« តើអ្នកចង់ឲ្យពួកយើងធ្វើអ្វី ? »
ម៉ៃខល ម៉ាកហ្កលប៊ី
នាយកបង្កើតកម្មវិធីសិក្សា
នៅពេលក្រុមបង្កើតកម្មវិធីសិក្សានៃសាសនាចក្រ បានសួរសមាជិកដើម្បីល្បងមើលពីកម្មវិធីសិក្សាថ្មីឆ្នាំ ២០១៩ ចូរមកតាមខ្ញុំ យើងបានឮសំណួរនេះម្តងហើយម្តងទៀត ជាមួយនឹងការផ្តល់មតិដូចនេះថា ៖ « នៅគ្រាដំបូង ខ្ញុំបានគិតថា ‹ កម្មវិធីនេះយ៉ាប់ណាស់ ! › ខ្ញុំមិនច្បាស់ថា វានឹងដំណើរការឬអត់នោះទេ » ។ ប៉ុន្តែកង្វល់ពេលដែលបានឮដំបូងទាំងនេះត្រូវបានផ្លាស់ប្តូរបន្តិចម្តងៗ ដោយការបញ្ជាក់ថា « ការសិក្សាព្រះគម្ពីររបស់យើងបានផ្លាស់ប្តូរទាំងស្រុង » ឬ « វាពិតជាដំណើរការមែន ! »
ហេតុអ្វីបទពិសោធន៍របស់ពួកគេសំខាន់ចំពោះអ្នក ? ដោយសារកម្មវិធីសិក្សាថ្មីនេះគឺសម្រាប់អ្នក និងគ្រួសារអ្នកនៅក្នុងផ្ទះរបស់អ្នក ហើយពុំមែនគ្រាន់តែសម្រាប់គ្រូបង្រៀនរបស់អ្នកនៅព្រះវិហារតែប៉ុណ្ណោះទេ ។
ការផ្តល់យោបល់មកពីគណៈប្រធានទីមួយ នោះច្បាប់ចេញផ្សាយនាខែនេះ ពិនិត្យមើលគោលការណ៍នានាដែលបង្កប់នៅក្នុងកម្មវិធីដ៏ថ្មីស្រឡាងនេះនៃ ចូរមកតាមខ្ញុំ—ដែលកើតឡើងភ្លាមបន្ទាប់ពីកំណែកម្មវិធីសិក្សារបស់យុវវ័យត្រូវបានណែនាំនៅក្នុងឆ្នាំ ២០១៣ ការបង្រៀនតាមរបៀបរបស់ព្រះអង្គសង្គ្រោះ ក្នុងឆ្នាំ ២០១៦ និង កម្មវិធីសិក្សាថ្នាក់បព្វជិតភាពមិលគីស្សាដែក និងថ្នាក់សមាគមសង្រ្គោះបានចាប់ផ្តើមនៅក្នុងឆ្នាំ ២០១៨ ។
ចាប់ពីទំព័រទី ២០ ទៅ អែលឌើរ ជែហ្វ្រី អ័រ ហូឡិន ដែលបានផ្តល់ការណែនាំដល់កិច្ចការនៃការបង្កើតកម្មវិធីសិក្សានេះ ផ្តល់ការយល់ដឹងថា ប្រសិនបើបានអនុវត្តវា នោះវាអាចផ្លាស់ប្តូរយើងក្នុងរបៀបមួយដ៏អស្ចារ្យ និងអស់កល្ប ។ វាពុំមែនគ្រាន់តែជាកម្មវិធីសិក្សាប៉ុណ្ណោះទេ វាថែមទាំងជាវិធីសាស្ត្រមួយក្នុងការរៀនសូត្រ និងការរស់នៅតាមដំណឹងល្អប្រចាំថ្ងៃ ។
នៅពេលខ្ញុំបានមើលពួកព្យាការី អ្នកមើលឆុត និង អ្នកទទួលវិវរណៈដឹកនាំការបង្កើតនៃកម្មវិធីថ្មីនេះដែលផ្តោតយកចិត្តទុកដាក់លើគេហដ្ឋាន និងដែលគាំទ្រដោយសាសនាចក្រ នោះខ្ញុំមានការអស្ចារ្យក្នុងចិត្តអំពីរបៀបដែលកម្មវិធីនេះត្រូវនឹងចលនារបស់សាសនាចក្រដែលឆ្ពោះទៅរកវិធីសាស្ត្រគ្រប់គ្រងតិចតួចដើម្បីរស់នៅតាមដំណឹងល្អ អញ្ជើញយើងឲ្យទទួលខុសត្រូវកាន់តែខ្លាំងឡើងចំពោះការរីកចម្រើនខាងវិញ្ញាណផ្ទាល់ខ្លួនរបស់យើង ។ នៅពេលយើងធ្វើដូច្នេះ ដោយនាំភាពសុខសាន្តមកក្នុងជីវិតរបស់យើង និងសេចក្តីល្អដល់ពិភពលោក នោះខ្ញុំជឿជាក់ថា យើងនឹងទទួលពន្លឺ និងសេចក្តីពិតកាន់តែច្រើនឡើង ហើយសមត្ថភាពរបស់យើងដើម្បីធ្វើតាមព្រះយេស៊ូវគ្រីស្ទ និងបោះបង់សេចក្តីអាក្រក់នឹងកើនឡើង ( សូមមើល គ. និង ស. ៩៣:២៩–៤០ ) ។