ʻOku ou vaʻinga volipolo, lele, mo laukonga lahi.Kapau ʻe lava ke fakamoleki hoku ʻahó ke fai ha faʻahinga meʻa, mahalo te u ʻalu ki he matātahí.
Naʻe fāʻeleʻi au ʻi Sikākou, ʻIlinoisi, ka naʻá ku haʻu ki Nāvū ʻi heʻeku kei ʻi he ʻapi ʻo e kau paeá. ʻOku ʻikai lahi ha meʻa ʻoku ou manatuʻi fekauʻaki mo ʻeku moʻuí ki muʻa peá u ʻi he ʻapi ʻo e kau paeá, ka ʻoku ou manatuʻi ʻa e ʻikai ke u ongoʻi malú. ʻI heʻeku ʻi he ʻapi ʻo e kau paeá, naʻá ku ongoʻi malu. ʻOku ou fiefia ʻi hono maʻu ʻo e ongoongoleleí. Kuo tofanga ha niʻihi ʻo hoku ngaahi kaungāmeʻá ʻi ha ngaahi tūkunga fakailifia koeʻuhí ko e ʻikai ke nau muimui ki heʻetau ngaahi tuʻunga moʻuí. ʻOku ou ʻiloʻi ʻoku maluʻi au ʻe hono tauhi ʻo e ngaahi fekaú.
Ko ha aʻusia fakafiefia ia ke maʻu hoku fāmilí. Naʻe haʻu ʻeku fineʻeikí ki he ako tokamuʻa naʻá ku ʻi aí he naʻá ne faiako talifaki ai. Naʻá ma vaʻinga, peá ne talaange ki ha taha ʻo e kau faiakó naʻá ne fie ʻave au ki ʻapi he naʻá ku fakaʻofoʻofa ʻaupito. Naʻe pehē ʻe he faiakó, “ʻOku fie maʻu ke ohi ia, pea mahalo pē!” Naʻe vakaiʻi ia ʻe heʻeku fineʻeikí peá ne ohi au mo hoku ongo tuongaʻané. ʻOku fakalata he ʻoku ou ʻiloʻi e ongo ʻo e ʻikai ha fāmilí, pea ʻokú ne ʻai ke makehe ange e maʻu ʻo ha fāmilí.