“Kapiteny Môrônia sy Zerahemnà,” Tantara ao amin’ny Bokin’i Môrmôna (2023)
Kapiteny Môrônia sy Zerahemnà
Ady iray sy fampanantenana hiaina am-pilaminana
I Zerahemnà no mpitarika ny tafika Lamanita. Naniry ny hanapaka teo amin’ny Nefita sy hanao azy ireo ho mpanompo ny vahoakany izy. Nitarika ny miaramilany hanafika ny Nefita i Zerahemnà.
Te hiaro ny fonenany sy ny fianakaviany ary ny fivavahany ny Nefita. Fantatr’izy ireo fa tsy ho afaka hitsaoka ny Tompo izy ireo raha toa ka manapaka eo amin’izy ireo ny Lamanita. Nisafidy ny hiady amin’ny fahavalony ny Nefita.
Lehilahy iray antsoina hoe Môrônia no kapitenin’ny miaramila Nefita. Nataon’i Môrônia izay hahavonona hiady ny miaramilany.
Nitondra fitaovam-piadiana ny miaramilan’i Môrônia, ary nomen’i Môrônia fiarovana sy ampinga matanjaka izy ireo ho fiarovana azy ireo.
Nentin’i Môrônia hiady amin’ny Lamanita ny miaramilany. Saingy rehefa hitan’ireo Lamanita fa nanana fiarovana sy ampinga ny Nefita dia natahotra hiady izy ireo. Ny Lamanita dia tsy nanana afa-tsy akanjo manify ary tsy nisy fiarovana fitafy niaro azy ireo.
Nitsoaka ny Lamanita. Niezaka nitsofotsofoka nankany amin’ny tany Nefita hafa izy ireo. Nihevitra izy ireo fa tsy ho fantatr’i Môrônia ny toerana nalehan’izy ireo.
Saingy raha vantany vao lasa ny Lamanita dia nandefa mpitsikilo hanaraka azy ireo i Môrônia.
Avy eo dia nandefa hafatra ho an’ny mpaminany Almà i Môrônia. Tiany hanontany ny Tompo i Almà ny amin’izay nokasain’ny Lamanita hatao. Nilaza tamin’i Almà ny Tompo fa nikasa ny hanafika tany tsy matanjaka antsoina hoe Mantia ny Lamanita. Nihaino an’i Almà i Môrônia. Nitarika ny miaramilany hiady amin’ny Lamanita izy.
Niady ireo tafika. Nahery be sady tezitra mafy ireo Lamanita. Lasa natahotra ny Lamanita ny Nefita ka mby nandositra. Saingy nampahatsiahy azy ireo ny amin’ny fianakaviany sy ny finoany i Môrônia, ka dia nanohy niady izy ireo.
Nangataka fanampiana tamin’ny alalan’ny vavaka tamin’ny Tompo ny Nefita. Namaly ny vavak’izy ireo ny Tompo ary nanome azy ireo hery lehibe. Natahotra amin’izay ny Lamanita. Voafandrika izy ireo ka tsy afa-nandositra. Rehefa hitan’i Môrônia fa natahotra ny Lamanita dia nilaza tamin’ny miaramilany izy mba tsy hiady intsony. Tsy te hamono ny Lamanita i Môrônia.
Nilaza tamin’i Zerahemnà i Môrônia fa afaka mandeha ny Lamanita raha mampanantena fa tsy hiady amin’ny Nefita intsony izy ireo. Tezitra i Zerahemnà ary niezaka nanohy ny ady, saingy tsy naharesy ny miaramilan’i Môrônia izy. Avy eo dia nampanantena ny hiaina amim-piadanana i Zerahemnà sy ny miaramilany, ary navelan’i Môrônia handeha izy ireo.