Ko e Lea Fakaʻosí
Ko e Hā Te Ke ʻIlo ʻi he Tohi ʻa Molomoná?
Fai ʻe ʻEletā Gary E. Stevenson
ʻO e Kōlomu ʻo e Kau ʻAposetolo ʻe Toko Hongofulu Mā Uá
Mei ha lea ʻi he konifelenisi lahi ʻo ʻOkatopa 2016.
ʻOku ou sioloto atu ki haʻamou kumi ha taimi mo ha feituʻu lōngonoa ke lau ai e Tohi ʻa Molomoná, ʻoku ou sioloto atu ki haʻo maʻu e ngaahi talí, ongoʻi hano tataki koe, pe maʻu haʻo fakamoʻoni pē ʻaʻau ki he Tohi ʻa Molomoná pea mo Sīsū Kalaisi.
Te ke lau e tohi pelepelengesí ni pea te ke fetaulaki ai mo ho Fakamoʻui ʻofeiná, ʻa e ʻEiki ko Sīsū Kalaisí, ʻi he meimei peesi kotoa pē. ʻOku fakafuofua ʻoku meimei fakaʻaongaʻi Hono huafá ʻi he ʻavalisi ko e veesi ʻe 1.7 kotoa pē.1 Naʻa mo Kalaisi tonu ē naʻá Ne fakamoʻoniʻi ʻa hono moʻoní ʻi he ngaahi ʻaho fakaʻosí ni Heʻene folofolá, “Pea hangē ʻoku moʻui ʻa homou ʻEikí mo homou ʻOtuá ʻoku moʻoni ia” (Tokāteline mo e Ngaahi Fuakava 17:6).
ʻOku ou fakafetaʻi ko e fakaafe pea mo e talaʻofa naʻe fai ʻe he ʻEikí ʻi he palōfita ko Molonaí ki he taha kotoa pē ʻo kimoutolu—pea ki he taha kotoa ʻokú ne lau e Tohi ʻa Molomoná. ʻOku ou fakaʻosi ʻaki ʻa e fakaafé ni mo e talaʻofa pea tānaki atu mo ʻeku fakamoʻoní: “Pea ʻi hoʻomou maʻu ʻa e ngaahi meʻá ni [ʻa e Tohi ʻa Molomoná], ʻoku ou fie naʻinaʻi kiate kimoutolu ke mou kole ki he ʻOtua, ko e Tamai Taʻengatá, ʻi he huafa ʻo Kalaisí, pe ʻoku ʻikai ke moʻoni ʻa e ngaahi meʻá ni; pea kapau te mou kole ʻi he loto-fakamātoato, mo e loto-moʻoni, ʻo maʻu ʻa e tui kia Kalaisí, te ne fakahā ʻa hono moʻoní kiate kimoutolu, ʻi he mālohi ʻo e Laumālie Māʻoniʻoní” (Molonai10:4; vakai foki, veesi 3, 5).
ʻE hanga ʻe he ngaahi moʻoni te ke maʻu ʻi he Tohi ʻa Molomoná ʻo langaki hake mo ueʻi fakalaumālie koe. Te nau fakamālohia hoʻo tuí, fakafonu hoʻo moʻuí ʻaki ha maama pea mo teuteuʻi koe ki ha kahaʻu he ʻikai faʻa malava ke mahino kiate koe.
Te ke ʻiloʻi ʻi he tohí, ʻa e ʻofa taʻefakangatangata mo e ʻaloʻofa taʻemafakamatalaʻi ʻa e ʻOtuá. ʻI hoʻo feinga ke muimui ki he ngaahi akonaki ʻo e tohí, ʻe lahi ange hoʻo fiefiá, tupulaki hoʻo mahinó pea ʻe ʻoatu ai mo e ngaahi tali ʻokú ke fekumi ki ai ki he ngaahi faingataʻa ʻo e moʻui fakamatelié. ʻI hoʻo tafoki ki he tohí, ko hoʻo tafoki ia ki he ʻEikí.