Te Oraraa i te Evanelia

Erave … tatou i te mau ture, te mau oro‘a e te mau titauraa i roto i te Papa‘iraa Mo‘a a faaohipa ai i te reira e hope roa a‘e, ma te tamau noa i te haapii e i te haere â i mua e tae noa’tu i te taime ua ora tatou i te mau mea atoa i haapa‘ohia e te Atua (DBY, 3).

Tei ia tatou te Evanelia o te ora e te faaoraraa, ia riro te taata ino ei taata maitai, e te taata maitai ei taata maitai atu (DBY, 6).

I te hoê paraparauraa aita atoa i maoro a‘enei i te hoê manihini o te ho‘i ra i te mau tuhaa fenua i te pae i te hitiâ o te râ, ua na ô maira oia e, “O outou, to outou nunaa, te mana‘o na outou e, e feia hape ore outou?” Pahono atura vau e, “Aita roa, aita matou i feruri mai tera… .Te parau haapiiraa ta matou i farii, e mea hape ore ïa; ia hi‘o râ tatou i te taata, e au atoa ta matou mau hape i ta te taata atoa ra. E ere hoi matou i te taata hape ore; te Evanelia râ ta matou e poro nei, to’na tumu, o te faariroraa ïa i te taata ei taata maitai roa’tu, ia tia ia ratou ia roaa te tia-faahou-raa hanahana a tomo atu ai i mua i te aro o te Metua e te Tamaiti” (DBY, 7).

[Eita e tia] i te taata [ia farii i te mau ture] ma te îraa; e tia râ ia ratou i farii i te tahi vahi iti i ŏ nei, te vahi iti i ŏ a‘e, te tahi tuhaa i teie mahana, te tahi tuhaa ananahi, te tahi â tuhaa i te hebetoma i mua, e te tahi faahou â i te matahiti i mua, mai te mea e ua faaohipa maitai ratou i taua tuhaa iti ta ratou i farii ra; ia ore râ, e vaiihohia ratou i roto i te pouri, e te maramarama ta te Fatu e heheu mai, e riro ïa ei pô ia ratou, e e tere atu â te basileia o te ra‘i ra, ma te vaiiho ia ratou ia perehahau noa. No reira, ua hinaaro ana‘e tatou i te faaohipa i te îraa o te ite o ta te Fatu i opua i te heheu mai, te hoê vahi iti i nia i te tahi vahi iti, i to te ao nei, e mea tia roa ïa ia faaohipa tatou i te mau tuhaa iti atoa ia heheuhia mai te reira (DBY, 4).

Ua hinaaro … vau i te haapapu i te Feia Mo‘a i te Mau Mahana Hopea Nei i te titauraa rahi no te faaohipa maite i te mau parau tumu o te Evanelia i to tatou oraraa, i ta tatou parau e i te mau mea atoa ta tatou e rave; e titau te reira ia pûpûhia te taata atoa, te oraraa atoa, i te haamaitai-noa-raa i to tatou huru ia roaa ia tatou te iteraa i te parau mau ia au i te faito i roto ia Iesu Mesia. Tei reira te faito o te maitai-roa-raa e hope roa a‘e. Ua faaitehia mai te reira i roto i te huru o to tatou Faaora; o te hoê noa râ tuhaa iti na‘ina‘i roa tei faaitehia i te taata, no te mea hoi e aita i tia ia ratou ia farii i te reira. Te tuhaa tei tia ia ratou ia farii, ta’na ïa i horo‘a ia ratou. Te tuhaa atoa ta tatou e ineine no te farii, ta te Fatu ïa e horoa ia tatou; te tuhaa atoa ta te mau nunaa o te fenua nei e ineine no te farii, ta’na ïa e horo‘a ia ratou (DBY, 11–12).

Ua papa‘ihia i roto i te Bibilia e, ua pou oia i raro a‘e i te mau mea atoa, ia reva oia i nia a‘e i te mau mea atoa. E ere anei hoê â huru i te mau taata atoa? Oia mau roa. E mea tia ïa, ia pou tatou i raro a‘e i te mau mea atoa, a reva riirii noa ai i nia, a haapii riirii noa ai i teie nei e au‘anei atoa, a farii ai i te “faaue, e ua na nia iho i te faaue e ua a‘o, e ua na nia iho i te a‘o… te tahi vahi iti i ŏ nei e mai reira hoi ei ŏ te tahi vahi iti” [a hi‘o Isaia 28:9–10; PH&PF 98:12] (DBY, 60) e ia tae roa’tu tatou i te mau tau mure ore a farii ai i te îraa o to’na ra hanahana, to’na maitai e to’na mana (DBY, 3).

