Te Tatarahaparaa e te Bapetizoraa

I te hoê mahana to‘eto‘e e te hiona i te ava‘e Eperera i te matahiti 1832, ua bapetizohia Brigham Young i raro i te pape to‘eto‘e roa o ta’na iho anavai pape e Eleazer Miller, te hoê ïa taata e maha a‘era ava‘e mai to’na faafariuraahia i te Ekalesia. O teie ta’na parau no taua oro‘a ra, “Ua farii ihora vau i te hoê varua haehaa, mai to te tamarii, i te faaiteraa mai ia’u e, ua faaorehia ta’u mau hara” (MHBY-1, 2–3). Ua haapii oia e, aita to te pape iho “e mana no te tamâ i te hara”(DBY, 159), area e mana râ to te bapetizoraa no te tamâ ia tatou i te hara mai te mea e e ravehia te reira e te feia e mau nei i te mana e mai te mea hoi e e ravehia no te feia o tei taa ia ratou to ratou iho mana‘o, e ia na muahia te reira e te tatarahaparaa, e ia na murihia ïa e te faaitoitoraa no te faatura i te mau fafauraa o te bapetizoraa

Te Mau Haapiiraa a Brigham Young

Ia rahi atu to tatou maramarama, e rahi atoa atu te iteraa i to tatou iho mana‘o e e rahi atu hoi ta tatou hopoi‘a.

Te hara, o te raveraa ïa i te hape ma te ite e e nehenehe hoi ia tatou ia rave i te maitai, e e faautu‘ahia te hara ia tae i te tau i haapa‘ohia e te Fatu (DBY, 156).

Faaitoito noa’tu â tatou i teie nei i te rave i te maitai, e ere anei e nehenehe ia tatou ia haere â i mua? E nehenehe. Ia hape tatou na roto i te ite ore, e haapii a‘era tatou e, e mea hape ïa, e hopoi‘a na tatou ia faaea i te rave i taua hape ra i reira iho e a muri noa’tu hoi (DBY, 156).

E nehenehe ia tatou ia faatupu i te Tara‘ehara i roto i to tatou oraraa na roto i te tatarahaparaa mau.

Mai te mea e, ua haamauiui au i te hoê taata, ia fa‘i au i ta’u hara i mua i taua taata ra e tia ai, a faatitiaifaro atu ai i ta’u hape (DBY, 158).

Te mana‘o nei au, e mea tia ia faaitehia ma te afaro e te haavare ore te mau mea te tia ia faaitehia i te taata, e ia tape‘a-noa-hia ia outou te mau mea te tia ia tape‘ahia. … A faaite i te taata i te ohipa e au i te taata. Mai te mea e, ua hara outou i te taata, a fa‘i i mua ia ratou. Mai te mea e, ua hara outou i te hoê utuafare e aore ra i te tahi mau taata tupu, a haere i mua ia ratou a fa‘i ai. … Mai te mea e, ua hara outou i te taata hoê ra, a haere outou i taua taata ra, a fa‘i ai i mua ia’na ra (DBY, 158).

Ia tatarahapa mau te taata, ma te aau atoa, e ma te faaite atu i to te ra‘i e e mea mau ta ratou tatarahaparaa na roto i te haapa‘oraa i te mau titauraa tei faaitehia ia ratou na roto i te mau ture o te Evanelia, e tia ïa ia ratou ia farii i te faaoraraa, e aore roa e mana e vai nei o te tia ia faataa ê ia ratou i te varua au ra (DBY, 156).

Te haapii mai nei te tahi pae o ta tatou mau peu tahito e, te taata o tei taparahi pohe roa i te taata e ua rave hoi i te mau hara iino roa, e tia ïa ia’na ia tatarahapa e ia faarii i te faaoraraa i te taime a haapohehia ai oia no ta’na mau hara; e ua haapohe-ana‘e-hia taua taata ra no ta’na hara, e faaroohia te parau e, “Ia haamaitaihia te Atua! ua reva atu oia i te ra‘i, ia faakoronahia i te hanahana, na roto i te aroha faito ore o te Fatu o Iesu Mesia.” E parau maamaa ana‘e ïa tera. Eita roa’tu te reira huru taata e ite i te ra‘i. E pure vetahi e, “Ahiri hoi e ua pohe roa vau i te mahana vau i faafariuhia mai ai!” Na teie e faaite i te mau mana‘o hapehape e te mau feruriraa faufaa ore o te ao Cherisetiano (DBY, 157).

