“Mpanompovavy Nefita iray,” Tantara ao amin’ny Bokin’i Môrmôna (2023)
Mpanompovavy Nefita iray
Manampy amin’ny fiarovana ny olony
Nisy mpanompovavy iray niasa ho an’ny mpitarika Nefita iray antsoina hoe Môriantôna. Niteraka korontana teo anivon’ny vahoaka i Môriantôna. Nanafika andiana Nefita izy ary niezaka naka ny tanin’izy ireo. Avy eo izy dia nikasa ny hianavaratra niaraka tamin’ny olony haka tany any.
Indray andro dia tezitra tamin’ilay mpanompovavy i Môriantôna. Tena nampijaly azy mafy sy nanafintohina azy izy. Nandositra ilay mpanompovavy ary nihazakazaka nankany amin’ny tobin’ny Kapiteny Môrônia. Notantarainy tamin’i Môrônia ireo zavatra ratsy nataon’i Môriantôna. Nino azy i Môrônia.
Nilaza ihany koa ilay mpanompovavy fa te-hiala sy haka an-keriny ny tany avaratra i Môriantôna. Nanahy i Môrônia. Mety ho tandindomin-doza ny Nefita raha ohatra ka azon’i Môriantôna ny tany avaratra. Mety hahatonga ny vahoaka hamoy ny fahafahany izany.
Nandefa tafika hanakana an’i Môriantôna i Môrônia. Niady tamin’ilay tafika ny vahoakan’i Môriantôna dia resy. Nampanantena izy ireo fa hilamina ary hiverina any amin’ny taniny. Noho ny fampitandreman’ilay mpanompovavy an’i Môrônia dia voaro hatrany ireo tanànan’ny Nefita.