Ko Hono Maʻu ha Fiefia ʻo Fakafou ʻia Kalaisi Neongo ʻa e Foki Vave ki ʻApi mei he Ngāue Fakafaifekaú

Ko ha meʻa faingataʻa ʻa e ʻalu ʻo ngāue fakafaifekaú. Ka ʻoku faingataʻa tatau pē ia mo e foki ki ʻapí mei he ngāue fakafaifekaú tautautefito ki he taimi ʻokú ke foki vave ai teʻeki ʻosí. ʻOkú ke hohaʻa ki he ngaahi meʻa ʻe lea ʻaki ʻe he niʻihi kehé pe ko e anga ʻenau fakafōtunga kiate koé. Te nau loto fakamaau nai? Taʻefiemālie? Faikeheʻia? ʻOkú ke hohaʻa te ke ongoʻi hangē ne ʻikai te ke lelei feʻunga pe mālohi feʻungá. ʻOkú ke fifili pe ʻoku ʻi ai ha fehalaaki ʻiate koe pe naʻá ke fai ha fili hala ʻi hoʻo ʻalú. Ne u hohaʻa ki he ngaahi meʻa kotoa ko ʻení.

ʻI he taimi ne u fili ai ke u ʻalu ʻo ngāue faifekaú, naʻá ku fiefia ʻaupito. Ne u ʻiloʻi ko e meʻa ia naʻe finangalo e ʻEikí ke u faí. Naʻe kau e ngaahi māhina ne hoko maí he ngaahi taimi fakafiefia taha ʻeku moʻuí, pea hili ʻeku maʻu ha aʻusia maʻongoʻonga ʻi he senitā akoʻanga fakafaifekaú, ne u pehē ʻe tatau pē ia mo e toenga ʻeku ngāue fakafaifekau ʻi ʻĀsenitiná. Ka naʻe ʻikai.

Ne u fefaʻuhi mo e tailiilí, ilifiá, mo e siva ʻa e ʻamanakí ʻi heʻeku ngāue fakafaifekaú—ko ha ngaahi meʻa ne teʻeki ke u aʻusia kimuʻa, naʻa mo e tūkunga ne u aʻusia he taimi ko iá. Naʻe feinga ʻeku palesiteni faka-misioná ʻi he tafaʻaki kotoa pē ke tokoniʻi au. Ka naʻe faifai peá u fili ke u foki ki ʻapi. Naʻe faingofua ke u fakahoko e filí ni he taimi ko iá, ka ʻi ʻapí, naʻe kamata ke u maʻu e ngaahi fehuʻi kotoa ʻi ʻolungá.

Ka ne u ʻilo ʻi he fakalau ʻa e taimí, ʻoku ʻomi fakatouʻosi ʻe he Fakamoʻuí ha fakamoʻui mo ha fakakaukau lelei kapau te ke fekumi fakamātoato kiate kinaua fakatouʻosi. ʻOku ou tui mālohi ʻoku ʻi ai ha lēsoni ke ako ʻi he kotoa ʻo e ngaahi aʻusia ʻo e moʻuí, neongo pe ʻoku nau lelei pe kovi. Pea ʻi he taimi ʻa e ʻEikí, naʻá Ne akoʻi mai ha ngaahi lēsoni mahuʻinga ʻoku ou mataʻikoloa ʻaki he taimí ni.

Ko ha fili totonu ke u ʻalu ʻo ngāue fakafaifekaú. Ka neongo pe ko e hā ha ʻuhinga, naʻe ʻikai fie maʻu ia ke u nofo ai ʻi ha māhina ʻe 18. ʻOku ʻi ai ha palani ʻe taha ʻa e ʻOtuá maʻá ku. ʻOku teʻeki ke u ʻiloʻi kakato e taumuʻa ʻeku moʻuí, ka ʻoku sai pē ia kiate au. Ko e meʻa ʻoku ou ʻiló, ʻoku ou fakahoko e meʻa ʻokú Ne finangalo ke u fai he taimi ní. Lolotonga e māhina ʻe fā ʻo ʻeku ʻi ʻĀsenitiná, naʻe toe loloto ange ʻeku fakamoʻoní mo ʻeku uluí. Ne u fetaulaki mo ha kakai lelei, pea mahalo ne u ʻosi tokonia e ngaahi moʻui naʻá Ne finangalo ke u tokoniʻí. ʻOku ʻikai ke u toe fakaʻiseʻisa ʻi heʻeku aʻusiá pe fakaʻamu ne kehe ha meʻa. Ko e meʻa pē ia ne u fie maʻú pea kuo hoko ia ʻo toputapu kiate au.