Ua riro te bapetizoraa ei oro‘a titau-roa-hia no to tatou ora.

Te tiaturi nei tatou, oia te Feia Mo‘a i te Mau Mahana Hopea Nei, i te bapetizoraa na roto i te utuhiraa ia matara te hara, ia au i te faaiteraa a te mau pĭpĭ a Iesu e te mau heheuraa a te Fatu i horo‘ahia mai i teie mau mahana hopea nei. E mea viivii ore te mau tamarii rii, aita to ratou e aau mauiui, aita atoa ta ratou e hara ia tatarahapa e ia faarue, e no reira, aita e tia ia ratou ia bapetizohia ia matara te hara. Ia rave tatou i te hara, ua ite ïa tatou i te maitai e te ino; aita te tamarii rii i ite i te reira; aita e tia ia’na ia ite i te reira; aita to’na mana‘o i tupu i te paari no te ite i te maitai e te ino; aita ta’na e nehenehe ia faaroo i te metua e i te orometua e i te tahu‘a ia faaite ana‘e ratou e e mea maitai tera, e mea ino tera, e mea mauiui tera; e ia ore oia ia ite i taua mau mea ra, aita ïa e tia i te reira taata ia taa i to’na iho mana‘o e no reira, aita atoa e tia ia bapetizohia oia ia matara te hara [a hi‘o Moroni 8] (DBY, 158–59).

Aita e oro‘a ta te Atua i horo‘a mai ma to’na iho reo, na roto i ta’na Tamaiti ia Iesu Mesia, e aore ra na roto i te vaha o te hoê o ta’na mau Peropheta, ta’na mau Aposetolo, e ta’na mau Haapii Evanelia o tei riro ei mea faufaa ore. Te mau oro‘a atoa te mau faaueraa atoa e te mau titauraa atoa, e mea titauhia ïa no te ora o te mau tamarii a Adamu (DBY, 152).

Mai te mea e, ua vai parau tia noa outou mai to outou fanauraa mai â, e aita roa i rave a‘enei i te mau hara e te mau ofatiraa i te ture i itehia, ia bapetizohia outou no te faatia i te mau parau tia atoa, mai te au ia Iesu. Mai te mea e tia ia outou ia parau e, aita ta outou e hara ia tatarahapa, a faarue na outou i to outou feruriraa hape, a here outou i te Atua ma te tavini atu ia’na ma te feaa ore te aau (DBY, 159).

Te Feia Mo‘a atoa i te Mau Mahana Hopea Nei, e tomo ïa ratou i roto i te fafauraa apî e te mure ore ia tomo ana‘e mai ratou i roto i teie Ekalesia. E fafau ratou i te faaea i te paturu, i te turu e i te here i te basileia o te Diabolo e i te mau basileia o teie nei ao. E tomo ratou i roto i te fafauraa apî e te mure ore no te paturu i te Basileia o te Atua, eiaha ei basileia ê atu. E euhe ratou i te euhe mo‘a roa, i mua i te mau ra‘i e te fenua, e tei nia hoi to ratou iho ora i taua euhe ra e, e paturu ratou i te parau mau e i te parau tia, eiaha ra i te ino e te haavare, e patu ratou i te Basileia o te Atua, eiaha ra i te mau basileia o teie ao (DBY, 160).

Rahi noa’tu â ta tatou parau e, tei pae tatou o te Atua e ta’na mau ohipa, eita e tia ia farii tatou i te mau haamaitairaa e te tiaraa o to’na Basileia maori râ, ia riro tatou ei melo no te reira. Nahea tatou ia na reira? Na roto i te tatarahaparaa i ta tatou mau hara e i te haapa‘oraa i te mau titauraa o te Evanelia a te Tamaiti a te Atua o tei horo‘ahia mai ia tatou. Ua hanere te tauasiniraa taata o tei tiaturi i te Fatu ia Iesu Mesia e ua tatarahapa i ta ratou mau hara, e ua farii ratou i te faaiteraa a te Varua Maitai e, e aroha te Atua, e ua here ratou ia’na e ua here oia ia ratou, aita râ ratou i riro ei melo o to’na Basileia. Aita ratou i haapa‘o i te mau titauraa, aita ratou i tomo na te uputa (DBY, 152–53).

