យើងទាំងពីរនាក់បានទទួលពរ
អាណា ហ្វីងហ្គើលេ ទីក្រុងហេសេ ប្រទេសអល្លឺម៉ង់
រចនារូបភាពដោយ ខារ៉ូលីន វីបប៊ើត
ភ្នែករបស់ខ្ញុំបានខ្វាក់ពាក់កណ្តាលមើលមិនសូវឃើញទេ នៅពេលឡានដឹកទំនិញមួយបានបុកខ្ញុំធ្វើឲ្យខ្ញុំខ្ទាត់ចេញពីកង់ ។ ប្រហែលជាបួនឆ្នាំក្រោយមក អំឡុងពេលរដូវបុណ្យគ្រីស្ទម៉ាស់ឆ្នាំ ២០១១ ខ្ញុំបានទទួលអារម្មណ៍បំផុសគំនិតឲ្យសូមបងប្រុសម្នាក់ ដែលខ្ញុំស្គាល់នៅក្នុងវួដចាស់របស់ខ្ញុំ ឲ្យប្រសិទ្ធពរបព្វជិតភាពដល់ខ្ញុំ ។ ខ្ញុំបានឃើញបងប្រុសម្នាក់នេះយូរៗម្តង ដូច្នេះខ្ញុំពុំយល់អំពីមូលហេតុដែលខ្ញុំគួរតែសូមគាត់នោះទេ ។ ខ្ញុំបានដឹងថា មានអ្នកកាន់បព្វជិតភាពដែលសក្តិសមដទៃទៀតដែលខ្ញុំអាចសូមការប្រសិទ្ធពរពីគេជំនួសឲ្យការសុំពីគាត់បាន ។
នៅប៉ុន្មានសប្តាហ៍ក្រោយមក អារម្មណ៍ដែលខ្ញុំត្រូវការការប្រសិទ្ធពរនោះបានមានកាន់តែខ្លាំងឡើង ។ ខ្ញុំកំពុងបម្រើជាអ្នកធ្វើការនៅក្នុងព្រះវិហារបរិសុទ្ធនៅព្រះវិហារបរិសុទ្ធ ហ្វ្រែងហ្វើត អាល្លឺម៉ង់ ដូច្នេះខ្ញុំបានសម្រេចចិត្តសូមឲ្យបងប្រុសម្នាក់នៅទីនោះផ្តល់ការប្រសិទ្ធពរឲ្យខ្ញុំ ។
បន្ទាប់ពីខ្ញុំបានធ្វើការសម្រេចចិត្តនេះ បងប្រុសដែលខ្ញុំបានទទួលការបំផុសគំនិតឲ្យសូមការប្រសិទ្ធពរនោះបានចូលមកព្រះវិហារបរិសុទ្ធ ។ រំពេចនោះខ្ញុំបានដឹងថា នេះពុំមែនជារឿងចៃដន្យទេ—គឺប្រាកដណាស់ ព្រះវរបិតាសួគ៌សព្វព្រះទ័យឲ្យខ្ញុំសូមការប្រសិទ្ធពរពីបងប្រុសនោះ ។ ខ្ញុំបានតាំងចិត្តក្លាហាន ហើយនិយាយជាមួយគាត់ បន្ទាប់ពីគាត់បញ្ចប់វគ្គរបស់គាត់ ។ គាត់បានយល់ព្រម ។
ក្រោយមក ខ្ញុំបានពន្យល់ថា ខ្ញុំមិនបានដឹងថាហេតុអ្វីនោះទេ ប៉ុន្តែខ្ញុំទទួលអារម្មណ៍ថា ខ្ញុំត្រូវការការប្រសិទ្ធពរពីគាត់ ។ គាត់បាននិយាយថា គាត់រីករាយនឹងផ្តល់ការប្រសិទ្ធពរឲ្យ ។ គាត់បានអញ្ជើញបងប្អូនប្រុសផ្សេងទៀតទៅក្នុងបន្ទប់ បន្ទាប់មកចាប់ផ្តើមប្រសិទ្ធពរឲ្យខ្ញុំ ។ នៅពេលគាត់ប្រសិទ្ធពរចប់ ខ្ញុំមានអារម្មណ៍ភាន់ភាំង ។ ការប្រសិទ្ធពរនោះល្អ ប៉ុន្តែគ្មានអ្វីមួយដែលជាក់លាក់សោះ ។
