មានតែឌីជីថលប៉ុណ្ណោះ
ចំណុច ៣ យ៉ាងដែលត្រូវចាំ ពេលអ្នកមានអារម្មណ៍ថា អ្នកដូចជាខ្វះសមត្ថភាព
អ្នកនិពន្ធរស់នៅរដ្ឋ នូវ មិកស៊ីកូ ស.រ.អា. ។
យើងទាំងអស់គ្នាចង់ប្រែកាន់តែល្អបន្តិចម្តងៗ ប៉ុន្តែវាពិបាកដឹងពីចំណុចត្រូវចាប់ផ្តើម ។
ជារឿយៗ ខ្ញុំឆ្ងល់ថា ប្រសិនបើកិច្ចខិតខំរបស់ខ្ញុំក្នុងការគោរពប្រតិបត្តិជួបនឹងអ្វីមួយដែលជួនកាលដូចជាមានអារម្មណ៍ថា ជាបទដ្ឋាននៃភាពល្អឥតខ្ចោះពុំអាចធ្វើទៅបាន ។ ខ្ញុំកំពុងគិតអំពីរឿងនានាដែលខ្ញុំអាចធ្វើឲ្យបានល្អប្រសើរឡើងជានិច្ច ដូចជាចំណាយពេលច្រើនបន្ថែមទៀតដើម្បីអានព្រះគម្ពីររបស់ខ្ញុំ ឬអនុវត្តការគ្រប់គ្រងខ្លួនឯងឲ្យកាន់តែច្រើនឡើងជាងមុន ពេលខ្ញុំដើរកាត់ហាងលក់ការ៉េមនៅក្នុងតំបន់លក់អាហារកកនោះ ។
ទាំងនេះអាចមិនមែនជាបញ្ហាធំដុំទេ ប៉ុន្តែតើខ្ញុំអាចដឹងអំពីរបៀបធ្វើឲ្យប្រសើរឡើងយ៉ាងដូចម្តេច ជាពិសេសនៅពេលខ្ញុំពុះពារទប់ចិត្តមិនទិញការ៉េមរ៉កគីរូតនោះ ? ហើយតើមានការផ្លាស់ប្តូរអ្វីខ្លះដែលពិតជាកើតឡើងនៅក្នុងជីវិតខ្ញុំតាមរយៈការគោរពប្រតិបត្តិឲ្យកាន់តែប្រសើរឡើងនោះ ?
ការធ្វើតាមព្រះយេស៊ូវគ្រីស្ទពុំមែនជាការធ្វើអ្វីមួយដែលឲ្យរីកចម្រើនធំដុំយូរៗម្តងនោះទេ វាគឺជាការរីកចម្រើនប្រចាំថ្ងៃ ។ ដូចអែលឌើរ លែរី អរ ឡរិន ក្នុងពួកចិតសិបនាក់បានបង្រៀនថា « យើងបានមក [ ផែនដីនេះ ] ដើម្បីរៀន ហើយរីកចម្រើនរហូតដល់ត្រូវបានញែកឲ្យបរិសុទ្ធបន្តិចម្ដងៗ ឬធ្វើឲ្យបានគ្រប់លក្ខណ៍ក្នុងព្រះគ្រីស្ទ ។…
…ពេលយើងធ្វើដំណើរតាមមាគ៌ាដ៏តូច ហើយចង្អៀត នោះព្រះវិញ្ញាណបន្តអញ្ជើញឲ្យយើងមានភាពកាន់តែប្រសើរ ហើយឡើងបានកាន់តែខ្ពស់ » ។១
គ្រប់កិច្ចខិតខំដែលយើងធ្វើដើម្បីប្រែកាន់តែល្អបន្តិចម្តងៗ ធ្វើឲ្យជីវិតយើងកាន់តែប្រសើរឡើង ។ នេះគឺជាយុទ្ធសាស្ត្របីយ៉ាងដែលបានជួយខ្ញុំឲ្យប្រែកាន់តែល្អបន្តិចម្តងៗជារៀងរាល់ថ្ងៃ ។
១. ប្រែចិត្តជាប្រចាំ
ដោយសារយើងពុំអាចឈានដល់ភាពល្អឥតខ្ចោះដោយគ្មានព្រះអង្គសង្គ្រោះ និងដង្វាយធួនរបស់ទ្រង់ នោះយើងពុំអាចធ្វើឲ្យការគោរពប្រតិបត្តិរបស់យើងបានល្អប្រសើរដោយគ្មានការប្រែចិត្តឡើយ ។ ស្ទេផាន ដ័បុលយូ អូវិន ប្រធានយុវជនទូទៅបានបង្រៀនថា « យើងអាចព្យាយាមកែប្រែឥរិយាបថយើងដោយខ្លួនឯង ប៉ុន្តែមានតែព្រះអង្គសង្គ្រោះប៉ុណ្ណោះ ទើបអាចសម្អាតស្នាមប្រឡាក់ ហើយរែកបន្ទុកយើងបាន ហើយធ្វើឲ្យយើងអាចដើរតាមមាគ៌ានៃការគោរពប្រតិបត្តិទាំងមានទំនុកចិត្ត និងភាពរឹងមាំ » ។២ ប្រសិនបើអ្នកឃើញចំណុចខ្សោយនៅក្នុងខ្លួនអ្នកដែលអ្នកចង់ផ្លាស់ប្តូរ សូមធ្វើវាដោយអធិស្ឋានទៅកាន់ព្រះអម្ចាស់ ។
