“Te Ke Fie Haʻu ki Hoku Papitaisó?”
ʻOku nofo ʻa e ongo faʻu tohí ʻi Keni, ʻIngilani, mo ʻIutā, USA.
Naʻe fie kaila ʻaki ia ʻe ʻŌliva mei he ʻato ʻo e ngaahi falé ke fanongo ki ai ʻa ʻIngilani kotoa!
“ʻOua naʻa manukiʻi hoʻo kei siʻí ʻe ha taha; ka ke ʻi he kakai tuí ko e fakaʻilonga” (1 Tīmote 4:12).
Ne ʻikai faʻa tatali ʻa ʻŌliva ke ʻosi e uiké. Ko e uike hokó ʻa e ʻaho lahi kuó ne tatali ki ai talu mei heʻene taʻu faá. ʻE papitaiso ai ia.
Naʻe fiefia ʻaupito ʻa ʻŌliva ʻi hono papitaisó peá ne fie maʻu ke kaikaila ʻaki ia mei he ʻato ʻo e ngaahi falé ke fanongo ki ai ʻa ʻIngilani kotoa! Ne ʻikai ke ne faʻa tatali ke talaange ki hono kaungāmeʻa ko Tilení ʻi he ʻapiakó.
“ʻOku ʻikai ke u tui ki ai. Kuo faifai pea mei hoko hoku ʻaho papitaisó,” ko e lea ia ʻa ʻŌlivá. “ʻE fakaʻofoʻofa ia!”
“Naʻá ku pehē ʻe au ko e fanga kiʻi pēpeé pē ʻoku papitaisó.” Naʻe hangē naʻe puputuʻú ʻa Tilení.
Ne talaange ‘e ‘Ōliva, “Kuo pau ke taʻu valu pe lahi ange e fānaú kae toki papitaiso kinautolu ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ko hoku Siasí ia.”
“Tōatu,” ko Tileni ange ia.
Ne fakafokifā pē hono maʻu ʻe ʻŌliva ha foʻi fakakaukau. “Te ke fie haʻu ki hoku papitaisó?”
“ʻIo,” ko Tileni ange ia. “Ka ʻoku fie maʻu ke u ʻuluaki kole ki heʻeku ongomātuʻá.”
“Sai ia!”
Naʻe fiefia ʻa ʻŌliva he mahalo ʻe haʻu ʻa Tileni ki hono papitaisó. Naʻá ne toe maʻu ha fakakaukau ʻe taha. “ʻOku ʻikai ke u fie maʻu ke haʻu pē ha kaungāmeʻa ʻe toko taha ki hoku papitaisó. ʻOku ou fie fakaafeʻi e kakai tokolahi taha te u ala lavá!” Ne fakavavevave atu ʻa ʻŌliva ki honau ʻapí pea talaange ki heʻene Fineʻeikí ʻoku ʻi ai haʻane palani.
ʻI he Sāpate ʻaukai kimuʻa pea papitaiso iá, ne kamata ʻe ʻŌliva ʻene palaní. Naʻá ne vahevahe ʻene fakamoʻoní mei he tuʻunga malangá; pea naʻá ne pehē, “ʻOku papitaiso au ʻi he Tokonaki kahaʻú, pea ʻoku ou fie maʻu ke haʻu e taha kotoa! Kātaki muʻa, te mou lava ʻo fakaafeʻi mai ha taha pē ʻokú ke ʻiloʻi ʻoku ʻikai ko ha mēmipa pe ʻoku ʻikai haʻu ki he lotú, ki hoku papitaisó?” Naʻá ne ongoʻi hangē ko ha faifekau iá. Naʻá ne saiʻia ʻaupito ʻi he ongo ko iá.
ʻI he uike hono hokó, ne fakaafeʻi ʻe ʻŌliva e ngaahi kaungāmeʻá, kau mēmipa ʻo e fāmilí, mo e kau faiakó ki hono papitaisó.
