“Ny hazon’aina,” Tantara ao amin’ny Bokin’i Môrmôna (2023)
“Ny hazon’aina,” Tantara ao amin’ny Bokin’i Môrmôna
Ny hazon’aina
Ilay nofin’i Lehia izay azo avy amin’ny fitaomam-panahy
Indray alina dia niaina nofy avy amin’ny Tompo i Lehia. Noresahany tamin’ny fianakaviany ny momba ilay nofy.
Tao anatin’ny nofiny dia nahita lehilahy iray nanao akanjo fotsy lava i Lehia. Nasain’ilay lehilahy nanaraka azy i Lehia.
Nahita ny tenany tao anaty haizina sy toerana foana i Lehia. Nandeha an-tongotra nandritra ny ora maro izy. Saingy tsy nisinda ilay haizina. Nony farany dia nivavaka mba hahazoana fanampiana i Lehia.
Rehefa nifarana ny vavak’i Lehia dia nahita saha midadasika iray izy. Tao amin’io saha io dia nisy hazo iray nahitana voankazo miloko fotsy. Nieritreritra i Lehia fa hahatonga azy ho sambatra io voankazo io ka dia nihinana izany izy. Heniky ny fifaliana ny fanahiny.
Natsiro nihoatra izay voankazo rehetra hafa ilay voankazo. Mamy sy natsiro izany. Te hizara izany amin’ny fianakaviany i Lehia. Fantany fa hahatonga azy ireo ho sambatra koa izany. Nahita an’i Sarià sy i Samy ary i Nefia nijoro teo akaikin’ny renirano iray i Lehia. Toa ireny very ireny izy ireo. Niantso azy ireo tamin’ny feo mafy i Lehia. Nasainy nanatona sy nihinana ilay voankazo izy ireo.
Nanatona teny amin’ilay hazo sy nihinana ilay voankazo i Sarià sy i Samy ary i Nefia. Nitady an’i Lamàna sy i Lemoela i Lehia. Tiany mba hihinana ilay voankazo koa izy ireo. Saingy tsy nandroso mba hihinana ilay voankazo izy ireo.
Avy eo dia nahita lalana misy anja-by izay mitondra mankeny amin’ilay hazo i Lehia. Nahita olona maro nandeha teo amin’ilay lalana izy. Tampoka teo dia indro nisy zavona matevina. Nanasarotra ny fahitana ny manodidina ilay haizina. Ny hany fomba hahatongavana eny amin’ilay hazo dia ny fifikirana amin’ilay anja-by.
Nisy olona sasantsasany nandao ilay lalana ka very. Ny hafa kosa dia namikitra ilay anja-by ary nandroso hatrany.
Rehefa tonga teo amin’ilay hazo izy ireo dia nihinana ny voankazo.
Nitraka i Lehia ary nahita trano lehibe iray feno olona maro. Nihomehy ireo olona izay nihinana ny voankazo izy ireo. Ny sasany tamin’ireo izay nihinana ny voankazo dia tsy nahazo aina rehefa nihomezan’ny hafa, koa dia niala teo amin’ilay hazo izy ireo. Nirenireny teny izy ireo ka very.
Tao amin’ny nofiny i Lehia dia nahita olona betsaka kokoa hihazona mafy ilay anja-by. Nandroso tsikelikely izy ireo mandra-pahatongan’izy ireo teo amin’ilay hazo. Avy eo izy ireo dia nandohalika teo amin’ilay hazo ary nihinana ny voankazo. Tsy nihaino ireo olona tao anatin’ilay trano lehibe izy ireo. Nisafidy ny hijanona teo amin’ilay hazo izy ireo.
Rehefa nifoha i Lehia dia niahiahy ny amin’i Lamàna sy i Lemoela izy. Tsy nihinana ny voankazo tao amin’ilay nofiny izy ireo. Tian’i Lehia i Lamàna sy i Lemoela. Nanantena izy fa hijanona hanakaiky ny Tompo izy ireo. Nanasa azy ireo izy mba hitandrina ny didin’ Andriamanitra.