I te Atua ra, e i te taata atoa ra tei ite i te mau parau tumu no te ora e te faaoraraa, tei ite i te Autahu‘araa, i te mau auvaha no te parau mau e i te mau horo‘araa e te mau piiraa a te Atua i te tamarii a te taata, aita e taa-êraa te ohipa i te pae varua e te ohipa i te pae tino—ua riro ana‘e ïa ei hoê. Mai te mea e , te haapa‘o nei au i ta’u ohipa, te rave nei au i te hinaaro o te Atua, noa’tu â tei te pororaa vau, tei te pureraa vau, tei te haaraa vau i to’u nei rima no te paturu ia’u; tei roto vau i te faaapu maa, tei roto i te fare tata‘iraa tao‘a, e aore ra tei te haapa‘oraa vau i te tahi fare toa; e tei te mau vahi atoa e titauhia ai ta’u ohipa, te tavini nei ïa vau i te Atua taa ê noa’tu i te vahi; e na reira atoa te taata atoa ra, te taata i to’na vahi, i ta’na tuhaa, i to’na tau (DBY, 8).

I te feruriraa o te Atua, aita e taa-ê-raa te pae varua e te pae tino, te pae tino e te pae varua; ua riro ana‘e hoi ïa ei hoê i roto i te Fatu [a hi‘o PH&PF 29:34–35] (DBY, 13).

Te mau mea atoa e au i te paturaa i te basileia o te Fatu i nia i te fenua nei, o te pororaa i te Evanelia e te paturaa i te mau hiero i to’na i‘oa, ua haapiihia tatou ia hi‘o atu i te reira ei ohipa i te pae varua, titau noa’tu â te reira i te puai o te tino no te faaotiraa (DBY, 13).

Eita e nehenehe ia tatou ia tomo atu i roto i te hiero ia oti te reira i te patuhia, a faaoti atu ai i te mau oro‘a o te afa‘i mai i te mau haamaitairaa i te pae varua, ma te ore e rave i te ohipa i te pae tino. E titauhia ia faaotihia te mau oro‘a i te pae tino no te haamau i te mau haamaitairaa i te pae varua o ta Tei Mana Hope i faataa no ta’na mau tamarii haapa‘o. Ua riro te mau ohipa atoa i te matamua, ei ohipa i te pae tino. Te na ô ra te Aposetolo e, na te ite maori e noaa ai te faaroo [a hi‘o Roma 10:17]. Eaha te tia ia itehia no te faatupu i te faaroo? Te pororaa i te Parau. No te reira, e titauhia te taata no te poro; e ere hoi oia i te varua itea-ore-hia ia hi‘o, e taata tino râ tei au i to tatou nei huru, o tei au atoa i te mau titauraa e te mau ture o te oraraa. Te pororaa i te Evanelia, e ohipa ïa i te pae tino, e te faaroo i te Fatu ia Iesu Mesia, o te hoturaa ïa i taua ohipa i te pae tino ra. Te bapetizoraa, e ohipa ïa i te pae tino, no te taata e rave ra e no te taata e farii ra. O vau te hoê ite ora nei no te parau mau i te reira, inaha, ua pinepine to’u nei avae i te mauiui, e to’u nei tino i te rohirohi na roto i te tereraa e te pororaa, ia na te ite, e roaa ai i te taata te faaroo. Te mau haamaitairaa ta tatou e hinaaro mau nei, e tae mai ïa na roto i te raveraa i te ohipa i te pae tino e titauhia ra, e na reira hoi i te faaineineraa i te mau mea atoa e titauhia ra no te farii i te mau haamaitairaa itea-ore-hia ia hi‘o ra ta Iehova i faataa no ta’na mau tamarii (DBY, 13–14).

Te haapa‘oraa a Iesu Mesia, o te hoê ïa haapa‘oraa no te mau mahana atoa o te haaati nei i te mau hopoi‘a e te mau huru atoa o teie oraraa (DBY, 12).

Eita te mau parau tumu no te mau tau mure ore e no te faateiteiraa mure ore e faufaa no tatou, maori râ, ia faaauhia ïa te reira i to tatou ite ia nehenehe ia tatou ia faaohipa i te reira i to tatou nei oraraa (DBY, 14).

E faaau vau i te Evanelia i te tau iho nei, te mau faanahoraa e te huru iho o te taata (DBY, 8).

