Mālō e Lelei mei Kemipoutia!

ʻĪmisi

Hello from Cambodia

Mālō e lelei, ko Paulo au. Pea ko Mākō ʻeni.

ʻOkú ma ʻaʻahi ki Kemipoutia. Ko e meʻa ʻeni kuó ma ʻiloʻí!

Ko Kemipoutiá ko ha fonua ia ʻi he Tonga-hihifo ʻo ʻĒsiá. ʻOku fakafuofua ki ha kakai ʻe 15 miliona ʻoku nofo aí, mo ha kau mēmipa ʻe toko 14,000 ʻo e Siasí.

Ko ha Tohi ʻa Molomona faka-Kemipoutia ‘eni. Ko e lea faka-Kemipoutiá ʻoku ui ko e Khmer (kuh-MY). ʻOku mataʻitohi ʻe 74 ʻenau ʻalafapetí—ko e lahi taha ia ʻi he ʻalafapeti he māmaní!

ʻOku fakafeʻiloaki e kāingalotu ʻo e Siasi ko ʻení ʻi he founga tukufakaholo faka-Kemipoutiá, ʻoku ui ko e sampeah. Ko e māʻolunga ange ho nimá, ko e lahi ange ia ʻo e fakaʻapaʻapa ʻokú ke fakahāʻí.

Ko e tokolahi taha ʻo e fānau ʻi Kemipoutiá ʻoku nau ʻalu ki he akó mo e lotú ʻi ha paiki mo ha taha ʻo ʻenau mātuʻá. Pe ko haʻanau heka ʻi ha tuk tuk—ko ha kiʻi fakapalepale ʻoku taulaniʻi ʻe ha paiki.

ʻOku fakaʻaongaʻi lahi ʻi he meʻakai faka-Kemipoutiá ʻa e prahok, ko ha kilimi ika ʻoku mahi mo kona. Naʻe ngaohi ʻe he kāingalotu ʻo e Siasí ha fuʻu kulo supo lahi ke kai fakataha ʻi he senitā fakasiteikí ʻi he vahaʻataimi ʻo e ngaahi sēsini konifelenisi lahí.

ʻOku tokolahi ha fānau Palaimeli ʻi Kemipoutia ko kinautolu pē ʻa e kau Kalisitiane ʻi honau ʻapiakó. ʻOku hoko ʻení he ko e tokolahi taha ʻo e kakai ʻi Kemipoutiá ʻoku nau kau ki ha tui fakalotu ʻoku ui ko e lotu faka-Putá. ʻOku akoʻi kinautolu ʻe heʻenau tui fakalotú ke nau faitotonu, faʻa fakamelino, mo fakapotopoto. Ko ha maka fakamanatu Puta ʻiloa ʻeni ʻi Kemipoutia ʻoku ʻaʻahi ki ai e kakai mei he funga ʻo e māmaní kotoa.

Naʻe fanongonongo ʻe Palesiteni Nalesoni he taʻu kuo ʻosí ʻe langa e fuofua temipale ʻo Kemipoutiá ʻi Fenomi Peni, ʻa e kolomuʻá! ʻE tokoni e temipalé ke silaʻi fakataha ki he taʻengatá e ngaahi fāmili hangē ko ʻení.

Fakamālō atu ʻi hoʻo fie mamataʻi ʻa Kemipoutia mo kimauá. Tau toki sio!