សំណួរ និងចម្លើយ
« ខ្ញុំពុំមានអារម្មណ៍ថាសក្ដិសមដើម្បីទទួលបានសេចក្ដីស្រឡាញ់ពីព្រះអង្គសង្គ្រោះឡើយ ។ តើខ្ញុំអាចយកឈ្នះលើអារម្មណ៍នេះ ហើយស្គាល់តម្លៃរបស់ខ្លួនឯងតាមរបៀបណា ? »
អធិស្ឋានដើម្បីទទួលអារម្មណ៍នៃសេចក្តីស្រឡាញ់របស់ទ្រង់
យើងទាំងអស់គ្នាគឺជាបុត្រាបុត្រីរបស់ព្រះវរបិតាសួគ៌យើង ។ សេចក្ដីស្រឡាញ់របស់ទ្រង់ចំពោះយើងគឺគ្មានដែនកំណត់ ។ ប្រសិនបើយើងធ្លាប់មានអារម្មណ៍ថា យើងគ្មានភាពសក្តិសមនឹងសេចក្តីស្រឡាញ់របស់ទ្រង់ នោះយើងគួរតែអធិស្ឋានទៅកាន់ទ្រង់ ។ អធិស្ឋានដើម្បីទទួលអារម្មណ៍នៃសេចក្តីស្រឡាញ់របស់ទ្រង់ ។ អធិស្ឋានថា អ្នកនឹងទទួលអារម្មណ៍នៃភាពសក្តិសមចំពោះសេចក្តីស្រឡាញ់របស់ទ្រង់សម្រាប់អ្នក ហើយថាអ្នកអាចឃើញខ្លួនអ្នក ដូចទ្រង់ទតឃើញអ្នក ។ ទ្រង់នឹងឆ្លើយតបការអធិស្ឋានរបស់យើងដោយសេចក្តីសន្ដោសប្រណីនៃសេចក្តីស្រឡាញ់ដ៏ឥតខ្ចោះរបស់ទ្រង់ជានិច្ច ទៅតាមពេលវេលា និងរបៀបរបស់ទ្រង់ ។ នៅពេលណាដែលខ្ញុំមានអារម្មណ៍បាក់ទឹកចិត្ត ឬឯកោ ការអធិស្ឋានទូលសូមសេចក្តីស្រឡាញ់របស់ទ្រង់បានលើកស្ទួយចិត្តខ្ញុំជានិច្ច ។
ជូលី អិម អាយុ ១៦ ឆ្នាំ រដ្ឋវើរជីញ៉ា ស.រ.អា.
ខិតទៅជិតព្រះអង្គសង្គ្រោះ
ថ្មីៗនេះ នៅក្នុងថ្នាក់ត្រៀមខ្លួនទៅបម្រើបេសកកម្ម យើងបានពិភាក្សាអំពីរបៀបដែលយើងអាចមើលឃើញសេចក្តីស្រឡាញ់របស់ព្រះដែលមានចំពោះយើង ។ យើងបានពិភាក្សានូវរឿងជាច្រើន ដែលយើងអាចធ្វើដើម្បីទទួលអារម្មណ៍កាន់តែផ្តល់តម្លៃលើខ្លួនឯង រឿងទាំងនោះរួមមាន ការបម្រើអ្នកជិតខាង ការអធិស្ឋានសូមជំនួយលើរឿងដែលសំខាន់ចំពោះអ្នក ការអានព្រះគម្ពីរ និងការធ្វើជាអ្នកផ្សព្វផ្សាយសាសនា ។ កិច្ចការទាំងអស់នេះមានបំណងនាំយើងឲ្យខិតកាន់តែជិតព្រះយេស៊ូវគ្រីស្ទ ហើយជួយយើងឲ្យមើលឃើញសក្តានុពលដើម្បីប្រែក្លាយដូចជាទ្រង់ ។
សាន់ទីអាហ្គោ ស្ស៊ី អាយុ ១៧ ឆ្នាំ រដ្ឋអារីហ្សូណា ស.រ.អា.
