“Tafio-drivotra teny an-dranomasina,” Tantara ao amin’ny Bokin’i Môrmôna (2023)
“Tafio-drivotra teny an-dranomasina,” Tantara ao amin’ny Bokin’i Môrmôna
Tafio-drivotra teny an-dranomasina
Mahita fiadanana ao amin’ny Tompo
Nilaza tamin’i Lehia ny Tompo fa tonga amin’izay ny fotoana hidirana ao amin’ilay sambo. Nivatsy sakafo be dia be hohanina rehefa mamakivaky ny ranomasina ireo fianakaviana. Avy eo izy ireo dia niditra tao amin’ilay sambo ary nandeha nankany amin’ny tany nampanantenaina.
Taorian’ny andro maro teny an-dranomasina dia nanomboka naneho tsy fanajana sy tsy nahalala fomba ny olona sasany. Hadinon’izy ireo fa nanampy azy ireo ny Tompo.
Nanahy i Nefia fa mety hahatezitra ny Tompo izy ireo. Raha tsy misy ny fanampian’ny Tompo dia ho tandindomin-doza ny sambon’izy ireo. Nangataka ireo rahalahiny i Nefia mba hanajanona ny zavatra nataony.
Tezitra tamin’i Nefia i Lamàna sy i Lemoela. Nofatoran’izy ireo izy ary naneho haratsiam-panahy taminy izy ireo. Tsy nankatò ny Tompo izy ireo ary dia nijanona tsy nandeha intsony ny Liahônà. Vetivety foana dia nisy tafio-drivotra tonga. Taorian’ny telo andro tao anaty tafio-drivotra dia natahotra daholo izy ireo hoe hilentika.
Nitalaho tamin’i Lamàna sy i Lemoela ny fianakavian’i Nefia mba hamaha an’i Nefia. Saingy tsy navelan’i Lamàna sy i Lemoela hisy na iza na iza hamaha an’i Nefia. Nalahelo i Lehia sy i Sarià sy lasa narary mafy. Tsy nijanona ilay tafio-drivotra.
Tamin’ny andro fahefatra dia hitan’i Lamàna sy i Lemoela fa mby hilentika ilay sambo. Nibebaka izy ireo ary namaha an’i Nefia. Rehefa nivavaka i Nefia dia nijanona ilay tafio-drivotra. Nandeha indray ny Liahônà. Nampiasain’i Nefia izany hanamoriana ny sambo hankany amin’ny lalana tokony ho izy.
Taorian’ny andro maro dia tonga soa aman-tsara tany amin’ny tany nampanantenaina ireo fianakaviana.