សំណួរ និង ចម្លើយ
« ខ្ញុំត្រូវបានគេចំអកឲ្យនៅសាលារៀន ដោយសារខ្ញុំជាពួកអិល.ឌី.អេស. ។ ខ្ញុំដឹងថាខ្ញុំត្រូវការពារជំនឿរបស់ខ្ញុំ ប៉ុន្តែវាពិតជាពិបាកណាស់ ! តើខ្ញុំនឹងមានចិត្តក្លាហានគ្រប់គ្រាន់បានដោយរបៀបណា ?
អ្នកគិតត្រូវហើយ ដែលអ្នកត្រូវតែមានចិត្តក្លាហានដើម្បីដោះស្រាយចំពោះស្ថានភាពបែបនេះ ។ បន្ទាប់ពីអ្វីៗទាំងអស់ ព្រះយេស៊ូវគ្រីស្ទបានបញ្ជាថា « ចូរក្រោកឡើង ហើយបញ្ចាំងពន្លឺចេញទៅប្រយោជន៍ឲ្យពន្លឺរបស់អ្នកអាចបានទៅជាបមាណីយដល់សាសន៍នានា » ( គ. និង ស. ១១៥:៥ ) ។ ប៉ុន្តែការមានចិត្តក្លាហានដើម្បីឲ្យពន្លឺរបស់អ្នកបញ្ចាំងចេញទៅ នោះពុំមែនមានន័យថាឲ្យអ្នកនិយាយទាស់នឹងមនុស្សដែលចំអកដល់អ្នកនោះឡើយ ។
ហើយក្នុងករណីនេះ អ្នកអាចឲ្យការប្រឆាំងនេះបំផុសគំនិតអ្នកឲ្យធ្វើបានកាន់តែប្រសើរឡើង ។ នៅពេលអ្នកខិតខំពង្រឹងទីបន្ទាល់របស់អ្នក នោះអ្នកអាចបង្កើននូវភាពក្លាហានមួយបែប ដែលនឹងជួយអ្នកឲ្យហ៊ាននិយាយ ឬ បន្តធ្វើកិច្ចការដែលត្រឹមត្រូវ បើទោះបីជាមនុស្សដទៃចំអកដល់អ្នកក៏ដោយ ។
ការត្រូវបានគេបន្តុះបង្អាប់អាចជាការអាក់អន់ចិត្ត ប៉ុន្តែសូមចាំថា អ្នកអាចអធិស្ឋានទូលសុំឲ្យបានពេញដោយសេចក្តីសប្បុរស ប្រយោជន៍ឲ្យមនុស្សដទៃអាចមានអារម្មណ៍ពី សេចក្តីស្រឡាញ់របស់ព្រះយេស៊ូវគ្រីស្ទតាមរយៈអ្នក ( សូមមើល មរ៉ូណៃ ៧:៤៨ ) ។ ដោយសារគ្រប់ស្ថានភាពទាំងអស់វាផ្សេងៗពីគ្នា នោះចូរសុំនូវការណែនាំពីព្រះវិញ្ញាណបរិសុទ្ធ ដើម្បីដឹងពីរបៀបឆ្លើយតបក្នុងរបៀបមួយដូចជាព្រះគ្រីស្ទនៅក្នុងឧទាហរណ៍និមួយៗ ។
អាស្រ័យលើស្ថានភាពនោះ វាអាចជារឿងដ៏ល្អបំផុតដើម្បីនិយាយដោយផ្ទាល់ជាសម្ងាត់ជាមួយអស់អ្នកដែលបានចំអកដល់អ្នក ឬ គ្រាន់តែកុំខ្វល់ខ្វាយនឹងពាក្យឡកឡឺយដែលមិនសមរម្យនោះ ដោយបន្តរស់នៅតាមជំនឿរបស់អ្នក ។ ប្រសិនបើគ្មាននរណាចាប់អារម្មណ៍ស្តាប់នូវអ្វីដែលអ្នកនិយាយ គំរូនៃសេចក្តីសប្បុរស ការអភ័យទោស និង ភាពស្មោះសររបស់អ្នក អាចជាសារលិខិតដ៏ល្អបំផុតដែលអ្នកអាចផ្តល់ឲ្យបាន ។
សូមបង្ហាញសេចក្តីក្លាហានពិត
