Te Ao Varua

Ia vaiiho atu outou i teie nei tiahapa tahuti nei, e haere outou i hea? I roto i te ao varua (DBY, 376).

Te mau varua iino o te faarue i teie nei vahi a haere atu ai i roto i te ao varua, e vai noa to ratou ino i reira? Oia. (DBY, 376).

Ia faarue te mau varua i to ratou mau tino, … e tia ïa ia ratou ia hi‘o, ia faaroo, e ia ite i te mau mea o te varua i reira … . E tia anei ia outou ia ite i te mau varua i roto i teie nei piha. Aita. Ahiri râ ua faati‘ai‘a te Fatu i to outou mata ia ite outou, e tia anei ia outou ia ite i te mau varua i reira? Oia, mai te au ta outou e ite nei i te mau tino, mai te au atoa i te tavini o [Elisaia] [a hi‘o 2 Te Mau Arii 6:16–17]. Ahiri e ua faatia mai te Fatu, e ua riro atoa ei hinaaro no’na ia na reirahia, e ite ïa outou i te mau varua o tei faarue i teie nei ao, mai ta outou atoa e ite nei i te mau tino i to outou na mata tahuti nei (DBY, 376–77).

O Iesu te taata matamua tei haere e poro i te mau varua i roto i te tape‘araa, oia tei mau atu i te mau taviri o te Evanelia o te ora ia ratou. Ua horo‘ahia mai taua mau taviri ra ia’na i te mahana e te hora iho i haere atu ai oia i roto i te ao varua, e na roto i taua mau taviri ra, ua iriti mai oia i te uputa no te ora i te mau varua i roto i te tape‘araa (DBY, 378).

Ua hinaaro tatou ia au i to tatou faatusiaraa i te hinaaro o te Atua i roto i te faaineineraa no te afa‘i mai i nia i te feia o tei ore â i fana‘o i te faarooraa i te Evanelia a ora noa ai ratou i roto i te tino tahuti nei, e o teie hoi te tumu, i roto i te ao varua, eita ïa e tia ia ratou ia faatere i te mau oro‘a o te fare o te Atua. Ua faaoroma‘i ratou i te mau tamataraa, e aita atura e tia ia ratou ia faatere i te mau oro‘a no haamatarararaa i ta ratou mau hara e no to ratou faateiteiraa, no reira, e mea titauhia ia ratou ia tiaturi i to ratou mau hoa, ta ratou mau tamarii, e te tamarii a ta ratou mau tamarii no te faatere i taua mau oro‘a ra no ratou, ia tia ia ratou ia afa‘ihia i nia i te basileia tiretiera o te Atua

Te feia e ora nei i nia i te fenua o tei faaroo i te Evanelia i to tatou nei anotau, ia faaauhia ïa ratou i te milioni e milioni tei ore i faaroo i te reira, e aore ra tei ore i farii i te mau taviri no te ora, e ite ïa outou, mai ia’u atoa e ite nei, e ohipa rahi mau te titauhia i roto i te ao varua (DBY, 377).

A feruri i te taata e milioni e milioni e milioni o tei ora e ua pohe ma te ore i faaroo i te Evanelia i nia i te fenua nei, ma te ore i farii i te mau taviri o te Basileia. Aita ratou i ineine no te hanahana tiretiera, e aore roa e mana e tia ia faaineine ia ratou ia ore ana‘e te mau taviri o teie Autahu‘araa (DBY, 378).

Te Metua Semita ra [Iosepha Semita, metua], e Calosa [Semita] e te Taeae [Edward] Partridge, oia, e te Feia Mo‘a maitatai ê atu atoa, te faaitoito ra ïa ratou i roto i te ao varua mai ta outou e ta’u e faaitoito nei i ŏ nei. E tia ia ratou ia ite mai ia tatou, aita râ e tia ia tatou ia ite atu ia ratou, maori râ, o te iritihia to tatou nei mata. Te aha ra ratou i reira? Te poro ra, te poro tamau noa ra, e te faaineine ra i te e‘a no tatou no te faaoioi mai i ta tatou ohipa no te paturaa i te mau hiero i ŏ nei e i te mau vahi ê atu atoa (DBY, 378).

Ia tamau â te ohipa a Iesu, e tamau â hoi te ohipa a te taata haapa‘o maitai atoa, e ia faaorahia te mau mea atoa o te tia ia faaorahia, e ia pûpûhia atu i te Metua. E ohipa rahi mau tei mua ia tatou (DBY, 378).

