Ako, Lau, Fakamanatu, Lotu. Toe Fakahoko Ia.

ʻĪmisi

study, read, review, pray

Tā fakatātā ʻa Adam Howling

ʻI Silei, kuo pau ke ke sivi hū ʻunivēsiti kae lava ke ke toki hū ki ha ʻunivēsiti. Naʻá ku fie ako fakaʻenisinia ʻi ha ʻunivēsiti naʻe mamaʻo mei he feituʻu naʻá ku nofo aí. ʻE fuʻu mamafa ʻaupito ia, pea ko ʻeku taumuʻá ke maʻu e maaka māʻolunga taha ʻe ala lavá ʻi he sivi hū ko ʻení kae lava ke maʻu haʻaku sikolasipi ki he maaka maʻolungá.

Naʻá ku ʻiloʻi e feituʻu mo e meʻa naʻá ku fie akó, pea naʻá ku ʻiloʻi e meʻa ke u fai kae lava ke hoko ai iá. Ne kamata ʻeku teuteu ki he siví. Naʻá ku ako, lau, mo fakamanatu e naunaú, ka ʻi he ngaahi sivi fakaangaangá, ne ʻikai pē ke u maʻu e maaka naʻá ku fie maʻú. Naʻá ku hanga hake ki heʻeku Tamai Hēvaní ʻi he faʻa lotu mo kole kiate Ia ha poto lahi ange pea ke fakamaama hoku ʻatamaí kae lava ke u aʻusia ʻeku taumuʻá. Naʻá ku lotu fakaʻaho ki he meʻá ni ʻi ha taʻu kakato ʻe taha. Naʻá ku kau atu ki ha ngaahi kalasi teuteu makehe ʻi hoku ʻapiakó, pea naʻá ku kau ki ha ngaahi kalasi ʻi ha ʻapiako naʻe fakataumuʻa ki hono teuteuʻi ki he siví.

Naʻá ku tauhi ʻeku ako fakaʻaho ʻo e folofolá, pea naʻe teʻeki ai ke u nofo tuʻo taha ha ʻaho mei he seminelí. Naʻá ku fakakakato hoku ngaahi fatongia Lakanga Taulaʻeiki Faka-ʻĒloné pea ʻikai ke u teitei ako ʻi he ngaahi ʻaho Sāpaté, ʻo tatau ai pē pe naʻe faingataʻa fēfē e tūkunga ne u ʻi aí. Naʻá ku ʻiloʻi ko e Sāpaté ko e ʻaho ia ʻo e ʻEikí, pea naʻá ku fie maʻu ke fakaʻapaʻapaʻi ia ʻi he founga naʻe akoʻi au ki ai ʻe heʻeku ongomātuʻá. Naʻá ku ʻiloʻi he ʻikai lava ke u toʻo meiate au e ngaahi tāpuaki ʻa e Tamai Hēvaní maʻakú, tautautefito ki he taimi naʻá ku fie maʻu lahi taha ai kinautolú. Ka neongo kotoa ia, ne ʻikai ke u maʻu e maaka naʻá ku fie maʻú ʻi heʻeku sivi fakaangaangá.

Naʻá ku lotu mo ʻaukai mo hoku fāmilí, pea tāpuakiʻi au ʻe heʻeku tangataʻeikí. Naʻá ku fakahoko e siví ʻaki e teuteu fakalaumālie ko ení mo e ngaahi teuteu kehe naʻá ku faí. Ne ʻikai ngata pē ʻi heʻeku maʻu e maaka naʻá ku fie maʻú, ka naʻá ku fakalaka ʻi heʻeku taumuʻá ʻo maʻu e taha ʻo e ngaahi maaka māʻolunga taha ʻe lava ke maʻu ʻi he konga ki he fiká. Naʻá ku maʻu e ngaahi sikolasipí mo e ngaahi meʻa lelei naʻá ku fie maʻú, pea naʻe lava ke u ako ʻi he ʻunivēsiti naʻá ku filí.

Talu mei heʻeku kei talavoú, naʻá ku ako kapau te u fai e meʻa kotoa pē te u lavá mo tomuʻa tokangaʻi hoku ngaahi fatongia fakalaumālié, ʻe tāpuekina au ʻe he Tamai Hēvaní. He ʻikai hoko maʻu pē e meʻa kotoa ʻo fakatatau ki heʻetau ʻamanakí, ka ʻe tokangaʻi kitautolu ʻe he ʻOtuá. ʻOku ou ʻiloʻi ko ʻEne tokoní pē ʻe malava ai e meʻa kotoa pē.