គោរពតាមព្រះបញ្ញត្តិ
ជួនកាល ខ្ញុំមានអារម្មណ៍ថា ពុំសក្ដិសមដើម្បីទទួលបានសេចក្ដីស្រឡាញ់ពីព្រះអង្គសង្គ្រោះឡើយ ដោយសារខ្ញុំពុំបានគោរពប្រតិបត្តិតាមបទបញ្ញត្តិរបស់ព្រះអម្ចាស់បានទាំងស្រុងឡើយ ។ ខ្ញុំអាចយកឈ្នះលើអារម្មណ៍ទាំងនេះតាមរយៈការប្រែចិត្ត ជួនកាលដោយមានជំនួយពីប៊ីស្សពរបស់ខ្ញុំ ដែលបង្រៀនខ្ញុំថា ព្រះអម្ចាស់ស្រឡាញ់បុត្រាបុត្រីទាំងអស់របស់ទ្រង់ ។
ចាកឃ្វី ឌី អាយុ ១៥ ឆ្នាំ ទីក្រុងអាប៊ីដចាន ប្រទេសកូតឌីវ័រ
ការប្រែចិត្តគឺជាគន្លឹះ
យើងទាំងអស់គ្នាប្រព្រឹត្តអំពើបាប ហើយដោយសាររឿងនោះ យើងអាចមានអារម្មណ៍ពុំសក្តិសមចំពោះសេចក្តីស្រឡាញ់របស់ព្រះអង្គសង្គ្រោះ ។ ប៉ុន្តែទ្រង់បានថ្វាយព្រះជន្មទ្រង់សម្រាប់យើង — ទ្រង់បានបូជាសម្រាប់យើង ។ ទង្វើដែលមិនគិតពីខ្លួនឯងនោះបានធ្វើឡើង ដោយសារតែសេចក្តីស្រឡាញ់ ។ រឿងតែមួយគត់ដែលយើងចាំបាច់ត្រូវធ្វើដើម្បីទទួលអារម្មណ៍ថា សក្តិសមនឹងសេចក្តីស្រឡាញ់របស់ទ្រង់នោះគឺ ប្រើអំណាចនៃដង្វាយធួនរបស់ទ្រង់តាមរយៈការប្រែចិត្តពីអំពើបាបរបស់យើង ។ ការប្រែចិត្តគឺជាគន្លឹះនៅក្នុងការទទួលស្គាល់តម្លៃរបស់យើង និងសេចក្តីស្រឡាញ់របស់ព្រះអង្គសង្គ្រោះ ។
ស៊ីស្ទើរ ខុសស្ទែន អាយុ ២៣ ឆ្នាំ បេសកកម្មហ្វីលីពីន សេប៊ូ
ស្រឡាញ់មនុស្សដទៃ
របៀបមួយដើម្បីទទួលស្គាល់ភាពមានតម្លៃរបស់ខ្លួនគឺ ទទួលស្គាល់ភាពមានតម្លៃរបស់មនុស្សដែលនៅជុំវិញខ្លួនយើង ។ ការផ្តោតចិត្តទុកដាក់ទៅលើអ្នកដទៃជួយយើងឲ្យទទួលអារម្មណ៍ល្អអំពីខ្លួនយើង ដោយសារយើងកំពុងស្ថាបនាមនុស្សដទៃឡើង ។ វាគឺជាយុទ្ធសាស្ត្រឈ្នះៗ ! ពេលខ្ញុំមានការស្មុគស្មាញនឹងការមានទំនុកចិត្តលើខ្លួនឯង នោះខ្ញុំបានសម្រេចចិត្តថា ខ្ញុំនឹងបម្រើនរណាម្នាក់នៅជុំវិញខ្ញុំដែលត្រូវការជំនួយ ។ រៀងរាល់ថ្ងៃអស់រយៈពេលមួយខែ ខ្ញុំបានកោតសរសើរដល់មិត្តម្នាក់ដែលកំពុងមានបញ្ហា ។ ការផ្តោតចិត្តទុកដាក់លើអ្នកដទៃបានជួយខ្ញុំឲ្យមានអារម្មណ៍ថា សក្តិសម និងមានគេត្រូវការខ្ញុំ ។ ពេលយើងព្យាយាមស្រឡាញ់មនុស្សដទៃទោះបីគេជាមនុស្សបែបណាក្តី នោះវាប្រែកាន់តែងាយស្រួលដើម្បីមើលឃើញពីសេចក្តីស្រឡាញ់ដ៏ធំធេងដែលព្រះ មានសម្រាប់ពួកយើង ។ ការជួយមនុស្សដទៃឲ្យទទួលអារម្មណ៍សក្តិសមចំពោះសេចក្តីស្រឡាញ់ នឹងជួយយើងឲ្យមានអារម្មណ៍សក្តិសមនឹងសេចក្តីស្រឡាញ់ចំពោះខ្លួនឯង ។
ជេមី ដបុលយូ អាយុ ១៥ ឆ្នាំ រដ្ឋមីនីសូតា ស.រ.អា.