Te mau varua e parahi ra i roto i teie mau tiahapa tahuti nei i nia i te fenua nei, ia faarue ïa ratou i taua mau tiahapa ra, e haere tia atu ratou i taua ao varua nei. Eaha! Te hoê tiaa taata rahi i ŏ a‘era i roto i te varua, i te amuimuiraa te tahi i te tahi mai ta ratou e rave i ŏ nei? Oia, e te mau taeae, te amui ra ratou i reira, e mai te mea e e amuimui ratou, e haaputuputu ratou, i roto i te mau pŭpŭ, i roto i te mau taatiraa mai ta ratou e rave i ŏ nei, e tia ïa ia ratou. E mea papu, e hi‘o ratou, e faaroo, e paraparau e amui hoi ratou te tahi i te tahi, no te maitai e no te ino. Ia haere te mau Peresibutero i teie tau hopea nei e poro i te mau varua i roto i te tape‘araa, e farerei ïa te mau Peresibutero ia ratou, mai te au atoa to tatou mau Peresibutero e farerei i te feia ino i roto i te oraraa tahuti nei, ia haere te mau Peresibutero e poro ia ratou (DBY, 378).

Ia tae outou i roto i te ao varua, e au te mau mea atoa i te huru mau e te huru tano mai ŏ nei atoa ra. E mâtau te hoê varua i te tahi varua i roto i te ao varua—e paraparau, e hi‘o, e e tau‘aparau i te mau rave‘a rau mai te au atoa te ravehia i roto i te tiahapa tahuti nei. I reira, mai ŏ nei atoa, e au te mau mea atoa i te huru mau e te huru tano, e maramarama hoi outou i taua mau mea ra mai ta outou i maramarama i te mau mea i ŏ nei. I reira e ite outou e te mau varua ta tatou e parau nei, e mea itoito roa ïa; aita ratou e taoto a‘e. E haapii atoa outou e te faaitoito ra ratou ma to ratou puai atoa—ma te haa-itoito-raa mai te taata itoito atoa e haa i roto i teie nei ao (DBY, 380).

E mâtau te varua i te varua, mai te tino atoa e mâtau i te tino, e hamanihia râ te varua i te materia i faaateate-roa-hia e ore ai e itehia i teie nei tino tahuti. E haere ratou, e paraparau ratou, e faatupu ratou i ta ratou mau amuiraa; e te mau varua o te mau taata maitatai mai ia Iosepha e te mau Peresibutero, o tei faarue i teie Ekalesia i nia i te fenua nei no te hoê tau no te rave i te ohipa i te tahi atu vahi, te faaitoito ra ïa ratou i to ratou puai atoa e te haere ra i tera vahi e tera vahi ma te poro haere i te Evanelia, e te arata‘i ra Iosepha ia ratou i te na ôraa e, a haere, e to’u mau taeae, e ia arai ratou i te e‘a i mua ia outou, a haere tia atu a faaue atu ai ia faaatea atu ratou. Tei ia outou te Autahu‘araa e nehenehe hoi ia haapurara atu ia ratou, ia hinaaro râ te tahi no ratou i te faaroo i te Evanelia, a haapii ia ratou (DBY, 379).

