មានតែឌីជីថលប៉ុណ្ណោះ
បើកសោទៅរកអំណាចកាន់តែប្រសើរឡើងជាមួយកម្មវិធីសិក្សាថ្មី
ឆ្នាំ ២០១៩ កំពុងតែនាំការផ្លាស់ប្តូរដ៏ធំមកកាន់ថ្នាក់សាលាថ្ងៃអាទិត្យ !
សូមស្រមៃថា ប្រសិនបើអ្នកត្រូវបានប្រគល់ឲ្យនូវអំណាចបន្ថែមទៀតនៅក្នុងជីវិតអ្នក—អំណាចដើម្បីផ្លាស់ប្តូរ ដើម្បីធ្វើការផ្លាស់ប្តូរឲ្យមានភាពវិជ្ជាមានក្នុងជីវិតអ្នក ដើម្បីយកឈ្នះលើភាពលំបាកៗនានាដែលនៅជុំវិញអ្នក ។ អំណាចនោះគឺ—អំណាចព្រះ—មានជានិច្ចតាមរយៈព្រះបន្ទូលរបស់ព្រះ ប៉ុន្តែការផ្លាស់ប្តូរថ្មីៗនេះនៅក្នុងថ្នាក់សាលាថ្ងៃអាទិត្យ និងថ្នាក់អង្គការបឋមសិក្សា មានបំណងដើម្បីជួយយើង ឲ្យបើកសោទទួលយកអំណាចនោះនៅក្នុងជីវិតប្រចាំថ្ងៃរបស់យើង ។
ខ្ញុំឈ្មោះម៉ាកខេនហ្សី ជាយុវមជ្ឈិមវ័យ និងជាអ្នកនិពន្ធកម្មវិធីថ្មី ចូរមកតាមខ្ញុំ សម្រាប់គេហដ្ឋាន ថ្នាក់សាលាថ្ងៃអាទិត្យ និងថ្នាក់អង្គការបឋមសិក្សា ។ ខ្ញុំមានពរដើម្បីសរសេរសៀវភៅ ចូរមកតាមខ្ញុំ ហើយខ្ញុំបានឃើញភាពខុសប្លែក និងអំណាច ដែលការសិក្សាព្រះគម្ពីរកាន់តែមានឥទ្ធិពលលើជីវិតរបស់បុគ្គលម្នាក់ៗ—ជាពិសេសគឺរូបខ្ញុំផ្ទាល់ ។
នៅពេលខ្ញុំបានឃើញកម្មវិធីថ្មី ចូរមកតាមខ្ញុំ នេះដំបូង ខ្ញុំពុំប្រាកដចិត្តថា ត្រូវគិតអំពីអ្វីឡើយ ។ ជួនកាលវាអាចជារឿងដ៏ពិបាកដើម្បីឆ្លៀតពេលអានព្រះគម្ពីររបស់ខ្ញុំរៀងរាល់ថ្ងៃ—ទោះបីជាខ្ញុំមានអារម្មណ៍ប្លែក និងទទួលស្គាល់ពរជ័យដែលខ្ញុំទទួលបាន ពេលខ្ញុំអានព្រះគម្ពីរជាទៀងទាត់ក្តី ។ ( តើមាននរណាខ្លះដែល « គ្រាន់តែអានព្រះគម្ពីរតែមួយខ ពីមុនលូនចូលមុងដេក » នោះ ? ) ប៉ុន្តែការសិក្សាព្រះគម្ពីរដោយពិតប្រាកដ អំឡុងពេលសរសេរឯកសារទាំងនេះ បានបង្រៀនខ្ញុំអំពីតម្លៃនៃ (១) ពុំគ្រាន់តែលះបង់ខ្លួនខ្ញុំនូវពេលវេលាឲ្យបានគ្រប់គ្រាន់ដើម្បីសិក្សាបទគម្ពីរនោះទេ ប៉ុន្តែ (២) ខ្ញុំក៏អាចទទួលវិវរណៈយ៉ាងពិតប្រាកដ គឺជាវិវរណៈដ៏អស្ចារ្យបំផុតសម្រាប់ខ្លួនខ្ញុំ នៅពេលខ្ញុំពិតជាព្យាយាមមានព្រះវិញ្ញាណពេលខ្ញុំសិក្សា ។