Naʻá ne talaange kiate kinautolu, “Te u fiefia lahi kapau te mou haʻu!”
ʻI he ofi mai ʻa e ʻaho Tokonakí, ne kamata ke fifili ʻa ʻŌliva pe ko e toko fiha nai ʻe haʻú. ʻE fēfē nai kapau te nau fuʻu femoʻuekina kotoa pe ʻikai ke nau fie haʻu?
Naʻá ne fai ha kiʻi lotu nounou ke haʻu pē ha niʻihi tokosiʻi meiate kinautolu naʻá ne fakaafeʻí. Pea ʻikai leva ke ne toe hohaʻa pe ko hai ʻe haʻú. Naʻá ne ʻilo kuó ne fai ha meʻa lelei ʻi hono fakaafeʻi pē kinautolú. ʻIkai ngata aí, ko e meʻa mahuʻinga taha ʻi he ʻaho ko iá, ko hono papitaisó ia.
ʻI heʻene aʻu ki he ʻapisiasí ʻi hono ʻaho papitaisó, ne ʻikai ke mei tui ʻa ʻŌliva ki he meʻa ne mamata ki aí. Ne ʻi ai ha tokolahi hono ngaahi kaungāmeʻá ke poupouʻi ia. Naʻá ne vakai atu foki ki ha falukunga kakai ne ʻikai ke maheni mo ia. Naʻá ne taʻataʻalo atu kia Tileni ʻi heʻene hū mai mo ʻene ongomātuʻá.
ʻI he hokosia e taimi ke papitaiso aí, ne hifo ʻa ʻŌliva ki he vai māmāfaná. Ne puke ʻe heʻene tangataʻeikí hono nimá, ʻo hangē ko ʻena fakaangaangá. Naʻá ne fai leva e kiʻi lotu nounou ʻo e papitaisó pea tuku hifo ʻa ʻŌliva ki he loto vaí. Tuaiekemo, kuo toe tuʻu hake ʻa ʻŌliva—kuo pīponu ka naʻá ne malimali. Naʻá ne ʻiloʻi naʻá ne muimui ki he tā sīpinga ʻa Sīsuú.
Hili e fetongi ʻa ʻŌlivá ki hono vala mātuʻú, naʻe fakamaʻu ia ko ha mēmipa ʻo e Siasí ʻe heʻene tangataʻeikí mo ha kau tangata toko siʻi kehe pea foaki ange ha tāpuaki makehe, ʻa ia naʻa nau fakaafeʻi ia ai ke ne maʻu e Laumālie Māʻoniʻoní. Hili iá, ne kole ʻe ʻŌliva pe ʻe lava ke vahevahe ʻene fakamoʻoní.
“Mālō ʻaupito hoʻomou haʻu ke poupouʻi au he ʻaho makehe ko ʻení. ʻOku ou fiefia lahi ʻaupito ai,” ko ʻŌliva ia. “ʻOku ou houngaʻia ʻi hono papitaiso aú, pea ʻoku ou tui ko e Siasi ʻeni ʻo Kalaisi ʻi he māmaní.”
Hili iá, ne omi e kakaí ʻo talamonū ange kia ʻŌliva.
“Mālō muʻa hono fakaafeʻi aú!” Ko Tileni ange ia. “Naʻá ku ongoʻi loto māfana.”
“Ne angaʻofa e taha kotoa!” Ko e talaange ia ʻe he fineʻeiki ʻa Tilení. “Naʻa mau ongoʻi ne talitali lelei kimautolu.”
ʻI he pō ko iá, ne tangutu hifo e Tangataʻeikí ʻi he veʻe mohenga ʻo ʻŌlivá. “He toki ʻaho fakaʻofoʻofa moʻoni!” Ko e Tangataʻeikí ange ia.
Ne kamokamo pē ʻa ʻŌliva. “ʻOku ou fiefia ʻi heʻeku kau fakataha mo hoku kaungāmeʻá.”