E nehenehe ia’u ia parau no to tatou mau hoa tei faarue mai, e no to tatou atoa faarueraa mai, e ua haafatata atu vau i te reira vahi e ua maramarama vau i te oraraa mure ore e no reira ua titau-roa-hia ia’u ia faaitoito roa i to’u faaroo no te faatupu i te hinaaro i te ora noa. Te anaana e te hanahana o te oraraa i ŏ atu, aore roa ïa e noaa te parau ia faaite atu. Aita tatou e taupŭpû i reira, a paari ai to tatou matahiti e tote haere noa hoi to tatou avae i nia i tera e tera, e haapa‘o maitai atoa o te topa atu i raro. E ite hoi tatou i to tatou feia apî, e tote pinepine atoa ratou i te avae, a topa atu ai i raro. I ŏ atu râ, e mea huru ê roa! E haere ratou ma te taupŭpû ore mai te uira. Ia hinaaro tatou i te haere atu i Ierusalema, e aore ra teie vahi e tera vahi e te tahi atu vahi—e ua mana‘o vau e faatiahia ia na reira tatou ia hinaaro ana‘e tatou—inaha, tei reira hoi tatou, te hi‘o ra i to’na mau purumu. Ia hinaaro tatou i te haere i Ierusalema ia au i to’na huru i te tau no te Faaora; e aore ra ia hinaaro tatou i te hi‘o i te Ô i Edene i to’na huru i to’na hamaniraahia, tei reira ïa tatou, e te hi‘o ra hoi tatou i to’na huru i to’na vairaa varua, no te mea hoi e, ua hamanihia te reira i te varua na mua, e i te tino i muri a‘era, e te vai noa ra ïa i te varua. E i reira, e tia ia tatou ia hi‘o i te fenua nei i te aahiata o te hamaniraa, e aore ra e tia ia tatou ia haere atu i te tahi noa’tu oire ta tatou e hinaaro i nia i te reira. Ia hinaaro tatou i te ite nahea to ratou oraraa i ŏ nei i nia i teie mau fenua moana i te pae i te tooâ o te râ, e aore ra i te fenua Tinito, tei reira ïa tatou; oia mau, mai te maramarama o te po‘ipo‘i tatou… .Ua heheu mai te Atua i te tahi mau vahi iti no to’na haereraa e to’na mana, e ua riro te tereraa e te ohiparaa o te uira ei hi‘oraa au maitai no te mana o te Mana Hope (DBY, 380).

Ia tomo atu tatou i roto i te ao varua e mau ïa tatou i te tahi faito o to’na mana. I ŏ nei, te tafifi-tamu-hia nei tatou i te mau ati e te mau ma‘i huru rau. I roto i te ao varua, ua iriti-ê-hia taua mau mea atoa ra ia tatou e ua farii tatou i te ora, e te hanahana e te ite; e te vai ra te Metua ia parau mai ia tatou, e o Iesu ia parau mai ia tatou, e te mau melahi ia parau mai ia tatou, e e oaoa hoê tatou i te auhoaraa o te feia parau tia e te viivii ore o tei parahi ra i roto i te ao varua e tae noa’tu i te tia-faahou-raa (DBY, 380–81).

Ahiri e, e aau ino to te hoê taata—ua auraro roa oia i te ohipa ino, e pohe ihora oia i taua huru ra, e tomo atu ïa to’na varua i roto i te ao varua ma te hinaaro noa i te rave i te ino. Area râ, mai te mea e te faaitoito nei tatou ma te puai e te aravihi atoa ta te Atua i horo‘a mai ia tatou no te haamaitai atu i ta tatou mau taleni, no te faaineine ia tatou no te parahi i roto i te ora mure ore, e te na reira noa ra tatou e farii maira te menema i to tatou tino, eaha ïa te hinaaro o to tatou mau varua ia tomo atu i roto i te ao a muri atu? E faaitoito noa ïa ratou i te rave i te mau mea o te Atua, teie râ, i te faito rahi roa’tu—ma te haapii, ma te faarahi, ma te tupu i te aroha e i te iteraa te parau mau (DBY, 379).

Mai te mea e e ora maite tatou i ta tatou haapa‘oraa, ia haere atu tatou i roto i te ao varua, te mau varua i haamairihia i raro—o Lucifero e te toru o te tuhaa o te mau nuu o te ra‘i o tei pee mai ia’na, e te mau varua atoa o te feia iino o tei parahi i nia i teie nei ao, ia amui paatoa mai ratou, aita ïa to ratou e mana i nia i to tatou mau varua. E ere anei te reira i te tauturu rahi? Oia. Te toe‘a o te mau tamarii a te taata, tei raro a‘e ïa i to ratou mana, mai te au atoa i to ratou oraraa tahuti nei (DBY, 379).

I ŏ nei, e ahoaho to [te feia haapa‘o] e a‘ua‘uhia hoi ratou e ana [Satane]; ia haere râ tatou i roto i te ao varua e fatu ïa tatou i nia i te mana o Satane i reira, aita atura e tia ia’na ia hamani ino ia tatou, e ua rava‘i ïa ia’u te reira ite (DBY, 379).