Ne u toki lau kimuí ni ha lea ʻa ʻEleta Niila A. Mekisuele (1926–2004) ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻa ia naʻá ne ʻomi ha vakai lelei ange ki heʻeku aʻusiá. Naʻá ne pehē:

“He ʻikai lava ke fakatou maʻu ʻe ha taha  . . . ha moʻui fonu ʻi he tuí pea mo taʻe loto mafasia. . . .

“Ko ia ai, ʻe lava fēfē ke tau ʻamanaki [ʻe] lelei ʻa e meʻa kotoa pē ʻi he moʻuí, ʻo hangē ʻoku tau pehē, ʻʻEiki, tuku ke u aʻusia ʻa e moʻuí kae ʻikai ko e loto-mafasiá, loto mamahí, faingataʻaʻia fakaesinó pe ngaahi meʻa ʻoku tuʻu fehangahangaí, lavakiʻi pea ʻoua foki naʻa liʻekina kitautolu. ʻEiki, ʻoua muʻa naʻa hoko mai kiate au ʻa e ngaahi meʻa ko ia naʻá Ke aʻusia ai Ho tuʻungá! Pea tuku pē ke u foki atu ʻo nofo mo e ʻAfioná ʻo fiefia kakato mo e ʻAfioná!’” (“Lest Ye Be Wearied and Faint in Your Minds,” Ensign, May 1991, 88).

Naʻe ʻikai hokosia ʻe he Fakamoʻuí Hono tuʻungá neongo e ngaahi faingataʻa naʻá Ne fehangahangai mo iá. Naʻá Ne aʻusia Hono tuʻungá koeʻuhí ko e ngaaahi faingataʻa ko iá. Ne nau tokoni ke fakafōtunga Hono ʻulungaanga haohaoá, pea nau foaki kiate Ia ʻa e tuʻunga malava ko ia ke ongoʻi e fiefia ʻokú Ne ongoʻi he taimi ní. ʻOku ou ongoʻi monūʻia ʻi heʻeku maʻu ha aʻusia liliu moʻuí. ʻOku ʻikai ko e meʻa ia ne u kolé; ʻikai ko ʻeku fie maʻú ia; ka ʻoku ʻafioʻi ʻe he ʻOtuá hoku tūkungá, pea ʻokú Ne finangalo ke vahevahe mo au ʻEne fiefiá. Ko e fiefia ko iá ʻoku ʻikai ko ha meʻa ia te u lava ʻo maʻu taʻe te u ʻilo foki ʻa e lotomamahí, mamahí, faingataʻaʻiá, mo e fakafepakí. Naʻe kau ʻeku foki vave ki ʻapí he ngaahi meʻa faingataʻa taha kuó u fouá, ka ʻi heʻeku maʻu ha taumuʻa pea ʻi he tokoni ʻa e Fakamoʻuí, ʻoku hangē ia he taimí ni ha kiʻi ngāue siʻi ki he meʻa ne u maʻu mei aí.

Ko ia ai, tui. Falala ki ho Fakamoʻui. Peá ke maʻu ha ʻamanaki lelei! He ʻikai fakatatau ʻa e moʻuí ki he meʻa naʻá ke palaní. Kuo pau pē ke ʻi ai ʻa e mamahí mo e loto hohaʻá. Ka ʻoku fakatatali mai ʻa e fiefiá kiate koe hili e faingataʻa kotoa pē. Kuó Ne finangalo ke ke maʻu ʻa e fiefiá.