Te faanahoraa o te afa‘i mai i te paruru e te hau i teie iho nei, o te reira ïa te mea tano ei haapa‘oraa, i te oraraa e i te poheraa; o te reira te mea tano no te ohipa imiraa moni; o te reira te mea tano no te faaapuraa maa, no te paturaa i te mau oire e te mau hiero, e taua faanahoraa nei, o te ture ïa a te Atua. E titau râ te reira i te haapa‘o maite. Te ture no te parau tia, e te e‘a ta te Atua i faataa ei haere‘a na te taata, e hopoi mai ïa te reira i te hau, i te tamahanahana, e o te oaoa i teie nei e i te hanahana mure ore e te faateiteiraa; eita râ te reira e faatupuhia, maori râ na roto i te haapa‘o maite i te hinaaro i te Atua (DBY, 8).

I tera taime e tera taime, ia feruri vau e e a‘o atu vau ia outou, te mana‘o ra vau e, ia a‘o noa’tu vau i te mau tumu parau no te mau tau a muri atu, e aore ra i te hi‘oraa i te mau tau i mutaa ihora, e au ïa te tahi pae o te feia e faaroo mai, e e anaanatae roa to ratou aau; i to’u nei râ mana‘o, na te varua o te maramarama i roto ia’u e faaite mai ia’u e, ia na reira vau i te a‘o, eita ïa te mau taata e haapiihia i ta ratou mau hopoi‘a no teie nei tau. No reira, aita to’u e mana‘o no te haapii atu ia outou i te mau hopoi‘a no tau hanere matahiti i mua, no te haapii râ i te mau mea e au i teie mahana, i to tatou haere‘a e ta tatou parau i teie mahana, ia ite tatou e mea nahea ia haamaitai ia tatou iho i te tau e hemo nei e i te huru e vai nei, e ia nehenehe ia tatou ia haamau i te hoê niu no te oaoa a muri atu (DBY, 12).

Ta’u misioni i te taata, ia haapii ïa ia ratou no te oraraa i te mahana tataitahi. Ua mana‘o vau te vai ra e rave rahi i ŏ nei o tei faaroo ia’u i te parauraa, e rave rahi a‘enei matahiti, aita vau i tau‘a rahi i te mau mea te tupu i muri a‘e i te Mileniuma. E a‘o maoro te mau peresibutero no te ohipa tei tupu i te anotau no Adamu, no te ohipa tei tupu hou te hamaniraa i te ao, e no te ohipa te tupu tauatini e tauatini matahiti a muri atu, ma te parau i te mau mea tei tupu na e te mau mea te tupu a muri atu, o ta ratou ïa hoi i ore i ite, ma te faaamu i te taata i te mata‘i noa; e ere râ tera i ta’u nei rave‘a no te haapii atu. Teie to’u hinaaro, ia haapii i te taata i ta ratou e rave i teie iho nei, e ia vaiiho na te Milenimua e haapa‘o i ta’na iho. Ia haapii ia ratou ia tavini i te Atua e ia patu i to’na basileia, ta’u ïa misioni tera. Ua haapii au i te faaroo, te tatarahapa, te bapetizoraa ia haamatara te hara, e te tuuraa rima no te fariiraa i te Varua Maitai. E mea tia ia haapiihia tatou i te mau ohipa o te oraraa i te mahana tataitahi, ma te feruriraa i te mau ohipa no teie oraraa tahuti nei (DBY, 8–9).

Eita tatou e vaiiho ia tatou ia haere i roto i te faaapu arote ai ma te ore e hopoi atoa i ta tatou haapa‘oraa; eita tatou e haere i roto i te hoê piha toro‘a, i te fare toa hoohoo ai i te tao‘a, i nia i te iri papa‘iraa hi‘opoa ai i te mau numeraraa, e i te tahi noa’tu â vahi e i te tahi noa’tu â ohipa ma te ore e hopoi atoa i ta tatou haapa‘oraa. Tei nia tatou i te pereoo auahi, e tei te tere-ori-haere-raa, ei piha‘i iho noa ia tatou to tatou Atua e ta tatou haapa‘oraa e tia ai.