ការធ្វើការតាក់តែងកម្មវិធីថ្មី ចូរមកតាមខ្ញុំ បានផ្តល់ឱកាសពិសេសដល់ខ្ញុំដើម្បីកាន់តែពូកែខាងការសិក្សា និងការស្វែងរកសេចក្តីពិតនៅក្នុងព្រះគម្ពីរសម្រាប់ការងាររបស់ខ្ញុំ ។ ហើយខណៈដែលយុវមជ្ឈិមវ័យជាច្រើននឹងគ្មានឱកាសស្រដៀងគ្នា នោះខ្ញុំមានទំនុកចិត្តថា ចូរមកតាមខ្ញុំ អាចធ្វើបែបនោះសម្រាប់យើងម្នាក់ៗ ។
នៅក្នុងគ្រប់គម្រោងមេរៀនទាំងអស់ យើងត្រូវបានលើកទឹកចិត្តឲ្យអានខគម្ពីរសម្រាប់ខ្លួនយើង ហើយកត់ត្រាគំនិតរបស់យើង ដោយមានជំនួយបន្តិចបន្តួចមកពីការយល់ខាងគោលលទ្ធិដែលបង្រៀនអំពីគោលការណ៍នានានៅក្នុងខគម្ពីរ ហើយអញ្ជើញយើងឲ្យសួរខ្លួនឯងនូវសំណួរអំពីអ្វីដែលយើងកំពុងរៀន ។ របៀបដ៏សាមញ្ញនៃការអានព្រះគម្ពីរនេះជួយយើងឲ្យរៀនបន្ថែមទៀតអំពីប្រធានបទដែលយើងចាប់អារម្មណ៍ ហើយសួរសំណួរដល់ខ្លួនយើងដែលជួយយើងពិចារណាអំពីប្រធានបទទាំងនោះ ។ ប៉ុន្តែជាមួយនឹងកម្មវិធីនេះ មនុស្សផ្សេងទៀតកំពុងធ្វើវាផងដែរ ។ តាមរបៀបនោះ នៅពេលយើងជួបជុំគ្នា នោះអ្នកអាចពិភាក្សាសេចក្តីពិត និងគោលការណ៍នៃដំណឹងល្អដែលធ្វើឲ្យមានការផ្លាស់ប្តូរក្នុងខ្លួនអ្នក ហើយអ្នកដទៃអាចធ្វើដូច្នោះផងដែរ—គឺនាំអ្នកឲ្យរួមគ្នានៅក្នុងការធ្វើតាមគោលបំណងចម្បងរបស់មនុស្សគ្រប់រូប ៖ គឺការក្លាយឲ្យកាន់តែដូចព្រះយេស៊ូវគ្រីស្ទ ។
ការចាប់ផ្តើមទម្លាប់ថ្មីមួយនៃការសិក្សាព្រះគម្ពីរគឺជាដំណើរការមួយ ហើយវាអាចមានការលំបាកនៅគ្រាដំបូង ។ ប៉ុន្តែព្រះយេស៊ូវអាចជួយអ្នកចំពោះរឿងនេះ គឺដូចជាទ្រង់អាចជួយអ្នកចំពោះអ្វីៗផ្សេងទៀត ។ ប្រសិនបើអ្នកមានការលំបាកក្នុងការចាប់ផ្តើមបន្តទម្លាប់នៃការសិក្សាព្រះគម្ពីរដោយឧស្សាហ៍ព្យាយាម សូមប្រាកដថា អ្នកងាកបែរទៅរកព្រះអម្ចាស់ ។ នៅពេលអ្នកធ្វើដូច្នោះ នោះអ្នក និងអ្នកដទៃដែលនៅជុំវិញអ្នកនឹងទទួលពរជាមួយនឹងបំណងប្រាថ្នាដ៏ធំធេងដើម្បីអានព្រះបន្ទូលទ្រង់ ។