អស់អ្នកដែលចំអកដល់អ្នក អាចពុំឈប់ដោយងាយៗឡើយ ដោយសារអ្នកមានភាពក្លាហានគ្រប់គ្រាន់ដើម្បីសុំឲ្យពួកគេឈប់ ប៉ុន្តែពួកគេអាចឈប់នៅពេលអ្នកបញ្ចេញនូវសេចក្តីក្លាហានរបស់ខ្លួន ដោយការរស់នៅតាមអ្វីដែលជាលក្ខណៈរបស់ខ្លួនអ្នក — គឺជាពួកបរិសុទ្ធថ្ងៃចុងក្រោយ ។ មុននឹងអ្នកដឹងពីការណ៍នេះ នោះព្រះវរបិតាសួគ៌នឹងជួយអ្នកនូវអ្វីដែលទ្រង់អនុមតិឲ្យអ្នកធ្វើ ដោយសង្ឃឹមថានឹងបើកភ្នែករបស់ពួកគេ ចំពោះដំណឹងល្អដែលបានស្តារឡើងវិញនៅក្នុងជីវិតរបស់អ្នក ។
ប្រាយ យូ អាយុ ១៧ ឆ្នាំ អ៊ីម៉ូ ស្តេត ប្រទេសនីហ្សេរីយ៉ា
ស្វែងរកកម្លាំងនៅក្នុងមូលដ្ឋានគ្រឹះ
ការអធិស្ឋាន និង ការតមអាហារគឺសំខាន់ ដោយសារកិច្ចការទាំងនេះនឹងជួយអ្នកឲ្យប្រឈមមុខនឹងការនិយាយចំអក កំប្លែង និង ឧបសគ្គនានានៅសាលារៀន គឺដូចជាព្រះយេស៊ូវគ្រីស្ទបានជួបនឹងការចំអកជាច្រើនកាលទ្រង់គង់នៅលើផែនដីនេះដែរ ។ កិច្ចការទាំងនេះនឹងជួយអ្នកបង្កើនសេចក្តីស្រឡាញ់ និង ការអត់ធ្មត់កាន់តែច្រើនចំពោះមនុស្សទូទៅ ។
វ៉លធើរ ស៊ី អាយុ១៥ ឆ្នាំ នៅ ចាអែន ប្រទេស ពេរ៉ូ
ចូរទទួលបានការណែនាំតាមរយៈការអធិស្ឋាន
អស់កាលជាយូរមកហើយ ខ្ញុំគឺជាសមាជិកតែម្នាក់ឯងគត់នៅក្នុងសាលារៀនរបស់ខ្ញុំ ។ មិត្តភក្តិជិតស្និទ្ធបំផុតរបស់ខ្ញុំហាក់បីដូចជាយល់ពីខ្ញុំ ប៉ុន្តែមិត្តភក្តិដទៃទៀតក្នុងសាលារៀនបានចំអកដល់ខ្ញុំ ។ ថ្ងៃមួយខ្ញុំបានអធិស្ឋាន ហើយមានអារម្មណ៍ថា ត្រូវពិភាក្សាជាមួយមនុស្សម្នាក់ដែលបានធ្វើឲ្យមនុស្សដទៃទៀតឲ្យចំអកដល់ខ្ញុំ ។ ខ្ញុំបានពន្យល់ថាខ្ញុំគ្មានអារម្មណ៍ខឹងនឹងគាត់ឡើយ ប៉ុន្តែខ្ញុំបានសុំឲ្យគាត់ផ្តល់នូវការគោរពដែលគាត់ចង់ធ្វើចំពោះខ្ញុំវិញ ។ បន្ទាប់ពីស្តាប់ការសន្ទនារបស់យើង គ្រូបង្រៀនម្នាក់របស់យើងតែងតែនិយាយគាំទ្រខ្ញុំនៅពេលគាត់បានឃើញមានរឿងកើតឡើង ។ ខ្ញុំដឹងថា ព្រះអម្ចាស់នឹងគង់នៅជាមួយអ្នក នៅពេលអ្នកនិយាយជាមួយមនុស្សទាំងនោះ ។
ស្សានែឡា អេស អាយុ ១៤ ឆ្នាំ ផេនហ្គាសីនេន ប្រទេសហ្វីលីពីន
ស្ថាបនាទីបន្ទាល់របស់អ្នក