Ua hinaaro tatou ia tupu te Feia Mo‘a i te maitai e tae noa’tu, ei hi‘oraa, ua riro ta tatou feia tata‘i pereoo auahi ei feia hau ê i te parau tia e te ite e parau ai teie Taiete Pereoo Auahi e, “A horo‘a mai ia matou i te hoê Peresibutero “Momoni” ei taata faahoro pereoo auahi, e aita atura te taata e ri‘ari‘a ia tere i nia i te pereoo auahi, no te mea ia ite taua taata faahoro e e ati to mua, e imi oia i te mau rave‘a atoa no te paruru i te feia i tuuhia mia i roto i to’na rima.” Ua hinaaro vau i te ite i to tatou mau Peresibutero o te î i te parau tia, e nounouhia ai ratou e teie Taiete ei feia hamani pereoo auahi, ei tiai pereoo auahi, e feia faahoro pereoo auahi, ei papa‘i parau, e ei feia haapa‘o piha toro‘a. Ia ora tatou i ta tatou haapa‘oraa e ia au tatou i te i‘oa o te Feia Mo‘a i te Mau Mahana Hopea Nei, o tatou nei mau ïa te feia te tia ia haapa‘o i taua mau ohipa ra ma te paruru papu; ia ore râ, ei faaiteraa papu ïa te reira e, aita tatou e ora nei i ta tatou haapa‘oraa (DBY, 232–33).

Tei roto i ta tatou haapa‘oraa te mau ohipa e te mau parau atoa o te taata. Eiaha te hoê taata ia rave i te toro‘a hooraa tao‘a, maori râ, ia na reira oia i roto i te Atua; eiaha te hoê taata ia haamata i te ohipa faaapu e te tahi noa’tu ohipa ê, maori râ, ia na reira oia i roto i te Fatu. Eiaha te hoê taata tei nia i te apooraa ia haava i te mau taata, maori râ, ia haava oia i i roto i te Fatu, ia tia ia’na, ma te parau tia e ma te maiti ore i te taata, ia ite i te maitai e te ino, te parau mau e te hape, te maramarama e te pouri, te parau tia e te parau tia ore (DBY, 9).

Ia tai‘o maite i te Faufaa Tahito e te Faufaa Apî, e ite ïa tatou e, te pae rahi o te mau heheuraa i horo‘ahia i te taata i mutaa iho, tei nia ïa te mau hopoi‘a o te mahana tataitahi; e pee atoa ïa tatou i taua e‘a ra. Ua riro te mau heheuraa i roto i te Bibilia e te Buka a Moromona ei hi‘oraa no tatou, e tei roto i te buka ra Te Parau Haapiiraa e te Mau Parau Fafau te mau heheuraa i horo‘a-afaro-hia mai i teie Ekalesia; ta tatou ïa arata‘i tera, aita hoi tatou i hinaaro ia faaorehia te reira; aita atoa tatou i hinaaro ia riro te reira ei mea tahito ia vaiihohia atu i te hiti. Ua hinaaro râ tatou i te tamau â i roto i te mau heheuraa a te Fatu a Iesu Mesia i te mahana tataitahi, e ia vai tamau â to’na Varua i roto ia tatou. Ia na reira tatou i te rave, e ore atura ïa tatou e haere noa i te pouri, e maramarama ora râ to tatou (DBY, 12).

Ia hinaaro tatou ia farii i te maitai o te Varua o Ziona, e titauhia ïa ia tatou ia ora no te reira. E ere ta tatou e haapa‘oraa no te feruriraa ana‘e; e haapa‘oraa râ te tia ia faaohipahia, ia afa‘ihia mai te oaoa i teie iho nei i roto i te mau aau atoa (DBY, 12).

Te ohipa no te paturaa i Ziona, e ohipa ïa e hope roa a‘e; e ere ïa i te feruriraa ana‘e. Aita to te haapa‘oraa feruriraa e faufaa rahi no te taata. Ia vai te hoê tuhaa ai‘a i Ziona anei e i Ierusalema anei ei tuhaa ai‘a feruri-noahia— ei mea mana‘ohia ana‘e—hoê â ïa huru e aita e tuhaa ai‘a a‘e. E mea tia ia farii i te parau faturaa, ia faariro i te tuhaa ei mea faaohipahia, ei mea mau, ei mea faufaa. Eiaha maori tatou ia mauruuru i te hoê haapa‘oraa feruriraa noa, ia riro râ ta tatou ei haapa‘oraa faaohipahia, ei mea mâ ia’na iho, e mea ora ia’na iho, ma te tapea-noa-raa tatou i te aroha o te Atua i roto ia tatou, ma te ora atoa na roto i te mau faaueraa, te mau ture e te mau parau atoa o te horo‘ahia ei arata‘i na tatou (DBY, 12).

