សំឡេងពួកបរិសុទ្ធថ្ងៃចុងក្រោយ
ចូរបង្រៀនពួកគេឲ្យអានព្រះគម្ពីរមរមន
អ៊ីមីលៀន រីអូស ហ្គូប៊េក កាណាដា
អំឡុងពេលបម្រើរបស់យើងនៅក្នុងបេសកកម្ម ជេនីវ៉ា ស្វ៊ីស ខ្ញុំត្រូវ បានហៅ ហើយញែកចេញធ្វើជាប្រធានសាខា ហើយភរិយារបស់ខ្ញុំត្រូវបានហៅជាប្រធានសមាគមសង្គ្រោះ ។ ដោយធ្វើការជាមួយគ្នាអស់ពីកម្លាំងរបស់យើង ដើម្បីដោះស្រាយការលំបាកនៅក្នុងសាខា ។ ទោះបីជាសាខានេះបានរៀបចំនៅក្នុងទសវត្សរ៍ឆ្នាំ ១៩៦០ ក៏សាខានេះពុំឃើញមានពិធីបុណ្យជ្រមុជទឹកអស់ជាច្រើនឆ្នាំ ហើយក៏ពុំបានបញ្ជូនអ្នកផ្សព្វផ្សាយសាសនាណាទៅបេសកកម្មឡើយអស់រយៈពេល ១៥ឆ្នាំ ។
វាសរបញ្ជាក់ឲ្យឃើញថា យើងត្រូវការជំនួយរបស់ព្រះអម្ចាស់ដើម្បីស្វែងរកដំណោះស្រាយចំពោះបញ្ហាលំបាកលំបិនជាច្រើនដែលសាខាបានជួប ។ បន្ទាប់ពីខ្ញុំបានអធិស្ឋានអំពីឧបសគ្គនានារបស់សាខា នោះព្រះវិញ្ញាណនៃព្រះអម្ចាស់បានមានបន្ទូលមកខ្ញុំថា « ចូរបង្រៀនសមាជិកឲ្យអានព្រះគម្ពីរមរមន ហើយអ្នកនឹងមានជោគជ័យ » ។
ភ្លាមនោះយើងបានធ្វើផែនការដើម្បីតាំងចិត្តសមាជិកទាំងអស់ឲ្យចាប់ផ្តើមអានព្រះគម្ពីរមរមន ។
លទ្ធផលដែលទទួលបានគឺអស្ចារ្យណាស់ ។ ភាពសុខសាន្ត និង ព្រះវិញ្ញាណបានត្រឡប់មកកាន់សាខាវិញ ។ មានគ្រួសារថ្មីៗបានចូលរួមសាសនាចក្រ ។ ដោយបានជំរុញពីបំណងរបស់ខ្លួនដើម្បីបម្រើ នោះយុវជនម្នាក់បានចេញបម្រើបេសកកម្ម ។ អ្នករៀបអាពាហ៍ពិពាហ៍ដែលមានបញ្ហាមួយចំនួនត្រូវបានពង្រឹង ហើយគ្រួសារប្រែកាន់តែស្និទ្ធស្នាលនឹងគ្នា ។ សាខានេះបន្ដរីកចម្រើនមកដល់សព្វថ្ងៃនេះ ។
យើង និង សមាជិកសាខាបានធ្វើជាសាក្សីចំពោះខ្លួនយើង នូវព្រះចេស្តាដ៏មានអព្ភូតហេតុនៃព្រះគម្ពីរមរមន ។ វាពិតជាសិលាគន្លឹះនៃសាសនារបស់យើង និង ពីទីបន្ទាល់របស់យើងអំពីដំណឹងល្អ និង អំពីព្រះយេស៊ូវគ្រីស្ទ ។ យើងស្រឡាញ់វាអស់ពីដួងចិត្តរបស់យើង ។ វាគឺជាប្រភពនៃចំណេះដឹងដែលគ្មានទីបញ្ជប់ និង ពុំប្រែប្រួល ។
បទពិសោធន៍នេះបានបង្រៀនយើងថា ព្រះគម្ពីរមរមនគឺពិតជាមធ្យោបាយដ៏ពិត ដើម្បីជួយបងប្អូនប្រុសស្រីរបស់យើង ឲ្យដកចេញនូវស្រមោលនៃភាពងងឹតខាងវិញ្ញាណដែលគ្របដណ្តប់លើផែនដីនេះ ។ ព្រះគម្ពីរនេះនាំមកនូវភាពសុខសាន្ត ក្តីអំណរ សុភមង្គល ហើយមានបំណងប្រាថ្នាកាន់តែខ្លាំង ដើម្បីធ្វើតាមព្រះអង្គសង្គ្រោះ ព្រះយេស៊ូវគ្រីស្ទ ។