“I Almà sy i Amioleka tao am-ponja,” Tantara ao amin’ny Bokin’i Môrmôna (2023)
I Almà sy i Amioleka tao am-ponja
Finoana ny Tompo mandritra ny fotoan-tsarotra
Nampianatra ny filazantsara tao amin’ny tanànan’i Amônihà i Almà sy i Amioleka. Ny olona sasany dia nino ny Tompo ary nibebaka. Fa ny olona maro sasany dia tezitra tamin’i Almà sy i Amioleka ary naniry ny hanimba azy ireo. Nofatoran’ireo vahoaka tezitra i Almà sy i Amioleka dia noentin’izy ireo tany amin’ny tanànan’ny lohan’ny mpitsara izy roa lahy.
Tsy nino ilay lohan’ny mpitsara hoe nila nibebaka ny vahoakany. Tezitra tamin’i Almà sy i Amioleka ny vahoaka. Nalefan’izy ireo hiala ny tanàna ireo lehilahy nino ny zavatra nampianarin’i Almà sy i Amioleka. Avy eo dia natsipin’izy ireo tao anaty afo ireo vehivavy sy ankizy nino ny Tompo.
Nalahelo fatratra i Amioleka raha nahita ny vahoaka ory. Nangataka an’i Almà izy mba hampiasa ny herin’ Andriamanitra hanavotana azy ireo. Saingy nilaza i Almà fa tsy navelan’ny Fanahin’ Andriamanitra izy. Nilaza tamin’i Amioleka izy fa hiaraka amin’ny Tompo ireo vehivavy sy ankizy. Hitsara ireo olona namono azy ireo ny Tompo.
Nanaraby an’i Almà sy i Amioleka ny lohan’ny mpitsara satria tsy niaro an’ireo vehivavy sy ankizy ny Tompo. Nalefany tany am-ponja i Almà sy i Amioleka.
Afaka telo andro dia nandeha tany am-ponja ilay lohan’ny mpitsara niaraka tamin’ireo mpisorona sandony. Nametraka fanontaniana maro izy ireo. Saingy tsy novalian’i Almà sy i Amioleka izy ireo.
Nampijalian’ny lohan’ny mpitsara sy ny mpisorony i Almà sy i Amioleka. Tsy nomen’izy ireo sakafo na rano ihany koa i Almà sy i Amioleka. Ary nihomehezan’izy ireo ny zavatra nampianarin’i Almà sy i Amioleka.
Nijaly nandritra ny andro maro i Almà sy i Amioleka. Tonga indray ny lohan’ny mpitsara niaraka tamin’ireo mpisorony. Nilaza tamin’i Almà sy i Amioleka izy fa raha nanana ny herin’ Andriamanitra izy ireo dia tokony ho nanapaka ireo tady izay namatotra azy ireo. Dia hino azy ireo izy.
Nahatsapa ny herin’ Andriamanitra i Almà sy i Amioleka. Nitsangana izy ireo. Nanam-pinoana ny Tompo i Almà ary nangataka hery hanapaka ny tady.
Notapahan’i Almà sy i Amioleka ny tady. Natahotra ilay lohan’ny mpitsara sy ireo mpisorony. Niezaka nitsoaka izy ireo saingy nanomboka nihozongozona ny tany.
Nirodana teo amin’ilay lohan’ny mpitsara sy ny mpisorony ny rindrin’ny fonja, dia maty izy ireo. Narovan’ny Tompo kosa anefa i Almà sy i Amioleka. Raha vao ren’ny vahoaka ilay feo dia nihazakazaka izy ireo nijery ny zavatra nitranga. I Almà sy i Amioleka irery no nivoaka an’ilay fonja. Natahotra mafy an’i Almà sy i Amioleka ny vahoaka ka nitsoaka.