“I Gideôna sy i Almà ary i Nehôra,” Tantara ao amin’ny Bokin’i Môrmôna (2023)
“I Gideôna sy i Almà ary i Nehôra,” Tantara ao amin’ny Bokin’i Môrmôna
I Gideôna sy i Almà ary i Nehôra
Miaro ny fahamarinana amin’ny alalan’ny tenin’ Andriamanitra
Nisafidy an’i Almà Zanany mba ho lohan’ny mpitsara teo anivon’izy ireo ny Nefita. Mpisorona avon’ny Fiangonana ihany koa i Almà.
Nisy lehilahy iray nantsoina hoe Nehôra izay nanomboka nampianatra ny vahoaka zavatra iray izay nantsoiny hoe ny tenin’ Andriamanitra. Saingy nampianatra ny vahoaka izy fa tsy voatery hankatò an’ Andriamanitra sy hibebaka izy ireo.
Olona maro no tia sy nino ny zavatra nolazain’i Nehôra. Tiany ny olona hanome vola azy sy hidera azy. Nihevitra izy fa tsara kokoa noho ny olona hafa. Nanangana ny fiangonany manokana izy ary olona maro no nihaino azy.
Indray andro dia nihaona tamina olona efa zokiolona antsoina hoe Gideôna i Nehôra. Mpampianatra tao amin’ny Fiangonan’ Andriamanitra i Gideôna ary efa nanao zavatra tsara maro. Tian’i Nehôra ny olona hiala amin’ilay Fiangonana, koa dia niady hevitra tamin’i Gideôna izy. Nampiasa ny tenin’ Andriamanitra i Gideôna mba hampisehoana fa tsy nampianatra ny fahamarinana i Nehôra. Tezitra i Nehôra! Novonoiny tamin’ny sabany i Gideôna.
Nentin’ny vahoaka teo anatrehan’i Almà mba hotsaraina i Nehôra. Niezaka niaro ny zavara nataony i Nehôra. Tsy te ho voasazy izy.
Nilaza i Almà fa ireo fampianaran’i Nehôra dia diso ary mety hanimba ny olona. Nanaraka ny lalàna i Almà. Satria novonoin’i Nehôra i Gideôna, dia nohelohina ho faty i Nehôra.
Talohan’ny nahafatesany dia nilaza tamin’ny vahoaka i Nehôra fa nandainga izy. Tsy nampianatra ny tenin’ Andriamanitra izy. Na dia nilaza aza i Nehôra fa diso izy, dia olona maro no nanaraka azy. Nandainga tamin’ny vahoaka mba hahazoana laza sy vola izy ireo. Saingy nihaino an’i Almà kosa ny olona sasany. Nikarakara ny mahantra sy nitandrina ny didin’ Andriamanitra izy ireo.