Aita to outou e mana no te bapetizo ia outou iho, aita atoa to outou e mana no te faatia faahou mai ia outou iho mai te pohe maira; eita atoa e tia ia outou, ia au i te ture, ia bapetizo i te tahi atu taata ia matara te hara, maori râ, ua bapetizo a‘enei te tahi taata ia outou e ua faatoro‘a a‘enei ia outou i taua mana ra (DBY, 160).

E mana anei to te pape iho no te tamâ i te hara? Aita roa’tu; te parau mai nei râ te Fatu e, “Ia tatarahapa te taata hara i ta’na mau hara, e ia haere i raro i te pape i te bapetizoraa, e ia tanuhia i te bapetizoraa ia au i te poheraa e te tanuraa i raro i te fenua, e ia tia mai mai raro mai i te pape, ia au i te fanauraa—ia na reira te taata ma te aau parau mau, e tamâhia ïa ta’na ra mau hara.” [A hi‘o PH&PF 128:12–13.] Na te pape iho te reira e tamâ? Aita; na te haapa‘oraa i te mau faaueraa a te Atua e tamâ i te mau pora‘o o te hara (DBY, 159).

Te Mau Mana‘o no te Haapiiraa

Ia rahi atu to tatou maramarama, e rahi atoa atu te iteraa i to tatou iho mana‘o e e rahi atu hoi ta tatou hopoi‘a.

Nahea ta te Peresideni Young tatararaa i te auraa o te parau te hara? (A hi‘o atoa Iakobo 4:17.)
Eaha ta te Peresideni Young i haapii no ta tatou hopoi‘a a rahi atu ai to tatou iteraa i te mea tia e te mea hape? (A hi‘o atoa 2 Nephi 9:25–27.)
Eaha te mana‘o tano no tatou no te faahaereraa i to tatou oraraa i mua? (A hi‘o atoa Alama 34:33.)Eaha ta te reira e haapii no te ite, te iteraa te taata to’na iho mana‘o e te hopoi‘a?

E nehenehe ia tatou ia faatupu i te Tara‘ehara i roto i to tatou oraraa na roto i te tatarahaparaa mau.

Eaha te utu‘a o te tatarahaparaa mau? No te aha te haapa‘oraa i te mau ture o te evanelia i riro ai ei tuhaa faufaa roa no te tatarahaparaa?
Eaha ta te Peresideni Young i haapii no te tatarahaparaa na mua noa iho a pohe ai te hoê taata?

Ua riro te bapetizoraa ei oro‘a titau-roa-hia no to tatou ora.

Eaha ta te bapetizoraa ohipa i roto i te haereraa mai i te Mesia? (A hi‘o atoa Moroni 8:25–26.)
Eaha ta te Peresideni Young i haapii no te feia te tia e te feia te ore e tia ia bapetizohia? No te aha i ore ai i tia ia bapetizohia te feia tei ore i ite to ratou iho mana‘o? (A hi‘o atoa Moroni 8:9–14.) Eaha ta te Peresideni Young i faaite i te feia o te parau e, aore roa ta ratou e hara?
Ua haapii te Peresideni Young e, ua titau-roa-hia te mau oro‘a atoa o te evanelia, e tae noa’tu i te bapetizoraa, no to tatou ora. E mea nahea te mau oro‘a o te evanelia i haamaitai ai i to outou oraraa?
Ua haapii te Peresideni Young e, “te Feia Mo‘a atoa i te Mau Mahana Hopea Nei, e tomo ïa ratou i roto i te fafauraa apî e te mure ore ia tomo ana‘e mai ratou i roto i teie Ekalesia.” Ia bapetizohia tatou, eaha ta tatou e fafau e, e rave tatou? Eaha ta tatou e fafau e, e ore tatou e rave? (A hi‘o atoa Mosia 18:8–10.)
No te aha te tiaturiraa i te Fatu ia Iesu Mesia e te hereraa Ia’na i ore ai i rava‘i ia ô te taata i te uputa o To’na ra Basileia?
No te aha i titau-roa-hia ai i te taata ia “faatoro‘a[hia] … i taua mana ra” no te rave i te bapetizoraa?
Ia au i te parau a te Peresideni Young, eaha te faufaa e te faahoho‘araa i roto i te bapetizoraa? (A hi‘o atoa Roma 6:3–6, 11; Mose 6:58–60; 1 Ioane 5:7–8.) Ua faataa mai te Peresideni Young e, “[aita] e mana … to te pape iho no te tamâ i te hara.” Eaha te mea te tamâ i ta tatou hara?