលអាចជួយបាន ។
យ៉ូហានបានដឹងថាបេសកកម្មរបស់លោកជាអ្វី ។ លោកបានដឹងថា លោកត្រូវបានហៅឲ្យជួយមនុស្សមករកព្រះគ្រីស្ទ ( សូមមើល លូកា ១:១៦ ) ។ ពេលលោកបានឃើញព្រះអង្គសង្គ្រោះ យ៉ូហានបានថ្លែងទីបន្ទាល់ថា « នុះន កូនចៀមនៃព្រះ ដែលដោះបាបមនុស្សលោក » ( យ៉ូហាន ១:២៩ ) ។ ជាជាងការលើកទឹកចិត្តប្រជាជនឲ្យដើរតាមលោក នោះយ៉ូហានបានជួយពួកគេឲ្យក្លាយជាសិស្សរបស់ព្រះយេស៊ូវគ្រីស្ទ ។ យ៉ូហានបានមានប្រសាសន៍ពីព្រះអង្គសង្គ្រោះថា « ព្រះអង្គនោះបានចម្រើនឡើង ហើយខ្ញុំត្រូវថយវិញចុះ » ( យ៉ូហាន ៣:៣០ ) ។
យ៉ូហានបានបង្រៀនគោលការណ៍មូលដ្ឋាននៃដំណឹងល្អនៃព្រះយេស៊ូវគ្រីស្ទ ។ លោកបានបង្រៀនប្រជាជនអំពីសេចក្ដីយុត្តិធម៌ សេចក្ដីមេត្តាករុណា ភាពស្មោះត្រង់ សីលធម៌ ការតមអាហារ ការអធិស្ឋាន ការប្រែចិត្ត និង ការសារភាពអំពើបាប បុណ្យជ្រមុជទឹកដោយពន្លិច ដំណើររស់ឡើងវិញ និង ការជំនុំជម្រះ ( សូមមើល ម៉ាថាយ ៣; លូកា ៣ ) ។ ការបង្រៀនរបស់លោកអាចត្រូវបានពិពណ៌នាថាដូចការបង្រៀនរបស់ព្រះអង្គសង្គ្រោះ ៖ « គេនឹកប្លែកក្នុងចិត្តពីសេចក្ដីបង្រៀនរបស់ទ្រង់ ដ្បិតទ្រង់បង្រៀនដូចជាមានអំណាច មិនដូចពួកអាចារ្យទេ » ( ម៉ាកុស ១:២២ ) ។
យ៉ូហានបានរស់នៅខុសពីមនុស្សលោក ។ ព្រះយេស៊ូវបានបង្ហាញពីភាពខុសគ្នារវាងយ៉ូហាន និង គ្រូបង្រៀនខាងលោកិយថា ៖ យ៉ូហានមិនមែនជា « មនុស្សស្លៀកពាក់អាវទន់ភ្លន់ … ស្លៀកពាក់ល្អប្រសើរ … នៅក្នុងដំណាក់ស្ដេចទេ » ( លូកា ៧:២៥ ) ។ លោកមិនផឹក « ស្រាទំពាំងបាយជូរ ឬ គ្រឿងស្រវឹងទេ » ( លូកា ១:១៥ ) ។ យ៉ូហានមាន « សំឡេងនៃមនុស្សម្នាក់កំពុងតែស្រែកនៅទីរហោស្ថានថា ឲ្យរៀបចំផ្លូវទទួលព្រះអម្ចាស់ » ( ម៉ាកុស ១:៣ ) ។ ដោយសារលោកបានបង្រៀនដោយព្រះចេស្ដានៃព្រះ នោះប្រជាជនបានទទួលអារម្មណ៍ពីព្រះវិញ្ញាណ ហើយបានប្រែចិត្តជឿ ។
យ៉ូហានបានមានការលះបង់ខ្ពស់ណាស់ ។ អ្នកប្រាជ្ញម្នាក់បានសង្ខេបពីគុណសម្បត្តិរបស់យ៉ូហានថា ៖ « គោលបំណងតែមួយឥតល្អៀងរបស់លោក ការលះបង់ទាំងស្រុងចំពោះការហៅបម្រើដ៏ពិសេសរបស់លោក និង ភក្ដីភាពដ៏ពេញលេញរបស់លោកចំពោះព្រះរាជបុត្រានៃព្រះ ។ លក្ខណៈទាំងនេះ រួមជាមួយនឹងសិទ្ធិអំណាចបព្វជិតភាពដ៏ទេវភាពរបស់លោក បុគ្គលិកលក្ខណៈដែលមិនចេះភ័យខ្លាចរបស់លោក និង សេចក្ដីសុចរិតផ្ទាល់ខ្លួនរបស់លោក ធ្វើឲ្យលោកក្លាយជាតួអង្គដ៏ស្ចារ្យបំផុតមួយក្នុងចំណោមតួអង្គទាំងអស់ក្នុងព្រះគម្ពីរ » ។២
ពេលអ្នកសិក្សាពីជីវិតរបស់យ៉ូហាន បាទីស្ទ អ្នកឃើញថា លោកគឺលើសពីគ្រាន់តែជាមនុស្សម្នាក់ដែលមានពរជ័យពិសេសនៃការដែលបានធ្វើបុណ្យជ្រមុជទឹកឲ្យព្រះយេស៊ូវគ្រីស្ទទៅទៀត ។ អ្នកឃើញថា ជីវិត និង បេសកកម្មរបស់លោកគឺអំពីការរៀបចំមនុស្សសម្រាប់ការយាងមករបស់ព្រះអង្គសង្គ្រោះ គឺដូចជាបេសកកម្មរបស់អ្នកដែរ ។