Ia bapetizohia te hoê taata ia matara te hara, e pohe ihora, aita ïa oia i ineine i reira ra no te farii i te î raa o te hanahana i fafauhia i te feia tei haapa‘o i te Evanelia; ia haapiihia hoi oia e tia ai i to’na vairaa varua, i roto i te tahi atu mau tuhaa o te fare o te Atua, ma te haere mai te hoê parau mau i te tahi ra, mai te hoê ite i te tahi ra, e ia ineine oia no te faarii faahou i to’na tino e no te tomo atu i mua i te aro o te Metua te Tamaiti. Eita e tia ia tatou ia tomo atu i te hanahana tiretiera i roto i to tatou nei huru ite ore e te pouri o te mana‘o (DBY, 378–79).

E rahi atu to tatou hoa tei te tahi pae mai o te paruru i tei teie pae, e hau atu hoi te oaoa o to outou aroharaahia mai e ratou i to outou aroharaahia e to outou metua e to outou hoa i roto i teie nei ao; e hau atu to outou oaoa i te farereiraa ia ratou i to outou oaoa i te farereiraa i te tahi hoa i roto i teie nei oraraa; ei reira tatou e haere noa ai mai te hoê taahiraa i te tahi ra, mai te hoê oaoaraa i te tahi, e mai te hoê ite e te hoê mana i te tahi ra, a tupu noa ai to tatou oaoa i te rahi e te au, a haere noa ai tatou na te mau parau e te mau mana o te ora (DBY, 379–80).

Ia hope teie nei vairaa, e tae atu ai i te vairaa i mua nei, eita ïa tatou e faaea noa i reira. E haere â tatou, ma te rave-noa-raa i te maitai e hope roa a‘e to tatou puai, ma te raveraa e te haapa‘oraa i te ohipa no te feia atoa e tia ai ia tatou ia na reira, e i reira ra, e haere atu i te tahi ra, e te tahi ra, e ia faakorona te Fatu i te feia atoa o tei haapa‘o maitai i nia i teie fenua, e ia oti roa te ohipa o teie nei ao, e te Faaora, ta tatou e tauturu ra, ia oti ïa ia’na ta’na ohipa, e ia pûpûhia te fenua nei e te mau mea atoa i nia iho ra i te Metua. Ei reira te feia haapa‘o e farii ai i to ratou mau haamaitairaa e to ratou mau korona, e to ratou mau tutuuraa, e haamauhia ïa no ratou ra, e horo‘ahia hoi no ratou, e haere â ratou i reira, te mau ao mure ore ra, i te tupu-noa-raa a muri e a muri noa‘tu (DBY, 376).

• Ia pohe te tino, e haere te varua i hea? (A hi‘o atoa Alama 40:11–14.) No te aha aita e tia ia tatou ia paraparau i te feia i roto i te ao varua?

• Eaha te auraa o te parau, “ua iriti mai [Iesu] i te uputa no te ora i te mau varua i roto i te tape‘araa”? (A hi‘o atoa Poe Tao‘a Rahi, Ta Iosepha F. Semita Orama no nia i te Basileia Tiretiera; 1 Petero 3:18–19.)

• I muri a‘e i to te Mesia iritiraa i te uputa no te ora i roto i te ao varua, nahea te evanelia i te pororaahia i reira? (A hi‘o atoa Ta Iosepha F. Semita Orama no nia i te Basileia Tiretiera 1:30.)

• Mai te mea e aita te mau oro‘a o tei au i te tino tahuti nei e faaterehia i roto i te ao varua, no te aha te evanelia e porohia ai i te mau varua i reira? (A hi‘o atoa Ta Iosepha F. Semita Orama no nia i te Basileia Tiretiera 1:58–59.) Eaha ta tatou e nehenehe ia rave no te feia i roto i te ao varua o tei ore â i farii i te mau oro‘a no te ora? Nahea tatou ia rave itoito i te faaoraraa i te feia pohe, noa’tu â aita e hiero i fatata mai ia tatou?

• Nahea to outou oraraa tahuti nei e au ai i to outou oraraa i roto i te ao varua?

• Eaha ta te Peresideni Young i haapii no te oraraa i roto i te ao varua? Nahea te oraraa i roto i te ao varua e au ai i te oraraa i nia i te fenua nei? Nahea te reira e taa ê ai? Eaha te mau vahi i roto i te oraraa ao varua ta outou e hi‘o onoono nei?

• Eaha te puai e te mana o Satane i roto i te ao varua?

• No te aha te hoê taata o tei bapetizo-iho-hia nei i ore ai i ineine no te farii i te îraa o te hanahana? Eaha te tia ia tatou ia rave no te faaineine no te farii i taua haamaitairaa ra? Ei hea te reira e tia ai ia ravehia?