Ko Hono Siasí Ia
Fai ʻe ʻEletā Taniela B. Wakolo
ʻO e Kau Fitungofulú
“ʻOku totonu ke mou ʻai kiate kimoutolu ʻa e huafa ʻo Kalaisí” (3 Nīfai 27:5).
Naʻe fāʻeleʻi au ʻi Fisi. Ne ʻikai kau ʻeku ongomātuʻá ki he Siasí, ka naʻá na ʻalu ki ha siasi ʻe taha.
ʻI heʻeku tupu haké, naʻá ku mali mo hoku uaifi ko ʻĀnitá. Naʻá ne hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ne toutou fakaafeʻi e ongo faifekaú ke talanoa mo au.
ʻI ha ʻaho ʻe taha naʻá ku talaange ai te na lava ʻo omi he taimi maʻu meʻatokoni efiafí ʻi he pō ʻe tolu ka hokó. Naʻá ku talaange kuo pau ke na fakaʻaongaʻi ʻa e ko e Tohi Tapú ke tali ʻaki ʻeku ngaahi fehuʻí. Naʻe haohaoa ʻena ngaahi talí. ʻI he pō hono tolú, naʻá na fai mai ha fehuʻi kiate au.
“Kapau ne ʻi ai hao falekoloa, ko e hā e hingoa te ke ui ʻakí?”
Naʻá ku tali ange, “Te u ui ia ko e Falekoloa ʻo e Fāmili Uakoló koeʻuhí he ko hoku falekoloa ia.”
Naʻá na fehuʻi mai, “Ko hai ʻoku totonu ke fakahingoa ki ai ha Siasi?”
Ko ha fehuʻi lelei ia. Pea naʻá ku ʻiloʻi e talí ʻi hoku lotó mo hoku laumālié. Ko e Siasi moʻoní ʻe fakahingoa ia kia Sīsū koeʻuhí he ko Hono Siasi. Pea ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní naʻe fakahingoa ia kiate Ia!
Ne toe pē haʻaku fehuʻi ʻe taha: “ʻE papitaiso fakakū au?” Hili ha uike ʻe taha mei ai, ne papitaiso au.
ʻI hono papitaiso aú, naʻá ku toʻo kiate au ʻa e huafa ʻo Sīsū Kalaisí. ʻOku ʻuhinga ia naʻá ku hoko ko ha mēmipa ʻo Hono Siasí mo palōmesi ke muimui kiate Ia. ʻOku ou fai hoku lelei tahá he ʻaho kotoa ke moʻui ʻo hangē ko Iá. ʻOku ou ʻiloʻi ko e Siasi moʻoni eni ʻo Sīsū Kalaisí.