Kakai Lalahi Kei Talavoú
He ʻIkai Ngalo ʻIate Ia Hoʻo Ngāué
Ngaahi taá mei he Getty Images
ʻI he ngaahi māhina siʻi kuo hilí, naʻá ku misi ai ʻoku ou tangutu ʻi he lotú ʻi he ʻotu fakamuimuitahá ʻo hangē ko e angamahení, pea ʻikai haʻaku fie kau atu, ka naʻe liliu ʻeku vīsoné. Naʻá ku vakai atu ʻoku ʻi he haʻofangá ha kau faifekau ne nau foki mai ʻoku teʻeki ke nau ʻosi. Ne tupulaki ʻi hoku lotó ha holi ke tokoniʻi kinautolu ʻi heʻeku vakavakai holó. Ne u ʻiloʻi ʻe lava ke hoko hono vahevahe ʻo ʻeku aʻusiá ko ha founga ia ʻo e ngāue fakaetauhi kiate kinautolu mo tokoniʻi kinautolu ke nau hokohoko atu ʻi he hala ʻo e fuakavá neongo e kiʻi fakafeʻātungia ko ʻeni ʻi he hala fonongá.
Ne fakahaaʻi mai ʻe he Tamai Hēvaní ʻi he misi ko ʻení ʻokú Ne ʻafio mai. ʻOku hounga kiate Ia ʻa e ngāue angatonu ʻoku tau fai ko e kau faifekaú, neongo pe ko e hā hono lōloa ʻo ʻetau ngāue taimi kakató. “He ʻoku ʻikai taʻeangatonu ʻa e ʻOtuá, ke ne fakangaloʻi hoʻomou ngāué mo e feinga ʻofá, ʻa ia kuo mou fakahā ki hono huafá” (Hepelū 6:10). ʻI heʻeku fakamatalá (vakai ki he peesi 47), ʻoku ou vahevahe ai ha talanoa ʻi he folofolá mo e ngaahi aʻusia ʻa e kau faifekau kehe ne nau foki teʻeki ʻosí ʻa ia ʻe lava ke tokoni atu ke ke fonongaʻia e hala taʻeʻamanekina mo faingataʻa ko ʻení. ʻOku ou saiʻia ʻi hono fakaʻaongaʻi ʻe ʻAleki ha talanoa mei he Tohi ʻa Molomoná ke tokoniʻi kitautolu ke ʻiloʻi ʻoku ʻi ai e ʻamanaki lelei ʻo aʻu kiate kinautolu ʻoku foki vave mai ki ʻapi koeʻuhi ko e tuʻunga moʻui tāú (vakai peesi 44)
Te ke lau ʻi he ngaahi fakamatala fakaʻilekitulōniká pē ʻa e founga naʻe liliu ai ʻe ʻEmelī e ongoʻi hohaʻá, ilifiá, mo e siva ʻa e ʻamanakí ki ha fiefia toputapu mo fakataautahá. ʻOku ʻoatu foki ʻe Kēvini, ko ha faifaleʻi fakapalōfesinale, ha ngaahi fokotuʻu ki he founga ʻe lava ke poupouʻi ai ʻe he kakai ʻoku nau ʻofa aí ʻa kinautolu ʻoku fefaʻuhi mo e foki vave mai ki ʻapí.
ʻOku ʻikai mahuʻinga e ʻuhinga ʻoku tau foki aí ka ko e meʻa ʻoku tau fai ʻi heʻetau foki ki ʻapí. ʻI he tokoni ʻa e Fakamoʻuí, te tau lava ʻo moʻui, fakalakalaka, mo hokohoko atu ke maʻu e fiefia lahi ange ʻi heʻetau fononga taʻengatá.
Fakaʻapaʻapa atu,
Liahona Ficquet