អ្នកយាម នៅលើប៉ម
អ្នកយាម
អ្នកយាមគឺជាឆ្មាំដែលត្រូវបានដាក់នៅកំផែងជញ្ជាំង ឬ លើប៉ម ដើម្បីឃ្លាំចាំមើល និង ព្រមានប្រាប់ទុកជាមុននូវគ្រោះថ្នាក់ដែលនឹងកើតឡើងមកពីចម្ងាយ ។ ពួកគេត្រូវបានជួលឲ្យធ្វើការដើម្បីការពារទីក្រុង ព្រមទាំងចម្ការទំពាំងបាយជូរ ទីវាលនានា ឬ វាលចិញ្ចឹមសត្វ ។
ប្រភេទនៃប៉ម
ប៉មនៅជញ្ជាំងទីក្រុង ជាទូទៅត្រូវបានសង់ឡើងនៅទ្វារច្រកចូល ឬ នៅត្រង់ទ្វារជ្រុងៗ ( សូមមើល របាក្សត្រទី ២ ២៦:៩ ) ។ ទាំងប៉មដែលនៅច្រកទ្វារ និង នៅទ្វារជ្រុងផ្តល់នូវទីតាំងដើម្បីមើលពីគ្រោះថ្នាក់ដែលកើតមានឡើង ហើយការពារការវាយប្រហារពីសត្រូវ ( សូមមើល របាក្សត្រទី ២ ២៦:១៥ ) ។
ប៉មនៅបន្ទាយ ឬ ប្រាសាទ ជាទូទៅជាសំណង់នៅដាច់តែឯងដែលបានសង់លើទីទួលខ្ពស់ ឬ ទីតាំងផ្សេងៗដែលបានរៀបចំ ។ ពេលខ្លះវាគឺជាទីតាំងដែលមានទំហំធំល្មម ធ្វើជាទីជម្រកចុងក្រោយ សម្រាប់ប្រជាជនទូទាំងទីក្រុង នៅពេលដែលពួកគេកំពុងត្រូវបានវាយប្រហារ ( សូមមើល ពួកចៅហ្វាយ ៩:៤៦–៥២ ) ។
ប៉មនៅក្នុងចម្ការទំពាំងបាយជូរ ទីវាល ឬ វាលចិញ្ចឹមសត្វ គឺជាសំណង់តូចៗដែលសង់ឡើង ដើម្បីជួយការពារគ្រាប់ពូជ និង ហ្វូងសត្វពីចោរលួច និង សត្វព្រៃ ( សូមមើល របាក្សត្រទី ២ ២៦:១០; អេសាយ ៥:២; ២៧:៣ ) ។ ជារឿយៗ នៅជាន់ក្រោមនៃប៉មនេះ គឺជាបន្ទប់មួយដើម្បីដាក់សម្ភារផ្សេងៗ ។
អ្នកយាមនៅលើប៉ម ៖
មាននូវការយល់ឃើញដែលខ្ពង់ខ្ពស់ ។ នៅពេលអ្នកបម្រើរបស់ព្រះត្រូវបានហៅ និង ផ្តល់សិទ្ធិអំណាច នោះព្យាការីត្រូវបានញែកចេញពីពិភពលោក ពួកលោកខិតចូលកាន់តែជិតទ្រង់ ហើយពួកលោកត្រូវបានអនុញ្ញាតឲ្យមើលឃើញនូវអ្វីៗជាច្រើនមកពីឋានសួគ៌ ។
មើលឃើញពីអ្វីៗដែលមនុស្សទាំងអស់មើលពុំឃើញ ។ « អ្នកមើលឆុតអាចដឹងអំពីការណ៍ទាំងឡាយដែលកន្លងមកហើយ និង ការណ៍ទាំងឡាយដែលនឹងកើតឡើងនៅពេលខាងមុខផង ហើយដោយសារប្រដាប់បកប្រែទាំងនេះ ទើបគ្រប់ការណ៍ទាំងអស់ត្រូវបានបើកឲ្យឃើញ ឬ និយាយម្យ៉ាងទៀតថា ការណ៍សម្ងាត់ទាំងឡាយនឹងត្រូវបានសម្តែងឲ្យដឹង ហើយការណ៍លាក់កំបាំងទាំងឡាយនឹងត្រូវបានចេញមកឯពន្លឺ ហើយការណ៍ទាំងឡាយដែលគ្មានគេដឹង នោះក៏នឹងត្រូវបានធ្វើឲ្យដឹង ដោយសារវត្ថុទាំងនោះ ហើយការណ៍ទាំងឡាយក៏នឹងត្រូវធ្វើឲ្យដឹងដោយសារវត្ថុទាំងនោះដែរ បើពុំនោះសោតទេ នឹងពុំមាននរណាអាចដឹងបានឡើយ » ( ម៉ូសាយ ៨:១៧ ) ។
មានស្មារតីប្រុងប្រយ័ត្នជាប់ជានិច្ច ។ ព្យាការីមាននូវទំនួលខុសត្រូវយ៉ាងហ្មត់ចត់ដើម្បី ព្រមានយើងពីគ្រោះថ្នាក់ដែលនឹងកើតឡើង ហើយពួកលោកនឹងបន្តធ្វើការណ៍នេះដោយពុំគិតពីមតិ ឬ និន្នាការរបស់សាធារណជននៅក្នុងសង្គមឡើយ ។
ព្រមានអំពីអ្វីៗទាំងអស់ដែលវាពុំទាន់កើតឡើង ។ « ព្យាការីប្រកាសបដិសេធអំពើបាបទាំងស្រុង ហើយទាយទុកជាមុនពីផលវិបាករបស់វា ។ លោកគឺជាអ្នកផ្សាយអំពីសេចក្ដីសុចរិត ។ ម្តងម្កាល ពួកព្យាការីអាចនឹងត្រូវបានបំផុសគំនិតឲ្យទាយទុកជាមុនអំពី អនាគតកាលសម្រាប់ជាប្រយោជន៍ដល់មនុស្សលោក » ( សេចក្ដីណែនាំដល់បទគម្ពីរទាំងឡាយ « ព្យាការី » lds.org/scriptures/gs ) ។
ផ្តល់នូវសុវត្ថិភាព និង ការការពារ ។ តាមរយៈការស្តាប់តាមការព្រមានរបស់ព្យាការី នោះយើងអាចមានសុវត្ថិភាព ហើយចៀសវាងពីគ្រោះថ្នាក់ដែលអាចធ្លាក់មកលើយើង ម្នាក់ៗ ឬ ទាំងអស់គ្នា ប្រសិនបើយើងពុំស្តាប់តាម ។