E ia haapa‘o vau i ta’u nei hopoi‘a, e ia haapa‘o atoa vau i to ananahi, e ia na reira noa vau, ia tae i te tau mure ore, ua ineine ïa vau no te tomo atu i roto i te mau mea o te tau mure ore. E mea tia roa ia haapii outou paatoa ia na reira (DBY, 11).

Te tumu iho o to tatou nei oraraa i ŏ nei, no te haapa‘o ïa i te mau mea tahuti o teie nei ao e no te haavi i te fenua nei, ma te faatupu-rahi-raa i te mau raau e te mau animala o ta te Atua i faataa ia vai i ŏ nei (DBY, 15).

No tatou teie nei oraraa, e ta tatou hopoi‘a, ia farii ïa i te reira i teie nei mahana, eiaha e tia‘i noa’tu i te Mileniuma. Ia haapa‘o tatou, i teie mahana, i te mea e ora ai tatou, e ia ahiahi atura, e hi‘opoa ïa tatou i te mau ohipa i ravehia i te reira mahana, e tatarahapa ïa tatou i ta tatou mau hara, mai te mea e e hara tatou ia tatarahapa, e e faaoti ïa i ta tatou mau pure; ei reira e tia ai ia tatou ia tiraha i raro a taoto atu ai ma te aau hau e po‘ipo‘i noa a‘e, a tia mai ai i nia ma te aau mehara i te Atua ra, a haamata atu ai i ta tatou ohipa no taua mahana ra, a tautoo noa ai ia ora, e hope noa’tu te mahana, i te Atua ra e eiaha i te taata ê atu a‘e (DBY, 16).

Ua tamata tamau noa vau i te faaitoito i teie feia ia haere i nia i te e‘a e riro ai ia ratou i te tiaau ia ratou iho, ia haapa‘o ratou i ta ratou feia veve, i tei pirio‘i, i tei hapepa e tei matapô, ia faateitei i te feia ite ore i nia mai raro i te vahi i ore ai ratou i ite i te mau peu o te ao nei, i te iteraa i te ite atoa o te tamarii o te taata, ia haaputuputu mai ia ratou mai na otia e maha o te fenua nei, ia faariro ia ratou ei feia maramarama, e te rave paari i te mau tao‘a, e ma te tiaau hoi ia ratou iho (DBY, 16).

Ta’u aroraa teie mai mutaa mai, ia imi i te rave‘a ia maramarama te mau taata e, ia ore ratou e tiaau ia ratou iho, e ore roa ïa ratou e tiaauhia; ia ore tatou ia haamau i te niu no te faaamu e no te faaahu e no te tapo‘i ia tatou, e mou atu ïa tatou i te po‘iâ e te to‘eto‘e; e riro atoa tatou i te mauiui i te tau ve‘ave‘a a vai noa ia te puai o te mahana i nia i to tatou mau tino vaitahaa noa e te tapo‘i-ore-hia (DBY, 16–17).

O vai ïa feia tei au ia aruehia? Te feia o te tiaau ia ratou iho, e aore ra te feia o te tiaturi noa i te aroha rahi o te Fatu ia tiaauhia mai ratou? Eita tatou e mana‘o e, e faaora mai te Fatu ia tatou mai roto mai i ta tatou iho hape e i ta tatou iho haapa‘o-ore-raa, eiaha maori tatou e mana‘o e e horo‘a mai te Fatu i te maa ia tatou ia ore tatou ia tanu i te tumu; eiaha atoa e mana‘o e e tia ia tatou ia tiaoro i te Fatu ia faaora mai ia tatou mai roto mai i te maa ore e aita hoi tatou i utaru i te repo e i ueue i te huero (DBY, 293).

Eiaha tatou ia titau i ta te Fatu e rave no tatou, e titau maori tatou i ta tatou e rave no tatou iho (DBY, 293).

Noa’tu â te repo maitai o teie faa, e te huero ia tanuhia, eiaha tatou ia ani i te Atua ia faaamu ia tatou, eiaha atoa ia ani ia pee noa oia ia tatou ma te faraoa i te rima i te taparuraa ia tatou ia amu i te reira. Eita oia e na reira, eita atoa vau e na reira, ahiri o vau nei te Fatu. E nehenehe ia tatou ia faaamu ia tatou iho; e ia tupu râ te ati e ore ai e nehenehe ia tatou ia faaamu ia tatou iho, ei reira ïa e tia ai i te Fatu ia faatupu i te semeio ei faaora ia tatou (DBY, 294).