បន្ទាប់មកខ្ញុំបានបើកភ្នែករបស់ខ្ញុំ ។
ពេលខ្ញុំបើកភ្នែកឡើង ខ្ញុំអាចឃើញបន្ទប់ទាំងមូលឡើងច្បាស់ទែងតែម្តង ។ ខ្ញុំពុំអាចជឿវាបានឡើយ ! ខ្ញុំបានសួរបងប្រុសនោះ តើគាត់ដឹងពីមូលហេតុដែលគាត់គឺជាមនុស្សម្នាក់គត់ដែលត្រូវផ្តល់ការប្រសិទ្ធពរនេះដល់ខ្ញុំដែរឬទេ ។ ការឆ្លើយតបរបស់គាត់ធ្វើឲ្យខ្ញុំរាបសា ។
គាត់បាននិយាយថា « ខ្ញុំគិតថា ការប្រសិទ្ធពរពុំគ្រាន់តែសម្រាប់អ្នកប៉ុណ្ណោះទេ ។ វាក៏សម្រាប់ខ្ញុំផងដែរ ។ ខ្ញុំនឹងផ្តល់ការប្រសិទ្ធពរឲ្យក្មួយស្រីខ្ញុំនៅថ្ងៃស្អែក ដោយសារគាត់នឹងទទួលបុណ្យជ្រមុជទឹក ។ គ្រួសារយើងពុំសកម្មនៅក្នុងសាសនាចក្រទេ ហើយនាងគឺជាសមាជិកគ្រួសារដែលទទួលបុណ្យជ្រមុជទឹកដំបូងគេក្នុងរយៈពេលស្ទើរតែជិត ២០ ឆ្នាំមកនេះ ។ សមាជិកគ្រួសារយើងជាច្រើននាក់នឹងចូលរួមពិធីបុណ្យជ្រមុជទឹកនេះ ហើយខ្ញុំពុំប្រាកដថា សេចក្តីជំនឿរបស់ខ្ញុំមានខ្លាំងគ្រប់គ្រាន់ដើម្បីផ្តល់ការប្រសិទ្ធពរនោះទេ ។ ឥឡូវនេះ ខ្ញុំដឹងថា ខ្ញុំអាចធ្វើវាបាន » ។
នៅថ្ងៃបន្ទាប់មក គំហើញរបស់ខ្ញុំបានប្រសើរឡើងល្មមដែលខ្ញុំពុំត្រូវការប្រើឈើច្រត់សរបស់ខ្ញុំទៀតឡើយ ។ ខ្ញុំបានខ្ចប់វា ហើយផ្តល់វាជាអំណោយបុណ្យគ្រីស្ទម៉ាស់ឲ្យបងប្រុសម្នាក់នេះជាមួយនឹងសំបុត្រមួយ ។ ខ្ញុំបានសរសេរថា « ខ្ញុំដឹងថា នេះពុំមែនជាដំបងរបស់ម៉ូសេទេ ប៉ុន្តែខ្ញុំសង្ឃឹមថា វារំឭកអ្នកអំពីអំណាចបព្វជិតភាពដែលអ្នកបានកាន់ » ។
ព្រះវរបិតាសួគ៌ស្រឡាញ់យើង ហើយសព្វព្រះទ័យប្រទានពរដល់យើង ។ ពរជ័យនៅបុណ្យគ្រីស្ទម៉ាស់នេះពុំគ្រាន់ស្តារគំហើញរបស់ខ្ញុំឡើងវិញទេ វាថែមទាំងផ្តល់ទំនុកចិត្តដល់អ្នកកាន់បព្វជិតភាពដ៏រាបសាម្នាក់នៅក្នុងការបម្រើបព្វជិតភាពរបស់គាត់ ។