ព្រះគម្ពីរមរមន ៖ អំណោយដ៏ពិសេស
ខ្លោដែត ប៉ាយប៊ី ប៊ើត រដ្ឋវ៉ាស៊ីនតោ ស. រ. អា.
រចនារូបភាពដោយ អ៊ីវ៉ា វ៉ាស្វីស្ស
នៅយប់មុនថ្ងៃបុណ្យគ្រីស្ទម៉ាស់ឆ្នាំ ២០១៦ អំឡុងពេលដែលស្វាមីខ្ញុំ និងខ្ញុំកំពុងបម្រើជាអ្នកផ្សព្វផ្សាយសាសនាសម្រាប់ព្រះវិហារបរិសុទ្ធនៅព្រះវិហារបរិសុទ្ធ ម៉ានីល ហ្វីលីពិន នោះខ្ញុំចង់ឲ្យព្រះគម្ពីរមរមនមួយក្បាលទៅនរណាម្នាក់ ។ នៅក្នុងគម្របខាងមុខនៃគម្ពីរនេះ ខ្ញុំបានសរសេរទីបន្ទាល់របស់ខ្ញុំ ហើយដាក់បញ្ចូលកាតមួយនៃរូបព្រះវិហារបរិសុទ្ធម៉ានីល ដែលមានព័ត៌មានស្តីពីទីកន្លែងដើម្បីរៀនបន្ថែមទៀតអំពីសាសនាចក្រ ។ បន្ទាប់មក ខ្ញុំបានលុតជង្គង់អធិស្ឋាន ហើយទូលសូមព្រះអម្ចាស់ឲ្យដឹកនាំខ្ញុំទៅជួបនរណាម្នាក់ដែលទ្រង់បានរៀបចំ ។
ខ្ញុំបានចេញពីផ្ទះរបស់យើង ហើយឆ្លងថ្នល់ ។ មានបុរសពីរនាក់បានមកលេងសន្តិសុខម្នាក់ ដែលយាមនៅមជ្ឈមណ្ឌលបំពាក់បំប៉នអ្នកផ្សព្វផ្សាយសាសនាក្បែរនោះ ។ គាត់បានស្រែកថា « រីករាយបុណ្យគ្រីស្ទម៉ាស់ ! » ខ្ញុំទទួលការបំផុសគំនិតឲ្យដើរទៅរកពួកគេ ។
បន្ទាប់ពីខ្ញុំបានណែនាំខ្លួនឲ្យពួកគេស្គាល់ហើយ ខ្ញុំបានដឹងថា បុរសម្នាក់គឺជាអ្នកថែសួននៅមជ្ឈមណ្ឌលបំពាក់បំប៉នអ្នកផ្សព្វផ្សាយសាសនា ហើយបុរសម្នាក់ទៀតគឺជាកសិករ ។ ខ្ញុំដឹងថា ពួកគេទាំងពីរនាក់ជាសមាជិកសាសនាចក្រ ។
ខ្ញុំបានសួរ ប្រសិនបើពួកគេស្គាល់នរណាម្នាក់ដែលចាប់អារម្មណ៍ទទួលយកអំណោយបុណ្យគ្រីស្ទម៉ាស់មួយជាព្រះគម្ពីរមរមនមួយក្បាលដែរឬទេ ។ បុរសជាកសិករបានមើលដោយភ្ញាក់ផ្អើល ។ គាត់បាននិយាយថា គាត់មានមិត្តម្នាក់ដែលនឹងមកលេងបរិវេណព្រះវិហារបរិសុទ្ធជាមួយគាត់នៅពេលបន្តិចទៀត ។ គាត់ចង់ឲ្យព្រះគម្ពីរមរមនមួយក្បាលទៅមិត្តរបស់គាត់ ប៉ុន្តែគាត់ពុំអាចរកវាបាន ។ ដោយអារម្មណ៍ក្តុកក្តួល នោះខ្ញុំបានទាញយកព្រះគម្ពីរមរមនចេញពីកាបូបរបស់ខ្ញុំ ។ ខ្ញុំបានប្រាប់ពួកគេអំពីការអធិស្ឋានរបស់ខ្ញុំ ហើយបានជូនព្រះគម្ពីរនោះទៅគាត់ ។
ព្រះវិញ្ញាណបានរំជួលដួងចិត្តពួកយើងទាំងអស់គ្នា ហើយកសិករនោះបានបង្ហាញសេចក្តីសង្ឃឹមថា មិត្តភក្តិរបស់គាត់នឹងអានព្រះគម្ពីរមរមន ហើយទទួលយកដំណឹងល្អ ។ នៅពេលខ្ញុំបានដើរត្រឡប់ទៅផ្ទះខ្ញុំវិញ នោះខ្ញុំថ្លែងអំណរគុណដល់ព្រះអម្ចាស់ ហើយបានអធិស្ឋានថា មិត្តរបស់កសិករនោះនឹងរក្សាការតាំងចិត្តរបស់គាត់ដើម្បីទៅលេងបរិវេណព្រះវិហារបរិសុទ្ធ ។
ប្រហែលជា ១៥ នាទីក្រោយមក ខ្ញុំបានទទួលការហៅទូរសព្ទមកពីសន្តិសុខយាមទ្វារ អិម. ធី. ស៊ី. ។ មិត្តភក្តិរបស់កសិករនោះបានមកដល់ ។ រំភេចនោះខ្ញុំបានចេញទៅជួបគាត់ ។ គាត់គឺជាមេបញ្ជាការបើកកប៉ាល់ពាណិជ្ជករដែលនឹងធ្វើដំណើរត្រឡប់ទៅសមុទ្រវិញក្នុងរយៈពេលពីរថ្ងៃទៀត ។ គាត់បានអរគុណខ្ញុំសម្រាប់ព្រះគម្ពីរមរមន ហើយនិយាយថា គាត់នឹងយកវាទៅលើកប៉ាល់ជាមួយគាត់ ។ ពីមុនគាត់លាខ្ញុំ ខ្ញុំបានសម្លឹងមើលចំកែវភ្នែករបស់គាត់ ហើយនិយាយថា « ព្រះគម្ពីរនេះគឺជាព្រះគម្ពីរពិត » ។ នៅពេលខ្ញុំនិយាយពាក្យនោះ ព្រះវិញ្ញាណបានបញ្ជាក់សេចក្តីពិតនេះដល់ខ្ញុំ ។
នៅបុណ្យគ្រីស្ទម៉ាសនោះខ្ញុំបានផ្តល់អំណោយពិសេសមួយ ៖ គឺព្រះគម្ពីរមរមន និងទីបន្ទាល់របស់ខ្ញុំថា វាជាព្រះគម្ពីរពិត ។ ខ្ញុំក៏បានទទួលអំណោយពិសេសមួយផងដែរ ៖ ព្រះអម្ចាស់បានឆ្លើយតបការអធិស្ឋានរបស់ខ្ញុំ ហើយបានប្រទានពរដល់ខ្ញុំនូវឱកាសមួយដើម្បីចែកចាយដំណឹងល្អ ។