ʻI he Taimi ʻOku Fakamamahi Ai e Piki Maʻú

ʻI ha ʻaho vela lahi ʻe taha ʻi Siulai, naʻá ku langa ai mo hoku tokoua ʻi he fonó ha ʻā ke pukepuke e kelekelé. Ne faifai pea fakafeʻātungiaʻi au ʻe he ngaahi aka ʻo ha fuʻu ʻakau seli matala ne tuʻu ai.

Ne u fakakaukau, “Faingofua pē.”

Ne u tānaki e ʻū meʻangāue totonú peá u keli takai ʻi he ngaahi aká ke fakaʻataʻatā ki he ngāué Hili iá peá u toʻo mai ha mīsini tutuʻu ʻakau, ʻo ʻikai ke u toe fakakaukau, ka u tutuʻu e ngaahi aká. Ne tuʻusi ngofua e ngaahi aka īkí, ka ʻi heʻeku hoko atu ki he ngaahi aka lalahí, ne vave pē ʻeku fakatokangaʻi he ʻikai faingofua pehē ia. Ne mātuʻaki faingataʻa ha foʻi aka ʻe taha.

Naʻá ku ʻūʻū nifo mo vilitaki pē ke tuʻusi e aka ko iá. Ne tafe hifo e pupuhá ʻi hoku kiá mei he vela ʻa e laʻaá ʻi heʻeku puke maʻu e mīsini tutuʻú. Naʻe tetetete e mīsini tutuʻú pea tete ai hoku sinó kotoa. Ne kamata ke u ongoʻi hoku nima toʻomataʻú—ʻa ē naʻá ne puke e meʻa ʻoku moʻui ai e mīsini tutuʻú—ʻoku kamata ke mamahi he velá. Naʻá ku tukunoaʻi e mamahí ka u piki maʻu pē.

Ne faifai peá u tuʻusi e aká. Naʻá ku tukuange e meʻa fakamoʻuí peá u ongoʻi fiefia ʻi he ikuná. Ka ʻi heʻeku toʻo hoku kofunimá, naʻá ku fakatokangaʻi kuo kamata ke mafohi ha kiʻi konga siʻi ʻo e kilí mei hoku nimá.

ʻI heʻeku fakakaukau ki he meʻa kuó u aʻusiá, naʻá ku fakatokangaʻi ko e piki maʻu ki he mīsini tutuʻu ʻakaú, ʻoku hangē ia ko e piki maʻu ki he vaʻa ukameá. ʻOku fie maʻu ke tau piki maʻu ki he vaʻa ukameá ʻi heʻetau fononga ʻi he moʻuí. Ka ʻoku ʻikai ʻuhinga ia he ʻikai ke tau aʻusia ha ngaahi momeniti ʻo e mamahí koeʻuhí ko ʻetau piki maʻu ki aí. Naʻe lavea hoku nimá ʻi heʻeku piki maʻu ki he mīsini tutuʻú. ʻI ha founga tatau, te tau foua ha ngaahi ʻahiʻahi mo e faingataʻa ʻi he hokohoko atu ʻetau piki maʻu ki he vaʻa ukameá.

Ne ʻafioʻi ʻe he Tamai Hēvaní ʻe fonu faingataʻa e fononga ke foki hake kiate Iá. Ko e ʻuhinga ia kuó Ne ʻomi ai kiate kitautolu e folofolá mo e ngaahi lea ʻa e kau palōfitá ke tokoniʻi kitautolú. ʻI heʻetau piki maʻu ki he ngaahi meʻá ni lolotonga hotau ʻahiʻahí mo e ngaahi faingataʻa ʻi he matelié, te tau toe foki hake ha ʻaho ki Hono ʻaó.

ʻI heʻetau foki hake kiate Iá, te tau toe lava ʻo vakai hifo ki hotau nimá, ʻa ia ne piki maʻu ki he vaʻa ukameá, neongo e ngaahi taimi mamahí mo e faingataʻá. Pea te tau ʻiloʻi naʻa tau piki maʻu, ʻi he tokoni ʻa e Tamai Hēvaní pea fakafou ʻi he mālohi fakalelei ʻa Sīsū Kalaisí, ʻo tatau ai pē pe ko e hā e ngaahi faingataʻa naʻa tau fehangahangai mo iá.