២.ដាក់អាទិភាពជាមួយព្រះវិញ្ញាណ
ការស្វែងរកចំណុចខ្សោយផ្ទាល់ខ្លួនរបស់ខ្ញុំអាចមានភាពស្មុគស្មាញ—ជារឿយៗ ខ្ញុំពុំដឹងថា ត្រូវចាប់ផ្តើមពីត្រង់ណាទៅទេ ។ យើងអាចអធិស្ឋានដើម្បីដឹងពីអ្វីដែលយើងត្រូវផ្លាស់ប្តូរនៅគ្រានេះ ។ អែលឌើរឡរិនបានបង្រៀនថា « ព្រះវិញ្ញាណបរិសុទ្ធពិតជាប្រទានដំបូន្មានដែលសមនឹងឲ្យអ្នកទទួល ។ ទ្រង់គឺជាដៃគូស្មោះត្រង់ទាំងស្រុង ហើយមានបន្ទូលប្រាប់យើងអំពីការណ៍ដែលគ្មាននរណាទៀតដឹង ឬ មានក្ដីក្លាហាននឹងថ្លែងឡើយ » ។៣ ទោះបីយើងពុំត្រូវរង់ចាំការបំផុសគំនិតឲ្យធ្វើខ្លួនកាន់តែប្រសើរក្តី ព្រះវិញ្ញាណអាចជួយយើងឲ្យដាក់អាទិភាព ។
៣. បង្កើនទំនុកចិត្តខាងវិញ្ញាណ
ខ្ញុំមានក្តីអស្ចារ្យជានិច្ចចំពោះព្រះវរបិតាសួគ៌ដែលបានប្រទានពរដល់ខ្ញុំ នៅពេលខ្ញុំបានព្យាយាមគោរពតាមព្រះបញ្ញត្តិ ។ ខ្ញុំទទួលអារម្មណ៍នៃភាពសុខសាន្ត និងទំនុកចិត្តដែលកើនឡើងជានិច្ច នៅពេលណាខ្ញុំបានបង្កើនបទដ្ឋានរស់នៅឲ្យបានប្រសើរឡើង ។ ប្រធាន រ័សុល អិម ណិលសុន បានសន្យាថា « នៅពេលអ្នកបន្តគោរពប្រតិបត្តិ … នោះអ្នកនឹងទទួលបានចំណេះដឹង និងការយល់ដឹងដែលអ្នកស្វែងរក ។ រាល់ពរជ័យដែលព្រះអម្ចាស់មានសម្រាប់បងប្អូន—សូម្បីតែអព្ភូតហេតុ—នឹងកើតមានតាមក្រោយ » ។4 ការគោរពប្រតិបត្តិឲ្យកាន់តែប្រសើរឡើង ពុំគ្រាន់តែធ្វើឲ្យអ្នកមានអារម្មណ៍ល្អប្រសើរអំពីខ្លួនអ្នក និងការសម្រេចចិត្តនានារបស់អ្នកនោះទេ វាថែមទាំងបើកឱកាសបន្ថែមទៀតឲ្យព្រះអម្ចាស់ប្រទានពរដល់អ្នក ក្នុងរបៀបនានាដែលអ្នកពុំអាចរំពឹងទុកបាន ។
ព្រះវរបិតាសួគ៌ជ្រាបដឹងពីចិត្តរបស់ពួកយើង ហើយទ្រង់ទទួលស្គាល់គ្រប់កិច្ចខិតខំដែលយើងបានធ្វើ ដើម្បីគោរពប្រតិបត្តិតាម ។ ទ្រង់ពុំរំពឹងឲ្យយើងបានល្អឥតខ្ចោះនៅថ្ងៃស្អែកឡើយ ។ ការព្យាយាមដើម្បីប្រែកាន់តែល្អប្រសើរឡើងរៀងរាល់ថ្ងៃ—ទោះបីវាជាការកាត់បន្ថយចំណីកកត្រជាក់ ឬចំណាយពេលបន្ថែមទៀតដើម្បីអានព្រះគម្ពីរក្តី—នឹងជួយយើងឲ្យដឹងថា គ្រប់កម្រិតនៃការរីកចម្រើនទាំងអស់គឺមានតម្លៃ ហើយអាចសម្រេចបាន ។