ដំបូង សូមទទួលឲ្យបានទីបន្ទាល់ដ៏ពិតមួយពីសេចក្តីពិតដែលអ្នកចង់ចែកចាយជាមួយមនុស្សដទៃ ។ បន្ទាប់មកមានចិត្តស្រឡាញ់ចំពោះមនុស្សដែលចំអកដល់អ្នក ហើយកុំឈ្លោះប្រកែកជាមួយពួកគេឡើយ ដោយសារការឈ្លោះប្រកែកគ្នាគឺពុំត្រូវបានគាំទ្រដោយព្រះឡើយ ( សូមមើល នីហ្វៃទី ៣ ១១:២៩ ) ។ អ្វីដែលសំខាន់បំផុតនោះ គឺព្យាយាមឲ្យមានព្រះវិញ្ញាណគង់នៅជាមួយអ្នកជានិច្ច ។ ព្រះវិញ្ញាណនឹងជួយអ្នកឲ្យកាន់តែមានសេចក្តីស្រឡាញ់ និងភាពក្លាហាន ហើយទ្រង់នឹងធ្វើឲ្យពាក្យសម្តីរបស់អ្នកពេញដោយអំណាច ។
ជូលី អេហ្វ អាយុ ១៩ ឆ្នាំ ហេសេ ប្រទេសអាល្លឺម៉ង់
ចូរស្រឡាញ់ពួកខ្មាំងសត្រូវរបស់អ្នក
ខ្ញុំធ្លាប់មានស្ថានភាពស្រដៀងនេះផងដែរ ។ ប្រសិនបើអ្នកមានសេចក្តីជំនឿ ហើយបន្ទាបខ្លួន នោះអ្នកនឹងត្រូវបានប្រទានពរឲ្យមានកម្លាំង និង សេចក្តីជំនឿថាអ្នកត្រូវតែ « ស្រឡាញ់ពួកខ្មាំងសត្រូវ ត្រូវឲ្យពរដល់អ្នកណាដែលប្រទេចផ្តាសាអ្នក … ហើយត្រូវអធិស្ឋានសម្រាប់ពួកគេ » ( ម៉ាថាយ ៥:៤៤ ) ។ ខ្ញុំចង់លើកទឹកចិត្តអ្នកឲ្យស្រាវជ្រាវព្រះគម្ពីរដើម្បីរកចម្លើយអំពីរបៀបដើម្បីមានចិត្តរឹងមាំ ។ សូមអធិស្ឋាននៅពេលអ្នកមានអារម្មណ៍ឯកោដោយសេចក្តីជំនឿរបស់អ្នក ។ រ៉ូម ៨:៣១ ចែងថា « យើងនឹងថ្លែងប្រាប់ពីសេចក្តីទាំងនេះថាដូចម្តេច ? ប្រសិនបើជាព្រះកាន់ខាងយើង តើអ្នកណាអាចទាស់នឹងយើងបាន ? » អ្នកមានព្រះគង់នៅខាងអ្នក ! អ្វីគ្រប់យ៉ាងគឺអាចធ្វើទៅបាន ។
រៀហ្គេន ធី អាយុ១៥ ឆ្នាំ រដ្ឋយូថាយ៍ ស.រ.អា.
សូមកុំខ្លាចឡើយ
សូមនិយាយពីសាសនារបស់អ្នកឲ្យកាន់តែញឹកញាប់ ឬ ធ្វើកិច្ចការនានាដោយចេតនាដើម្បីលើកសាសនារបស់យើងឡើងមកនិយាយ ។ ខ្ញុំបានស្ថិតនៅក្នុងស្ថានភាពស្រដៀងគ្នានេះ ហើយខ្ញុំបានសរសេរថា « ខ្ញុំពេញចិត្តធ្វើជាពួកអិល.ឌី.អេស. » នៅលើកាបូបស្ពាយរបស់ខ្ញុំ ។ តាមរយៈការធ្វើបែបនេះ ខ្ញុំបានបើកឱកាសដល់អ្នកផ្សព្វផ្សាយសាសនាជាច្រើន ហើយបង្ហាញមនុស្សទូទៅថាខ្ញុំពុំខ្លាចដើម្បីឲ្យពួកគេដឹងថាខ្ញុំជាពួកអិល.ឌី.អេស. ឡើយ ។ ទោះបីជាអ្នកធ្វើអ្វីក៏ដោយ សូមកុំឲ្យពួកគេមានឥទ្ធិពលលើអ្នកឡើយ ។ សូមអធិស្ឋានសម្រាប់ពួកគេ និង សម្រាប់ខ្លួនឯងផងដែរ ។ មិនយូរប៉ុន្មានអ្នកនឹងឃើញថា ប្រសិនបើអ្នកផ្តោតចិត្តលើការសង្គ្រោះដល់ព្រលឹងអ្នកដទៃ នោះអ្នកនឹងមិនភ័យខ្លាចឲ្យពួកគេដឹងពីសេចក្តីពិតនៃដំណឹងល្អរបស់ព្រះវរបិតាយើងឡើយ ។
សាវ៉ាន់ណា ភី អាយុ១៤ ឆ្នាំ រដ្ឋតិចសាស ស.រ.អា.