Mai te mea e, aita e nehenehe ia outou ia haapa‘o i to outou mau hinaaro tahuti nei, e mea nahea ïa outou ia farii i te paari no te roaa mai i te mau ora mure ore? Ua horo‘a mai te Atua i te ora ia outou—to outou tino e to outou varua; e ua haamaitai ia outou i te aravihi, e no reira ua haamau i te niu no te mau ite atoa, te mau paari atoa e te mau maramarama atoa, e te mau hanahana atoa e te mau ora mure ore atoa. Mai te mea e, aita i roaa ia outou te aravihi no te haapa‘o i to outou mau hinaaro tahuti nei, e i te hoê vahine e i e pu‘e tamarii, eaha ïa ta outou i te mau mea o te ra‘i ra?

A hi‘o maitai ia outou iho ei Sotaiete Tauturu i teie nei oire e i te mau pae mou‘a nei. A hi‘o i to outou huru. Aferuri outou i te reira, a faaoti atu ai e, e haamata anei outou i te haapii i te mana ta outou e mau nei; ei reira, a faaohipa i taua mana ra ei hamani maitai e ei faaora i te feia veve i rotopu i te nunaa (DNW, 17 Aug. 1869, 3).

• No te aha te Fatu e haapii mai ai ia tatou i te mau parau mau o te evanelia “te tahi tuhaa i teie mahana, te tahi tuhaa ananahi”? (A hi‘o atoa Isaia 28:9–10; 2 Nephi 28:30; FH&PF 98:12.) Eaha te titauhia ia tatou ia rave no te farii i te tuhaa rahi a‘e o te mau parau mau o te evanelia? (A hi‘o atoa Alama 12:9–11.) Eaha te tupu ahiri ua horo‘ahia te hoê faito parau mau e aita â tatou i ineine no te farii i te reira?

• No te aha e mea titauhia i te tahi mau taime ia haapa‘o tatou i te hoê tumu parau o te evanelia hou e nehenehe ai ia tatou ia haapii mai i taua parau tumu ra? (A hi‘o atoa Ioane 7:17; PH&PF 93:28.)

• E mea nahea tatou e taotia ai i ta te Atua e nehenehe ia haapii ia tatou?

• Ua parau mai te Peresideni Young e, “aita e taa-ê-raa te pae varua e te pae tino”? E mea nahea te iteraa i te auraa o taua parau ra e au ai i nia i ta tatou raveraa i ta tatou mau hopoi‘a i te mahana tataitahi?

• Ua haapii te Peresideni Young i te Feia Mo‘a i te faaohipa i te mau parau tumu o te evanelia i roto i to ratou oraraa i te mahana tataitahi. Eaha te rave‘a tia e au ai te evanelia i to tatou mau faaotiraa no to tatou utuafare, ta tatou ohipa imiraa moni, e te tahi atu â mau hopoi‘a?

• I to outou mana‘oraa, eaha te auraa o te parau a te Peresideni Young a na ô ai oia e, eiaha tatou ia haere “i te tahi noa’tu â vahi e i te tahi noa’tu â ohipa ma te ore e hopoi atoa i ta tatou haapa‘oraa”? E mea nahea tatou ia hopoi i ta tatou haapa‘oraa i te mau vahi atoa ta tatou e haere, ma te tau‘a atoa i te mau tiaturiraa a vetahi ê? E mea nahea tatou ia turu‘i â i nia i te Varua ei tautururaa ia tatou ia hopoi i ta tatou haapa‘oraa i te mau vahi atoa?

• Taa ê atu i te ohipa misionare e te taviniraa i roto i te Ekalesia, eaha ta tatou hopoi‘a i roto i to tatou mau oire?

• Eaha ta te Peresideni Young i haapii no ta tatou hopoi‘a no te tiaau ia tatou iho? E mea nahea tatou ia faarava‘i i ta tatou iho i te pae varua, i te haapiiraa, i te pae tino, i te pae mana‘o, e te pae moni? E mea nahea tatou ia tauturu ia vetahi ê ia na reira atoa?

• No te aha i riro ai te tiaauraa te taata ia’na iho ei tuhaa faufaa o te evanelia?

• Ua parau te Peresideni Young no te peu maitai e te faufaa no te haapa‘oraa ia tatou iho. Eaha te mau haamaitairaa te roaa ia tatou ia na reira i te rave? Eaha te mau huru, ia au i ta te Peresideni parau, e “faatupu i te semeio ei faaora ia tatou”?